ໃນວັນທີ 26 ພະຈິກ 2024 ຜ່ານມາ, ທີ່ ກະຊວງການຕ່າງປະເທດ, ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ ໄດ້ຕ້ອນຮັບການເຂົ້າຢ້ຽມອຳລາຂອງ ສະຫາຍ ຫງວຽນ ວັນ ຈຸງ (Nguyen Van Trung), ກົງສຸນໃຫຍ່ ແຫ່ງ ສສ ຫວຽດນາມ ປະຈຳ ແຂວງ ຈຳປາສັກ, ໃນໂອກາດທີ່ສຳເລັດການປະຕິບັດຫນ້າທີ່ຢູ່ ສປປ ລາວ.

ໃນໂອກາດນີ້, ທ່ານຮອງລັດຖະມົນຕີ ໂພໄຊ ໄຂຄຳພິທູນ ໄດ້ສະແດງຄວາມຊົມເຊີຍຕໍ່ ສະຫາຍ ຫງວຽນ ວັນ ຈຸງ ທີ່ໄດ້ສຳເລັດການປະຕິບັດຫນ້າທີ່ເປັນກົງສຸນໃຫຍ່ ແຫ່ງ ສສ ຫວຽດນາມ ຢູ່ນະຄອນປາກເຊ ແຂວງຈຳປາສັກ ດ້ວຍຜົນສຳເລັດອັນຈົບງາມ ຕະຫຼອດໄລຍະການປະຕິບັດຫນ້າທີ່ ເປັນເວລາ 3 ປີກວ່າ (2021-2024), ພ້ອມທັງ ໄດ້ຕີລາຄາສູງຕໍ່ການພົວພັນຮ່ວມມືແບບພິເສດ ໃກ້ຊິດສະໜິດສະໜົມຖານ ສະຫາຍອ້າຍນ້ອງ ລາວ-ຫວຽດນາມ, ຫວຽດນາມ-ລາວ ທີ່ນັບມື້ນັບແຕກດອກອອກຜົນງົດງາມຂຶ້ນໄປເລື້ອຍໆ, ເຊິ່ງຕະຫຼອດໄລຍະການປະຕິບັດຫນ້າທີ່ຢູ່ ສປປ ລາວ ສະຫາຍ ຫງວຽນ ວັນ ຈຸງ ໄດ້ປະກອບສ່ວນຢ່າງຕັ້ງຫນ້າໃນການເປັນຂົວຕໍ່ທີ່ສຳຄັນໃນການປະສານງານການພົວພັນຮ່ວມມືຫຼາຍດ້ານ ລະຫວ່າງບັນດາແຂວງພາກໃຕ້ຂອງ ສປປ ລາວ ທີ່ຕົນເອງຮັບຜິດຊອບ ກັບ ບັນດາແຂວງຕ່າງໆຂອງ ສສ ຫວຽດນາມ ໃນນັ້ນ ໄດ້ຊຸກຍູ້ເສີມຂະຫຍາຍການພົວພັນຮ່ວມມືກັບບັນດາແຂວງແຮກສ່ຽວ ໃຫ້ກ້າວຂຶ້ນສູ່ລະດັບສູງ ແລະ ມີຜົນສຳເລັດຢ່າງຈົບງາມ, ສະຫາຍ ຍັງໄດ້ເອົາໃຈໃສ່ຂົນຂວາຍເຕົ້າໂຮມຊາວຫວຽດນາມ ທີ່ດຳລົງຊີວິດຢູ່ລາວ ໃຫ້ມີຄວາມສາມັກຄີປອງດອງ, ປະຕິບັດຖືກຕ້ອງຕາມແນວທາງນະໂຍບາຍຂອງ ພັກ-ລັດຖະບານ ແລະ ນັບຖືລະບຽບກົດໝາຍຂອງ ສປປ ລາວ ວາງອອກເປັນຢ່າງດີ ເປັນຕົ້ນ ການດຳເນີນທຸລະກິດການອອກແຮງງານ ແລະ ອື່ນໆ, ເຊິ່ງໄດ້ປະກອບສ່ວນເຂົ້າໃນການສ້າງສາພັດທະນາ ສປປ ລາວ ກໍຄື ການເສີມຂະຫຍາຍສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ. ໃນຕອນທ້າຍ ທ່ານຮອງລັດຖະມົນຕີ ໂພໄຊ ໄຂຄໍາພິທູນ ໄດ້ອວຍພອນໃຫ້ ສະຫາຍ ຫງວຽນ ວັນ ຈຸງ ຈົ່ງປະສົບຜົນສຳເລັດໃນຫນ້າທີ່ອັນໃຫມ່ ແລະ ເຊື່ອຫມັ້ນວ່າ ພາຍຫລັງສໍາເລັດການປະຕິບັດຫນ້າທີ່ຢູ່ ສປປ ລາວ ແລ້ວ ສະຫາຍ ຫງວຽນ ວັນ ຈຸງ ຈະນຳໃຊ້ປະສົບການ ແລະ ຄວາມສາມັກຄີຮັກແພງ ສືບຕໍ່ຊຸກຍູ້ເຂົ້າໃນການພົວພັນຮ່ວມມື ລາວ-ຫວຽດນາມ ໃນຕໍ່ຫນ້າອີກ.

ໃນຂະນະດຽວກັນ, ສະຫາຍ ຫງວຽນ ວັນ ຈຸງ ໄດ້ສະແດງຄວາມຂອບໃຈຢ່າງຈິງໃຈຕໍ່ຄຳເວົ້າອັນຈົບງາມຂອງ ສະຫາຍຮອງລັດຖະມົນຕີ ໂພໄຊ ໄຂຄຳພິທູນ ກໍຄື ພັກ-ລັດຖະບານ ແລະ ປະຊາຊົນລາວ ອ້າຍນ້ອງ ທີ່ໄດ້ໃຫ້ການຮ່ວມມື ແລະ ສະໜັບສະໜູນເປັນຢ່າງດີຕະຫຼອດໄລຍະການປະຕິບັດຫນ້າທີ່ຢູ່ ສປປ ລາວ ຈົນສາມາດຍາດໄດ້ຜົນສຳເລັດອັນຈົບງາມ, ຢືນຢັນຈະສືບຕໍ່ໃຫ້ການຮ່ວມມື ແລະ ສະໜັບສະໜູນ ສປປ ລາວ ໃຫ້ຫຼາຍຂຶ້ນໃນຕໍ່ຫນ້າ, ທັງນີ້ ກໍ່ເພື່ອນຳເອົາຜົນປະໂຫຍດສູງສຸດມາສູ່ປະຊາຊົນສອງຊາດ ຫວຽດນາມ-ລາວ ລາວ-ຫວຽດນາມ ອ້າຍນ້ອງ.