ໃນວັນທີ 05 ພະຈິກ 2024, ຢູ່ທີ່ ວັງແກຼມແລງ, ນະຄອນຫລວງ ມົດສະກູ, ສະຫະພັນ ຣັດເຊຍ, ທ່ານ ສີພັນດອນ ອ້ອຍບົວບຸດດີ ໄດ້ເຂົ້າຍື່ນສານຕາຕັ້ງ ຕໍ່ ພະນະທ່ານ ວາລາດີເມຍ ວາລາດີເມຍໂຣວິຈ ປູຕິນ, ປະທານາທິບໍດີ ແຫ່ງ ສະຫະພັນ ຣັດເຊຍ ເພື່ອດໍາລົງຕໍ່າແໜ່ງເປັນເອກອັກຄະຖະທູດ ວິສາມັນ ຜູ້ມີອຳນາດເຕັມ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳ ປະເທດ ສະຫະພັນ ຣັດເຊຍ.

ທ່ານ ເອກອັກຄະລັດຖະທູດ ສີພັນດອນ ອ້ອຍບົວບຸດດີ ໄດ້ຮ່ວມກັບບັນດາທ່ານທູດຕ່າງປະເທດ ລວມທັງໝົດ 28 ທ່ານ ທີ່ເຂົ້າຮ່ວມໃນພິທີຍື່ນສານຕາຕັ້ງ ໃນຄັ້ງນີ້. ພາຍຫລັງ ດໍາເນີນການຍື່ນສານຕາຕັ້ງແລ້ວ ທ່ານປະທານາທິບໍດີ ປູຕິນ ໄດ້ໃຫ້ກຽດມີຄໍາເຫັນຕໍ່ບັນດາທ່ານເອກອັກຄະລັດຖະທູດ, ໄດ້ສະແດງຄວາມຊົມເຊີຍຕໍ່ບັນດາທ່ານເອກອັກຄະລັດຖະທູດ ທີ່ໄດ້ຮັບການແຕ່ງຕັ້ງເປັນເອກອັກຄະລັດຖະທູດ ມາປະຈໍາ ຢູ່ ສະຫະພັນ ຣັດເຊຍ ເພື່ອມາປະຕິບັດໜ້າທີ່ການທູດອັນສົມກຽດ, ເຊິ່ງເປັນພາລະກິດທີ່ສໍາຄັນ ແລະ ມີຄວາມຮັບຜິດຊອບ ໃນການເສີມຂະຫຍາຍ ຮັດແໜ້ນສາຍພົວພັນມິດຕະພາບ ແລະ ການຮ່ວມມື ກັບ ສ. ຣັດເຊຍ ໃນດ້ານການເມືອງ, ເສດຖະກິດ, ດ້ານມະນຸດສະທຳ ແລະ ໃນຂົງເຂດວຽກງານດ້ານອື່ນໆ. ທ່ານ ປູຕິນ ໄດ້ຍົກໃຫ້ເຫັນນະໂຍບາຍຂອງຣັດເຊຍ ທີ່ຍາມໃດ​ກໍ​ເປີດ​ກວ້າງ​ການພົວພັນ​ຮ່ວມ​ມືກັບທຸກປະເທດ ບົນພື້ນຖານ​ຕ່າງ​ຝ່າຍ​ຕ່າງ​ມີ​ຜົນ​ປະ​ໂຫຍ​ດຮ່ວມກັນ ໂດຍ​ບໍ່​ໄດ້ຈໍາແນກ ແລະ ບົນຫຼັກການ​ສະ​ເໝີ​ພາບ, ບໍ່​ແຊກ​ແຊງ​ເຂົ້າ​ວຽກ​ງານ​ພາຍ​ໃນຂອງກັນແລະກັນ ​ແລະ ​ຍຶດໝັ້ນ​ກົດໝາຍ​ສາກົນ​ຢ່າງ​ເຂັ້ມ​ງວດ. ຣັດເຊຍ​ ຢືນ​ຢັນ​ ໃນການ​ສ້າງ​ລະ​ບົບ​ການ​ພົວ​ພັນທາງດ້ານ​ເສດ​ຖະ​ກິດ​ໂລກ​ທີ່ມີຄວາມຍຸ​ຕິ​ທຳ, ປັດສະ​ຈາກ​ການ​ແຂ່ງ​ຂັນ​ທີ່​ບໍ່​ເປັນ​ທຳ, ການ​ລົງ​ໂທດຕາມລໍາພັງ​ຝ່າຍ​ດຽວ ແລະ ຂໍ້​ຈຳ​ກັດທີ່ມີທ່າແຮງຈູງໃຈ​ທາງ​ການ​ເມືອງ. ຣັດ​ເຊຍ ​ເຂົ້າ​ຮ່ວມ​ຢ່າງ​ຕັ້ງໜ້າ​ໃນ​ເວທີ​ສາກົນ ​ແລະ ດຳ​ເນີນ​ນະ​ໂຍບາຍ​ການ​ຕ່າງປະ​ເທດ​ທີ່​ມີ​ລັກສະນະ​ສ້າງສັນ​ ໂດຍຄໍານຶງ​ເຖິງ​ຜົນ​ປະ​ໂຫຍ​ດຂອງ​ຊາດ ​ແລະ ແນວໂນ້ມຈຸດປະສົງ​ການ​ພັດທະນາ​ຂອງ​ໂລກ. ພ້ອມດຽວກັນນີ້ ທ່ານ ກໍ່ໄດ້ຍົກໃຫ້ເຫັນການຮ່ວມມືໃນຂອບ BRICS ໂດຍປະຂອບມີຄູ່​ຮ່ວມ​​ທີ່​ມາ​ຈາກ​ບັນ​ດາ​ປະ​ເທດ​ໃນ​ຂົ້ວ​ໂລກ​​ໃຕ້ ແລະ ຕາເວັນ​ອອກ​ ໃນ​ຮູບ​ແບບ “BRICS plus”. ການເປັນເຈົ້າພາບ ແລະ ເປັນປະທານກອງປະຊຸມສຸດຍອດກຸ່ມ BRICS ຢູ່ ເມືອງກາຊານ, ສະຫະພັນ ຣັດເຊຍ ໄດ້ກາຍເປັນຄວາມສຸດຍອດໃນກຸ່ມ ແລະ ເປັນເຫດການສໍາຄັນຂອງໂລກ. ຄວາມຫຼາກຫຼາຍ ທາງດ້ານອາລິຍະທໍາ, ການປະສົມປະສານທີ່ເປັນເອກະລັກຂອງປະເພນີປະຈໍາຂອງແຕ່ລະຊາດ ແລະ ຮູບແບບການພັດທະນາ, ຊຶ່ງບໍ່ຕ້ອງສົງໃສເລີຍວ່າຄວາມເຂັ້ມແຂງ, ສັກກະຍາພາບມະຫາສານທີ່ໜ້າດຶງດູດໃຈ ແລະ ທ່າແຮງອັນໃຫຍ່ຫຼວງຂອງກຸ່ມ BRICS ແມ່ນແນ່ນອນ, ບົດບາດ​ຂອງ​ປະຊາຄົມ BRICS ​ໃນ​ວຽກ​ງານ​ສາກົນ ​ແລະ ອຳນາດ​ໜ້າທີ່​ຂອງ​ຕົນ ສືບ​ຕໍ່ແຂ່ງແກ່ນ​ເພີ່ມ​ທະວີຂື້ນ. ວິ​ໄສ​ທັດ​ຍຸດ​ທະ​ສາດ​ຂອງ​ບັນ​ດາ​ຜູ້​ເຂົ້າ​ຮ່ວມ BRICS ສຳ​ລັບ​ໂລກ​ຫຼາຍ​ຂົ້ວ​ໃນ​ອະ​ນາ​ຄົດ​ທີ່​ຕອບ​ສະ​ໜອງ​ຄວາມ​ມຸ່ງ​ມາດ​ປາດ​ຖະ​ໜາ​ຂອງ​ບັນ​ດາ​ປະ​ເທດ“ປະ​ຊາ​ຄົມ​ໂລກ” ໄດ້​ຖືກ​ບັນ​ທຶກ​ໄວ້​ໃນ​ຖະ​ແຫຼງ​ການ Kazan ທີ່​ໄດ້​ຮັບ​ຮອງເອົາ​ໃນ​ທີ່ກອງ​ປະ​ຊຸມ. ຜົນໄດ້ຮັບທີ່ສໍາຄັນຂອງກອງປະຊຸມ BRICS ຢູ່ ກາຊານ ແມ່ນການຈັດຕັ້ງປະເພດໃຫມ່-"ປະເທດຄູ່ຮ່ວມ". ບັນຊີລາຍຊື່ຂອງປະເທດຜູ້ສະໝັກທີ່ມີສັກກະຍະພາບ  ໄດ້ຮັບການຕົກລົງເຊັ່ນກັນ ແລະ ຈະສົ່ງຄໍາເຊີນທີ່ເໝາະສົມ, ເມື່ອໄດ້ຮັບຄໍາຕອບໃນທາງບວກ ປະເທດເຫຼົ່ານັ້ນຈະໄດ້ຮັບສະຖານະເປັນຫຸ້ນສວນຂອງກຸ່ມ BRICS.

