ຕອນບ່າຍຂອງວັນທີ 9 ພະຈິກ 2024, ສະ​ຖານ​ກົງ​ສຸນ​ໃຫຍ່ ແຫ່ງ ສ​ປ​ປ ລາວ ທີ່ ນະຄອນ ດານັງ ໂດຍສົມ​ທົບ​ກັບ ສະຫະພັນບັນດາອົງການມິດຕະພາບນະຄອນດາ​ນັງ, ສະມາຄົມມິດຕະພາບ ຫວຽດນາມ - ລາວ ແລະ ບັນ​ດາອົງການທີ່​ກ່ຽວ​ຂ້ອງນະຄອນດານັງ  ໄດ້ຈັດຕັ້ງພິ​ທີສະເຫຼີມສະຫຼອງ ຄົບຮອບ 75 ປີ ແຫ່ງວັນມູນເຊື້ອຂອງທະຫານອາສາສະໝັກ ແລະ ຊ່ຽວ​ຊານ​ຫວຽດ​ນາມ ທີ່ຊ່ວຍເຫລືອການປະຕິວັດລາວ (30/10/1949 – 30/10/2024).

ໃນ​ພິ​ທີ​ດັ່ງ​ກ່າວ, ຕາງ​ໜ້າຝ່າຍລາວມີ ສະຫາຍ  ສຸ​ພັນ ຫາ​ດາວ​ເຮືອງ, ກົງ​ສຸນ​ໃຫຍ່​ ແຫ່ງ ສ​ປ​ປ ລາວ ປະ​ຈຳ ນະ​ຄອນ​ດາ​ນັງ, ​ພະ​ນັກ​ງານ​ປະ​ຈຳ​ສະ​ຖານ​ກົງ​ສຸນ​ໃຫຍ່  ແລະ  ນັກ​ຮຽນ, ນັກ​ສຶກ​ສາ ທີ່​ກຳ​ລັງ​ສຶກ​ສາ​ຢູ່​ບັນ​ດາ​ສະ​ຖາ​ບັນ​ສຶກ​ສາ​ຂອງ​ນະ​ຄອນ​ດາ​ນັງ ແລະ ບັນດາແຂວງພາກກາງ-ໄຕຫງວຽນ. ສ່ວນຝ່າຍ​ຫວຽດ​ນາມ​ ມີຄະນະພັກ;ຄະນະນໍາ ອໍານາດການປົກຄອງ​ນະ​ຄອນ​ດາ​ນັງ, ​ສະ​ຫະ​ພັນ​ອົງ​ການ​ຈັດ​ຕັ້ງ​ມິດ​ຕະ​ພາບ​ນະ​ຄອນ​ດາ​ນັງ,  ​ສະ​ມາ​ຄົມ​ມິດ​ຕະ​ພາບ ຫວຽດ​ນາມ - ລາວ ນະ​ຄອນ​ດາ​ນັງ, ຕາງໜ້າສະຖານກົງສຸນໃຫຍ່ຕ່າງປະເທດ ທີ່ມີສຳນັກງານຕັ້ງຢູ່ ນະຄອນດານັງ; ຄະນະປະສານງານຫ້ອງການອະດີດທະຫານອາສາສະຫມັກ ແລະ ຊ່ຽວຊານຫວຽດນາມ ປະຈຳນະຄອນດານັງ ແລະ ບັນດາແຂວງພາກກາງ-ໄຕຫງວຽນ ; ບັນ​ດາ​ລຸງ, ປ້າອະ​ດີດ​ທະ​ຫານ​ອາ​ສາ​ສະ​ໝັກ​ ແລະ ຊ່ຽວ​ຊານ​ຫວຽດ​ນາມ ທີ່​ໄດ້​ຊ່ວຍ​ເຫຼືອ​ການ​ປະ​ຕິ​ວັດ​ລາວຫຼາຍກວ່າ 200 ຄົນ ເຂົ້າ​ຮ່ວມ​ພິ​ທີ.

