ໃນວັນທີ 13 ພະຈິກ 2024, ທີ່ ນະຄອນຫຼວງວຽງຈັນ, ສປປ ລາວ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ເປັນປະທານ ແລະ ເຈົ້າພາບ. ກອງປະຊຸມເວທິີປຶກສາຫາລືທາງທະເລອາຊຽນແບບເປີດກວ້າງ ຄັ້ງທີ 12 ໄດ້ມີຜູ້ເຂົ້າຮ່ວມຈາກບັນດາປະເທດເຂົ້າຮ່ວມກອງປະຊຸມສຸດຍອດອາຊີຕາເວັນອອກ ຫລື ອີເອເອສ, ຕີມໍແລັດສະເຕ ແລະ ກອງເລຂາອາຊຽນເຂົ້າຮ່ວມ. ນອກຈາກນີ້, ກໍ່ມີຜູ້ຕາງໜ້າຈາກອັງກິດ ເຂົ້າຮ່ວມສັງເກດການ.

ກອງປະຊຸມ ໄດ້ປຶກສາຫາລືກ່ຽວກັບການເພີ່ມທະວີການຮ່ວມມືທາງທະເລພາຍຫຼັງ ການນຳສະເໜີຈາກຜູ້ຊ່ຽວຊານທາງທະເລ ຈາກປະເທດສະມາຊິກອາຊຽນ ແລະ ຄູ່ເຈລະຈາ ໃນຫົວຂໍ້ຕ່າງໆ ເປັນຕົ້ນ ແມ່ນການຮ່ວມມືເພືື່ອຮັດແໜ້ນການເຊື່ອມຈອດດ້ານຄົມມະນາຄົມ​ທາງບົກ, ທາງ​ທະ​ເລ ແລະ ທາງນໍ້າ ເພື່ອ​ອຳນວຍ​ຄວາມ​ສະດວກ​ດ້ານ​ການ​ຄ້າ ​ແລະ ການ​ຂົນ​ສົ່ງ​ໃນ​ພາກ​ພື້ນ ​ແລະ ນອກພາກພື້ນ; ຄວາມເຂັ້ມແຂງທາງດ້ານລະບົບນິເວດທາງທະເລ ໂດຍສະເພາະສຶກສາກ່ຽວກັບຂໍ້ລິເລີ່ມເພື່ອເປັນການປົກປ້ອງສິ່ງແວດລ້ອມທາງທະເລ, ລວມ​ທັງ​ສິ່ງເສດ​ເຫຼືອ​ໃນ​ທະ​ເລ ​ແລະ​ ມົນ​ລະ​ພິດ​​. ພ້ອມນັ້ນ, ກອງປະຊຸມ ຈະໄດ້​ປຶກສາ​ຫາລື​ການຮັດແໜ້ນການຮ່ວມມືກ່ຽວ​ກັບ​ເສດຖະກິດ​ສີຟ້າ ​ແລະ ຊຸກຍູ້​ການ​ເຕີບ​ໂຕ​ທາງດ້ານເສດຖະກິດ​ພາກ​ພື້ນ ແບບ​ຍືນ​ຍົງ.