ສປປ ລາວ ​​ເປັນ​ເຈົ້າພາບ​ຈັດກອງປະຊຸມຄະນະ​ກຳມາທິການ ​ລະຫວ່າງ ​ລັດຖະບານ​ອາ​ຊຽນ​ ວ່າດ້ວຍ ​ສິດທິ​ມະນຸດ (ASEAN Intergovernmental  Commission on Human Rights ຫຼື AICHR) ສະໄໝພິເສດ ຄັ້ງທີ 2/2024 ​ ​ໃນລະຫວ່າງ ​ວັນ​ທີ 12 ຫາ 15 ພະຈິກ 2024 ທີ່​ ຫຼວງພະບາງ ໂດຍພາຍໃຕ້ການເປັນປະທານໂດຍ ທ່ານ ຢົ້ງ ຈັນທະລັງສີ, ຜູ້ຕາງໜ້າ ສປປ ລາວ ປະຈໍາ ຄະນະກໍາມາທິການ ລະຫວ່າງ ລັດຖະບານອາຊຽນ ວ່າດ້ວຍ ສິດທິມະນຸດ ແລະ ທັງເປັນປະທານຂອງ AICHR ສໍາລັບປີ 2024. ​ເຂົ້າຮ່ວມໃນກອງປະຊຸມຄັ້ງນີ້ ມີ​ຜູ້ຕາງໜ້າຂອງ​ແຕ່ລະ​ປະ​ເທດ​ສະມາຊິກ​ອາຊຽນ ປະຈຳ​ຄະນະ​ກຳມາ​ທິການ​ດັ່ງກ່າວ ແລະ ພະນັກງານຈາກກອງ​ເລຂາ​ອາຊຽນ. ນອກນີ້, ກໍມີຜູ້ຕາງໜ້າຈາກປະເທດ ຕີມໍ ແລັດເຕ ເຂົ້າຮ່ວມໃນຖານະຜູ້ສັງເກດການ.


 

ກອງປະຊຸມໄດ້ຮັບຟັງຄວາມຄືບໜ້າຂອງການຈັດຕັ້ງປະຕິບັດວຽກງານການສົ່ງເສີມ ແລະ ປົກປ້ອງສິດທິມະນຸດຂອງແຕ່ລະປະເທດສະມາຊິກອາຊຽນ ເປັນຕົ້ນແມ່ນ ກົດໝາຍ ແລະ ລະບຽບການທີ່ກ່ຽວຂ້ອງກັບສິດທິມະນຸດ, ແລະ ຂໍ້ລິເລີ່ມດ້ານສິດທິມະນຸດ ໂດຍບັນດາປະເທດສະມາຊິກອາຊຽນ.

ກອງປະຊຸມໄດ້ປຶກສາຫາລື ກ່ຽວກັບ ​ການຈັດຕັ້ງປະຕິບັດແຜນກິດຈະກໍາ ປະຈໍາປີ 2024 ແລະ 2025 ໂດຍສະເພາະແມ່ນ ການຈັດຕັ້ງປະຕິບັດແຜນວຽກບູລິມະສິດຕ່າງໆ ຂອງ AICHR ກໍຄື ບັນດາຂໍ້ລິເລີ້ມ ແລະ ກິດຈະກໍາ/ໂຄງການຕ່າງໆຂອງບັນດາປະເທດສະມາຊິກອາຊຽນ ເປັນຕົ້ນແມ່ນ ການຈັດກອງ​ປະຊຸມ​ສໍາ​ມະ​ນາໃນຂົງເຂດສິດທິມະ ນຸດໃນຫົວຂໍ້ຕ່າງໆ ເຊັ່ນ: ​ສິດທິຂອງ​ຄົນ​ພິການ, ສິດ​ຂອງ​ແມ່ຍິງ ​ແລະ ​ເດັກນ້ອຍ, ສິດທິ​ມະນຸດ ​ແລະ ນະໂຍບາຍໃນ​ອາ​ຊຽນ, ສິດທິມະນຸດ ແລະ ທຸລະ​ກິດ. AICHR ຍັງໄດ້ປຶກສາຫາລືກ່ຽວກັບມາດຕະການສ້າງຄວາມເຂັ້ມແຂງໃນການຄຸ້ມຄອງແຜນງານ ແລະ ການເຄື່ອນໄຫວຂອງ AICHR, ຄວາມຄືບໜ້າການກະກຽມສໍາລັບແຜນງານ 5 ປີ ສະບັບໃໝ່ຂອງ AICHR ສຳລັບໄລຍະ 2026-2030 ໂດຍໃຫ້ສອດຄ່ອງກັບວິໄສທັດປະຊາຄົມອາຊຽນ 2045 ແລະ ບັນດາແຜນຍຸດທະສາດຂອງວິໄສທັດດັ່ງກ່າວ.


 

ໃນວັນ​ທີ 14 ພະຈິກ​ 2024, AICHR ​ໄດ້​ພົບປະ​ກັບ​ອົງການພາກພື້ນຂອງຂະບວນການບາຫຼີ  ວ່າດ້ວຍ ການຕ້ານການລັກລອບ, ການຄ້າມະນຸດ ແລະ ອາຊະຍາກໍາຂ້າມຊາດທີ່ກ່ຽວຂ້ອງອື່ນໆ  (Regional Support Office of the Bali Process on People Smuggling, Trafficking in Persons and Related Transnational Crime ຫຼື RSO) ​ເພື່ອ​ປຶກສາ​ຫາລື​ກ່ຽວ​ກັບ​ຂົງ​ເຂດ​ການ​ຮ່ວມ​ມື​ທີ່​ເປັນ​ໄປ​ໄດ້​ໃນ​ປີ 2025.

ໃນວັນ​ທີ 15 ພະຈິກ​ 2024, ກອງປະຊຸມໄດ້ປິດລົງ ແລະ ມີການມອບ-ຮັບໜ້າທີ່ການເປັນປະທານ AICHR ຈາກ ສປປ ລາວ ເຊິ່ງເປັນປະທານໝຸນວຽນໃນປີ 2024 ໃຫ້ແກ່ ມາເລເຊຍ ເພື່ອສືບຕໍ່ເປັນປະທານຄະນະກຳມາທິການດັ່ງກ່າວໃນປີ 2025. ກອງປະຊຸມ ໄດ້ສະແດງຄວາມຊົມເຊີຍ ສປປ ລາວ ສໍາລັບການປະຕິບັດໜ້າທີ່ການເປັນປະທານ  AICHR ຕະຫຼອດປີ 2024 ຢ່າງມີຜົນສຳເລັດ ພ້ອມທັງໄດ້ສະແດງຄວາມຕ້ອນຮັບ ມາເລເຊຍ ໃນຖານະເປັນປະທານ AICHR ໃນປີ 2025.

ຄະນະກຳມາທິການລະຫວ່າງລັດຖະບານອາຊຽນ ວ່າດ້ວຍ ສິດທິມະນຸດ ຖືກສ້າງຕັ້ງຂຶ້ນ ໃນປີ 2009 ພາຍໃຕ້ກົດບັດອາຊຽນ ແລະ ເປັນອົງກອນຫຼັກໃນການສົ່ງເສີມການຮ່ວມມືດ້ານສິດທິມະນຸດໃນອາຊຽນ.