ທີ່​ພິທີ​ສະ​ເຫຼີ​ມສະຫຼອງ, ສະຫາຍ ພັນເອກ ເຈີ່ນ ຢື່ ຕຽບ, ຫົວໜ້າຄະນະປະສານງານຫ້ອງການອະດີດທະຫານອາສາສະຫມັກ ແລະ ຊ່ຽວຊານຫວຽດນາມ ທີ່ໄປຊ່ວຍເຫຼືອການປະຕິວັດລາວ ໄດ້ຂຶ້ນມີຄຳເຫັນ ໂດຍ​ໄດ້​ຫວນ​ຄືນ​ວັນທີ່ມີຄວາມໝາຍສຳຄັນທາງດ້ານປະຫວັດສາດ ​ຂອງສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ລະຫວ່າງ​ລາວ - ຫວຽດນາມ, ຫວຽດ​ນາມ - ລາວ ​ໃນ​ໄລຍະ​ປະຕິວັດ​ຕ້ານ​ການ​ຮຸກ​ຮານ​ຂອງ​ພວກຈັກກະພັດ​ທີ່​ເຕັມໄປດ້ວຍການເສຍສະຫຼະ​ຊີວິດ​ເພື່ອ​ຊາດ ​ແລະ ເລືອດ​ເນື້ອ​ຂອງ​ທະຫານ​ສອງ​ປະ​ເທດ; ເຊີດຊູນໍ້າໃຈຮັກຊາດອັນດູດດື່ມ ແລະ ພິລາອາດຫານ ປະຊາຊົນສອງຊາດວິລະຊົນ ທີ່ໄດ້ຜ່ານຜ່າຄວາມຫຍຸ້ງຍາກ ແລະ ການທົດສອບນາໆປະການ ແລະ ສາມາດຍາດເອົາຄວາມເປັນເອກະລາດແຫ່ງຊາດ ແລະ ກ້າວໄປເຖີງການປົດປ່ອຍປະເທດຊາດເປັນເອກະລາດຢ່າງສົມບູນ, ສືບຕໍ່ດຳເນີນພາລະກິດສ້າງສາ ແລະ ປົກປັກຮັກສາປະເທດຊາດຢ່າງມີໄຊ ຕະຫຼອດໄລຍະຫຼາຍທົດສະວັດທີ່ຜ່ານມາ.

75 ປີຜ່ານມາ, ບັນດາການເຄື່ອນໄຫວກໍ່ຄືການປະກອບສ່ວນອັນໃຫຍ່ຫຼວງຂອງບັນດານັກຮົບທະ​ຫານອາສາສະໝັກ ແລະ ຊ່ຽວຊານຫວຽດນາມ ຢູ່ລາວ  ເຂົ້າໃນການຮັດແໜ້ນສາຍພົວພັນມິດ​ຕ​ະ​ພາບ, ຄວາມສາມັກຄີແບບພິເສດ ລາວ - ຫວຽດນາມ, ຫວຽ​ດ​ນາມ - ລາວ ຈົນມາເຖິງປັດຈຸບັນ ການພົວພັນດ້ານການເມືອງລະຫວ່າງ 2 ປະເທດຍັງໄດ້ຮັບການຮັດແໜ້ນ ແລະ ເສີມຂະຫຍາຍຢ່າງບໍ່ຢຸດຢັ້ງ, ເພີ່ມທະວີຄວາມໄວ້ເນື້ອເຊື່ອໃຈ, ຢ່າງແໜ້ນແຟ້ນ ແລະ ມີບົດບາດຊີ້ນຳທິດທາງລວມຂອງການພົວພັນລະຫວ່າງ 2 ປະເທດ ຜ່ານບັນດາການພົບປະແລກປ່ຽນການຢ້ຽມຢາມ ແລະ ການພົບປະຂັ້ນສູງຢ່າງ​ເປັນ​ປົກ​ກະ​ຕິ.

ການ​ຮ່ວມ​ມື​ດ້ານ​ປ້ອງ​ກັນຊາດ, ປ້ອງ​ກັນ​ຄວາມ​ສະຫງົບ ​ແລະ ການ​ຕ່າງປະ​ເທດ ​ແມ່ນ​​ສືບ​ຕໍ່ເປັນເສົາ​ຄ້ຳ​ທີ່ສຳຄັນ, ນັບ​ມື້​ນັບ​ເຂົ້າ​ສູ່​ລວງ​ເລິກ ​ແລະ ມີ​ປະສິດທິ​ຜົນ, ຊ່ວຍ​ຮັດ​ແໜ້ນ​ພື້ນຖານ​ການ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ຂອງ​ສອງ​ປະ​ເທດ. ການ​ຮ່ວມ​ມື​ດ້ານ​ເສດຖະກິດ, ການ​ຄ້າ ​ແລະ ການ​ລົງທຶນ​ສືບ​ຕໍ່​ມີ​ການ​ປ່ຽນ​ແປງ​ຢ່າງ​ຕັ້ງໜ້າ.