ນອກນັ້ນ, ທ່ານ ປູຕິນ ໄດ້ຊີ້ແຈງເຖີງທັດສະນະ ແລະ ນະໂຍບາຍ ຂອງຣັດເຊຍ ກ່ຽວກັບ ບັນຫາ ອູກຣາອິນ ແລະ ປາແລັດສະຕິນ-ອິດສະລາແອນ ຢ່າງຕົງໄປຕົງມາ ແລະ ຈະແຈ້ງຊັດເຈນ ເຊີ່ງທ່ານກ່າວວ່າ : ມີແນວໂນ້ມທີ່ໜ້າຕົກໃຈ ຕໍ່ຄວາມຂັດແຍ່ງເກົ່າ ແລະ ມີຂໍ້ຂັດແຍ່ງໃໝ່ ເກີດຂື້ນ. ຣັດເຊຍ ໄດ້ມີຄວາມພຽບພ້ອມສໍາລັບການເຈລະຈາ ກັບ ອູກຣາອິນ ມາແຕ່ເລີ່ມຕົ້ນທີ່ມີຄວາມຂັດແຍ່ງເກີດຂື້ນ ແລະ ຣັດເຊຍໄດ້ມີການດໍາເນີນການເຈລະຈາມາແຕ່ຕົ້ນ ແລະ ຂໍ້ຕົກລົງກໍ່ເປັນທີ່ຍອມຮັບຮ່ວມກັນກັບອູກຣາອິນ ແລະ ໄດ້ຮັບການພັດທະນາໂດຍຝ່າຍອູກຣາອິນເປັນຜູ້ລິເລີ່ມ, ແຕ່ຝ່າຍ​ອູກຣາອິນໄດ້ປະຕິ​ເສດ​ຂໍ້​ຕົກລົງ​ດັ່ງກ່າວ-ປະຕິບັດຕາມ​ຄຳ​ແນະນຳ​ຈາກ​ພາຍ​ນອກ.

ຣັດເຊຍ ກໍາລັງພະຍາຍາມຢ່າງແຂງແຮງ ແລະ ຕັ້ງໜ້າເພື່ອປ້ອງກັນບໍ່ໃຫ້ຄວາມຂັດແຍ່ງ ລະຫວ່າງ ປາແລັດສະຕິນ-ອິດສະລາແອນ ທະວີຄວາມຮຸນແຮງເພີ່ມຂື້ນ ໃນປະຈຸບັນ ເພື່ອບໍ່ໃຫ້ກາຍເປັນສົງຄາມໃຫ່ຍໃນຕາເວັນອອກກາງ. ເຊື່ອໝັ້ນວ່າ ທຸກຝ່າຍຈະກັບຄືນໄປສູ່ເສັ້ນທາງແຫ່ງຄວາມປອງດອງກັນ ແລະ ບັນລຸຂໍ້ຕົກລົງທີ່ຢັ້ງຢືນແລະໄລຍະຍາວ ແລະ ບົນພື້ນຖານ ການຮັບຮູ້ທາງກົດໝາຍລະຫວ່າງປະເທດທີ່ເປັນທີ່ຍອມຮັບເທົ່ານັ້ນ ແລະ ເງື່ອນໄຂສໍາຄັນໃນການຟື້ນຟູສັນຕິພາບຢູ່ພາກພື້ນ ນັ້ນຄືການດໍາເນີນການຕາມ "ສູດສອງລັດ", ຊຶ່ງໄດ້ຮັບການຮັບຮອງເອົາໂດຍມະຕິຂອງສະພາຄວາມໝັ້ນຄົງ ແລະ ກອງປະຊຸມສະມັດຊາໃຫ່ຍສະຫະປະຊາຊາດ.  

ຣັດເຊຍ ມີຄວາມມຸ້ງໝັ້ນພົວພັນຮ່ວມມືກັບປະເທດທີ່ເປັນມິດ, ການຮ່ວມມືກັບປະເທດເຫຼົ່ານັ້ນແມ່ນຫຼາກຫຼາຍຮູບແບບ, ມີຜົນປະໂຫຍດຮ່ວມກັນ, ເປັນຄູ່ຮ່ວມມືຢ່າງແທ້ຈິງ, ແລະໄດ້ຮັບການກໍ່ສ້າງບົນພື້ນຖານ ການເຄົາລົບຜົນປະໂຫຍດ ແລະ ອະທິປະໄຕ ຂອງກັນ ແລະ ກັນ. ຣັດເຊຍ ຈະສືບຕໍ່ຊຸກຍູ້ການພົວພັນຮ່ວມມືສອງຝ່າຍ ໃນດ້ານ ການເມືອງ, ເສດຖະກິດ, ມະນຸດສະທຳ, ໃນຂົງເຂດວັດທະນະທຳ, ກິລາ ແລະ ການສຶກສາ ຢ່າງເປັນປົກກະຕິ ກັບປະເທດຄູ່ຮ່ວມ ແລະ ປະເທດເພື່ອນມິດຍຸດທະສາດເຫຼົ່ານັ້ນ.

ໃນພິທີການຍື່ນສານຕາຕັ້ງ ຕໍ່ປະທານາທິບໍດີ ວາລາດີເມຍ ວາລາດີເມຍໂຣວິຈ ປູຕິນ ຂອງບັນດາທ່ານທູດຕ່າງປະເທດ ປະຈໍາ ສ.ຣັດເຊຍ ໃນຄັ້ງນີ້ ໄດ້ເລີ່ມແຕ່ເວລາ 13 ໂມງ ຫາ 14 ໂມງ ຂອງວັນທີ 5 ພະຈິກ 2024, ເຊິ່ງດໍາເນີນໄປດ້ວຍບັນຍາກາດອັນດີ, ມີຄວາມເຂັ້ມງວດສູງທາງດ້ານຄວາມປອດໄພ-ພິທີການ ແລະ ການໃຫ້ກຽດຕໍ່ບັນດາທ່ານທູດ.