ໃນຕອນເຊົ້າວັນທີ 8 ພະຈິກ 2024 ທີ່ຜ່ານມາ, ຢູ່ທີ່ກະຊວງການຕ່າງປະເທດ, ນະຄອນຫຼວງສະຕ໊ອກໂຮມ, ປະເທດຣາຊະອານາຈັກຊູແອດ, ທ່ານ ບຸນທະວີ ວິລະວົງ, ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປ. ລາວ ປະຈຳປະເທດຊູແອດ, ໄດ້ເຂົ້າຢ້ຽມພົບປະກັບ ທ່ານ ນ. Maria Malmer Stenergard, ລັດຖະມົນຕີກະຊວງການຕ່າງປະເທດແຫ່ງຣາຊະອານາຈັກຊູແອດ, ເນື່ອງໃນໂອກາດທີ່ທ່ານເອກອັກຄະລັດຖະທູດມາຮັບໜ້າທີ່ເປັນທູດຄົນໃໝ່ປະ ຈຳປະເທດຊູແອດ, ໃນໂອກາດດັ່ງກ່າວ, ທ່ານທູດໄດ້ຮັບກຽດຕ້ອນຮັບຢ່າງອົບອຸ່ນ ແລະ ເຕັມໄປດ້ວຍບັນຍາກາດໄມຕີຈິດມິດຕະພາບ. ໃນການພົບປະດັ່ງກ່າວ, ທ່ານທູດໄດ້ສະແດງຄວາມຂອບໃຈ ແລະ ຊົມເຊີຍຕໍ່ທ່ານລັດຖະມົນຕີທີ່ໄດ້ຖືກແຕ່ງຕັ້ງເປັນລັດຖະມົນຕີກະຊວງການຕ່າງປະເທດຄົນໃໝ່ແຫ່ງຣາຊະອານາຈັກຊູແອດ ແລະ ໄດ້ແຈ້ງໃຫ້ຊາບສະພາບ ລວມຂອງການພັດທະນາເສດຖະກິດ ແລະ ສັງຄົມຂອງ ສປປ. ລາວ, ຜົນສຳເລັດຂອງກອງປະຊຸມສຸດຍອດອາຊຽນທີ່ລາວ ເປັນເຈົ້າພາບ, ການພົວພັນ ແລະ ການຮ່ວມມືຂອງສອງປະເທດ ລາວ-ຊູແອດໃນໄລຍະຜ່ານມາ, ເຊິ່ງທັງສອງປະເທດໄດ້ສ້າງຕັ້ງສາຍພົວພັນການທູດນຳກັນນັບຕັ້ງແຕ່ປີ 1964 ເປັນຕົ້ນມາ ແລະ ໃນໂອກກາດດັ່ງກ່າວ,  ທ່ານ ນ. Maria Malmer Stenergard, ລັດຖະມົນຕີກະຊວງການຕ່າງປະເທດໄດ້ສະແດງຄວາມຍິນດີຕ້ອນຮັບ ແລະ ຊົມເຊີຍທ່ານທູດຄົນໃໝ່, ເຊິ່ງເປັນການປະກອບສ່ວນອັນສຳຄັນໃນການເສີມຂະຫຍາຍສາຍພົວພັນ ແລະ ການຮ່ວມມືທີ່ມີມູນເຊື້ອອັນດີງາມລະຫວ່າງສອງປະເທດໃຫ້ສືບຕໍ່ຂະຫຍາຍຕົວຍິ່ງໆຂຶ້ນ ແລະ ອວຍພອນໃຫ້ທ່ານທູດ, ຈົ່ງປະສົບຜົນສຳເລັດໃນການປະຕິບັດໜ້າທີ່ການທູດຂອງຕົນຢູ່ປະເທດຊູແອດ ແລະ ບັນດາປະເທດທີ່ຮັບຜິດຊອບ.