ໃນວັນທີ 19 ພະຈິກ 2024 ໄດ້ມີພິທີປະກາດເປີດການນຳໃຊ້ດ່ານສາກົນປ່າຮ່າງ, ເມືອງສົບເບົາ, ແຂວງຫົວ ພັນ, ສປປ ລາວ ແລະ ດ່ານສາກົນລ່ອງເຊີບ, ເມືອງມົກເຈົ່າ, ແຂວງເຊີນລາ, ສສ ຫວຽດນາມ ຢ່າງເປັນທາງການ, ໂດຍ ການເປັນປະທານຮ່ວມຂອງສອງຮອງລັດຖະມົນຕີກະຊວງການຕ່າງປະເທດ ລາວ ແລະ ຫວຽດນາມ. ຝ່າຍລາວ ນຳໂດຍ ສະຫາຍ ໂພໄຊ ໄຂຄຳພິທູນ, ຮອງລັດຖະມົນຕີກະຊວງການຕ່າງປະເທດ; ສະຫາຍ ດຣ ຄຳແພງ ໄຊສົມແພງ, ເລຂາພັກແຂວງ, ເຈົ້າແຂວງໆຫົວພັນ ແລະ ຝ່າຍຫວຽດນາມ ນຳໂດຍ ສະຫາຍ ຫງວຽນ ມິງ ຫວູ້ ຮອງລັດຖະມົນຕີ ກະຊວງການຕ່າງປະເທດ; ສະຫາຍ ຮວ່າງ ກວັກ ແຄ່ງ, ເລຂາພັກແຂວງ, ປະທານຄະນະກຳມະການປະຊາຊົນແຂວງ ເຊີນລາ. ໃນພິທີດັ່ງກ່າວຍັງມີ ສະຫາຍ ນາງ ຄຳເພົາ ເອີນທະວັນ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ ລາວ ປະຈຳ ສສ ຫວຽດນາມ; ກົງສູນໃຫຍ່ ແຫ່ງ ສສ ຫວຽດນາມ ປະຈຳ ນະຄອນຫຼວງພະບາງ, ສປປ ລາວ ພ້ອມດ້ວຍຜູ້ຕາງໜ້າຈາກບັນດາກະຊວງຂະແໜງການທີ່ກ່ຽວຂ້ອງຂອງສູນກາງ, ອຳນາດການປົກຄອງທ້ອງຖິ່ນ, ພໍ່ແມ່ ປະຊາຊົນ ເມືອງສົບເບົາ ແລະ ເມືອງມົກເຈົ່າ ເຂົ້າຮ່ວມພິທີຢ່າງຫຼວງຫຼາຍ.

ດ່ານສາກົນປ່າຮ່າງ, ເມືອງສົບເບົາ, ແຂວງຫົວພັນ ເປັນດ່ານຊາຍແດນທາງບົກ, ຕັ້ງຢູ່ເຊິ່ງໜ້າກັບດ່ານສາກົນ ລ່ອງເຊີບ, ເມືອງມົກເຈົ່າ, ແຂວງເຊີນລາ, ສສ ຫວຽດນາມ, ຢູ່ທີ່ບໍລິເວນຫຼັກໝາຍຊາຍແດນເລກທີ 255. ດ່ານສາກົນ ປ່າຮ່າງ ຕັ້ງຢູ່ຫ່າງຈາກເທດສະບານເມືອງສົບເບົາ, ແຂວງຫົວພັນ ປະມານ 25 ກິໂລແມດ ແລະ ຫ່າງຈາກເທດສະບານ ເມືອງຊຳເໜືອ, ແຂວງຫົວພັນ ປະມານ 100 ກິໂລແມັດ, ຫ່າງຈາກເທດສະບານແຂວງເຊີນລາ 150 ກິໂລແມັດ ແລະ ຫ່າງຈາກນະຄອນຫລວງຮ່າໂນ້ຍ ປະມານ 210 ກມ. ການຈັດພິທີປະກາດເປີດການນຳໃຊ້ຄູ່ດ່ານສາກົນປ່າຮ່າງ-ລ່ອງເຊີບ ຈະເປັນການປະກອບສ່ວນສ້າງສາຍພົວພັນມິດຕະພາບທີ່ດີກັບປະເທດເພື່ອນບ້ານ, ໂດຍສະເພາະສອງປະ ເທດ ລາວ-ຫວຽດນາມ, ປະກອບສ່ວນອຳນວຍຄວາມສະດວກໃນການບໍລິການ, ຊຸກຍູ້ສົ່ງເສີມການແລກປ່ຽນຊື້-ຂາຍ ສິນຄ້າ, ການລົງທຶນ, ການທ່ອງທ່ຽວຢູ່ພາຍໃນແຂວງຫົວພັນ ແລະ ພາກເໜືອຂອງ ສປປ ລາວ ໃຫ້ມີການຂະຫຍາຍ ຕົວ, ສ້າງສິ່ງອຳນວຍຄວາມສະດວກໃຫ້ແກ່ພົນລະເມືອງລາວ, ຫວຽດນາມ ແລະ ພົນລະເມືອງປະເທດທີສາມ ສາມາດ ເດີນທາງ ເຂົ້າ-ອອກ ຜ່ານດ່ານສາກົນປ່າຮ່າງ ຢ່າງຖືກຕ້ອງຕາມລະບຽບກົດໝາຍຂອງ ສປປ ລາວ, ໂດຍສະເພາະເປັນ ປະເທດເຊື່ອມໂຍງ ກັບປະເທດລຸ່ມແມ່ນໍ້າຂອງ ແລະ ບັນດາປະເທດໃນພາກພື້ນ.

ພິທີດັ່ງກ່າວໄດ້ຈັດຂຶ້ນຢ່າງສົມກຽດ, ຄຶກຄື້ນ, ເບີກບານມ່ວນຊື່ນ ເຕັມໄປດ້ວຍບັນຍາກາດອັນສະໜິດສະໜົມ ຖານສະຫາຍອ້າຍນ້ອງ, ເຊື້ອສາຍເພົ່າພັນຍາດຕິພີ່ນ້ອງ, ບ້ານໃກ້ເຮືອນຄຽງທີ່ດີ. ປະຊາຊົນສອງແຂວງຫົວພັນ-ເຊີນລາ ກໍຄືປະຊາຊົນສອງຊາດ ລາວ-ຫວຽດນາມ ມີຄວາມປິຕິຍິນດີ ແລະ ພາກພູມໃຈເປັນຢ່າງຍິ່ງ ທີ່ສອງຊາດ ລາວ-ຫວຽດ ນາມ ໄດ້ມີການສົ່ງເສີມການໄປມາຫາສູ່, ການຢ້ຽມຢາມ, ທ່ອງທ່ຽວ, ການຄ້າຂາຍຂອງປະຊາຊົນຢູ່ຕາມບໍລິເວນຊາຍ ແດນໃຫ້ມີຄວາມສະດວກ ທັງເປັນການຕອບສະໜອງໃຫ້ແກ່ສາຍພົວພັນມິດຕະພາບແບບພິເສດ, ການຮ່ວມມືຮອບ ດ້ານ ທີ່ສອງພັກ-ສອງລັດ ແລະ ປະຊາຊົນສອງຊາດ ລາວ-ຫວຽດນາມ ມີມາແຕ່ດົນນານ ໃຫ້ໝັ້ນຄົງຂະໜົງແກ່ນໄປ ຊົ່ວກາລະນານ.