ກ່າວ​ຄຳ​ເຫັນ​ໃນ​ພິ​ທີ ສະຫາຍ  ສຸພັນ ຫາ​ດາວ​ເຮືອງ, ກົງ​ສຸນ​ໃຫຍ່ ​ແຫ່ງ ສ​ປ​ປ ລາວ ປະຈຳ​ນະຄອນດາ​ນັງ ​ຕາງໜ້າສະຖານກົງສຸນໃຫຍ່ສປປລາວ ປະຈຳ ນະຄອນ ດານັງ ໄດ້ກ່າວວ່າ ຕະຫລອດໄລຍະຜ່ານມາ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ,ສອງລັດ ແລະ ປະຊາຊົນສອງຊາດລາວ-ຫວຽດນາມ ທີ່ປະທານໂຮ່ຈີມິນ ຜູ້ຍິ່ງໃຫຍ່, ປະທານໄກສອນ ພົມວິຫານ ແລະ ປະທານ ສຸພານຸວົງ ທີ່ແສນເຄົນລົບຮັກ ຂອງພວກເຮົາຮ່ວມກັນສ້າງຕັ້ງຂຶ້ນ ແລະ ໄດ້ຮັບການປົກປັກຮັກສາ, ຖະນຸຖະໜອມ, ເພີ່ມພູນຄູນສ້າງ ດ້ວຍຢາດເຫື່ອ ແລະ ເລືອດເນື້ອຂອງບັນດານັກຮົບປະຕິວັດ ແລະ ບັນດາການນຳຫຼາຍຮຸ່ນຄົນຂອງສອງຊາດພວກເຮົານັ້ນ ສືບຕໍ່ໄດ້ຮັບການເສີມຂະຫຍາຍທັງລວງກວ້າງ ແລະ ລວງ ເລິກ ນັບມື້ນັບມີປະສິດທິຜົນ ກາຍເປັນມູນມັງມໍລະດົກອັນລໍ້າຄ່າຂອງພາລະກິດປະຕິວັດຂອງທັງສອງຊາດລາວ-ຫວຽດນາມ ພວກເຮົາຕະຫລອດມາ. ພ້ອມດຽວກັນນັ້ນ, ສະຫາຍ ສຸພັນ ຫາດາວເຮືອງ ກໍ່ຍັງໄດ້ສະ​ແດງ​ຄວາມຮູ້ບຸນຄຸນຢ່າງເລິກເຊິ່ງ, ຄວາມ​ຂອບ​ອົກ​ຂອບ​ໃຈ​ຢ່າງ​ຈິງໃຈມາຍັງ​ພັກ-ລັດ, ກອງທັບ ​ແລະ ປະຊາຊົນ ຫວຽດນາມອ້າຍນ້ອງ  ຕໍ່ກັບມິດຈິດມິດໃຈອັນບໍລິສຸດຜຸດຜ່ອງ,ຄວາມສາມັກຄີຮັກແພງອັນສະໜິດສະໜົມ; ການສະໜັບສະໜູນ ແລະ ການອູ້ມຊູຊ່ວຍເຫຼືອອັກລໍ້າຄ່າ, ທັນການໃຫ້ ສປປລາວຕະຫຼອດມາ ທັງໃນໄລຍະຕໍ່ສູ້ກູ້ຊາດ ກໍ່ຄືໃນໄລຍະສ້າງສາ ແລະ ພັດທະນາປະເທດຊາດໃນປັດຈຸບັນ;  ພິ​ເສດ​ແມ່ນ​ບັນດາ​ກຳລັງ​ທະ​ຫານອາສາ​ສະໝັກ ​ແລະ ຊ່ຽວຊານ​ຫວຽດນາມ ທີ່​ໄດ້​ຢືນ​ຢູ່​ຄຽງ​ຂ້າງ​ປະຊາຊົນ​ລາວ ໃນການຕໍ່ສູ້ເພື່ອເອກະລາດ ແລະ ເສລີພາບ ໄດ້ແບ່ງປັນຄວາມທຸກລໍາບາກກັບກອງທັບ ແລະ ປະຊາຊົນລາວ, ເສຍສະຫຼະເລືອດເນື້ອຂອງຕົນເອງເພື່ອປະຕິບັດພັນທະສາກົນຢູ່ລາວຫຼາຍສິບປີ; ຖືເປັນບ້ານ​ເກີດ​ເມືອງ​ນອນ​ທີ່​ສອງ​ຂອງ​ເຂົາ​ເຈົ້າ, ປະ​ຊາ​ຊົນ​ຈໍາ​ນວນ​ຫຼາຍ​ໄດ້​ໃຊ້​ເວ​ລາ​ທັງໝົດ​ຂອງ​ຕົນ​ຕໍ່​ສູ້​ ແລະ ​ເຮັດ​ວຽກ​ເປັນ​ຊ່ຽວ​ຊານ​ໃນ​ຫຼາຍ​ດ້ານ​ທີ່​ແຕກ​ຕ່າງ​ກັນ, ເຊິ່ງໃຊ້​ເວ​ລາ​ຫຼາຍກວ່າ​ທີ່ຢູ່​ກັບ​ຄອບ​ຄົວໃນຫວຽດ​ນາມ.

ໃນໂອກາດດຽວກັນນັ້ນ; ສະຫາຍ ສຸພັນ ຫາດາວເຮືອງ ຂໍຢືນຢັນວ່າ ເຖິງສະພາບການພາກພື້ນ ແລະ ສາກົນ ຈະມີການຜັນແປໄປແນວໃດກໍ່ຕາມ, ພັກ-ລັດ ແລະ ປະຊາຊົນລາວ ຈະສືບຕໍ່ຮ່ວມມືຢ່າງແໜ້ນແຟ້ນ ກັບພັກ-ລັດ ແລະ ປະຊາຊົນລາວ ຫວຽດນາມ ອ້າຍນ້ອງ ເພື່ອປົກປັກຮັກສາ ແລະ ເພີ່ມພູນຄູນສ້າງສາຍພົວພັນພິເສດທີຫາຍາກຂອງພວກເຮົາ ໃຫ້ຈະເລີນຫງອກງາມ, ແຕກດອກອອກຜົນ ແລະ ເບັ່ງບານຫອມຫວນຕະຫຼອດກາລະນານ ເພື່ອຜົນປະໂຫຍດຂອງປະຊາຊົນສອງຊາດ.

ນອກຈາກນັ້ນ; ຕາງໜ້າ​ນັກຮຽນ, ນັກ​ສຶກ​ສາລາວທີ່ກຳລັງສຶກສາຢູ່ນະຄອນດານັງ-ບັນດາແຂວງພາກກາງໄຕຫງວຽນ ​ແລະ ​ໄວ​ໜຸ່ມ​ຂອງ​ສອງ​ປະ​ເທດ​ກໍ່​ໄດ້ຜັດປ່ຽນກັນຂຶ້ນສະ​ແດງ​ໃຫ້​ຄຳເຫັນ​ ແລະ ໃຫ້ຄໍາໝັ້ນ​ສັນຍາ​ວ່າຈະສືບ​ຕໍ່​ພາກພຽນ​ພະຍາຍາມສຶກສາ​ຮ່ຳຮຽນ ​ແລະ ​ເຄື່ອນ​ໄຫວ​ເພື່ອ​ປະກອບສ່ວນເຂົ້າໃນການ​ປົກ​ປັກ​ຮັກສາ ​ແລະ ​ເພີ່ມ​ພູນ​ຄູນ​ສ້າງ​ສາຍ​ພົວພັນ​ມິດຕະພາບ​ທີ່​ເປັນ​ມູນ​ເຊື້ອ​ແບບ​ພິ​ເສດ​ລະ​ຫວ່າງ ລາວ - ຫວຽດນາມ;  ຫວຽດ​ນາມ - ລາວ ໄວ້ໃຫ້ໝັ້ນຄົງຕະຫລອດກາລະນານ.

ສະ​ຖານ​ກົງ​ສຸນ​ໃຫຍ່ ແຫ່ງ ສ​ປ​ປ ລາວ ປະ​ຈຳ ນະ​ຄອນ​ດາ​ນັງ ສ​ສ ຫວຽດ​ນາມ