ໃນຕອນເຊົ້າຂອງວັນທີ 28 ສິງຫາ 2024, ສະຫາຍ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ນຳພາຄະນະໄປອວຍພອນ ສະຫາຍ ຟານ ມິງ ຈ້ຽນ, ອຸປະທູດຊົ່ວຄາວ ແຫ່ງ ສສ ຫວຽດນາມ ປະຈໍາ ສປປ ລາວ, ເນື່ອງໃນໂອກາດວັນຊາດ ສາທາລະນະລັດ ສັງຄົມນິຍົມ ຫວຽດນາມ ຄົບຮອບ 79 ປີ (02/09/1945-02/09/2024)  ແລະ ວັນການທູດຫວຽດນາມ ຄົບຮອບ 79 ປີ (28/08/1945-28/08/2024), ທີ່ ສະຖານເອກອັກຄະລັດຖະທູດ ແຫ່ງ ສສ ຫວຽດນາມ ປະຈໍາ ສປປ ລາວ.

ໃນໂອກາດນີ້, ສະຫາຍ ຮອງລັດຖະມົນຕີ ໂພໄຊ ໄຂຄຳພິທູນ ໄດ້ຕາງໜ້າໃຫ້ຄະນະພັກ-ຄະນະນໍາ ແລະ ພະນັກງານກະຊວງການຕ່າງປະເທດ ແຫ່ງ ສປປ ລາວ ສະແດງຄວາມຊົມເຊີຍ ແລະ ອວຍພອນ ສະຫາຍ ຟານ ມິງ ຈ້ຽນ ພ້ອມດ້ວຍພະນັກງານສະຖານທູດທຸກສະຫາຍ ແລະ ຜ່ານສະຫາຍ ໄປຍັງຄະນະພັກ-ຄະນະນໍາ ແລະ ພະນັກງານກະຊວງການຕ່າງປະເທດ ກໍຄືການນໍາພັກ-ລັດ ຂອງຫວຽດນາມ, ຊຶ່ງຫຼາຍກວ່າເຈັດທົດສະວັດ ສະຫາຍຫວຽດນາມ ສາມາດຍາດໄດ້ຜົນສໍາເລັດອັນໃຫຍ່ຫຼວງໃນຫຼາຍດ້ານ, ​ພ້ອມທັງໄດ້ສະແດງຄວາມເຊື່ອໝັ້ນຢ່າງໜັກແໜ້ນວ່າ ພາຍໃຕ້ການນໍາພາອັນສະຫຼາດສ່ອງໃສຂອງພັກກອມມູນິດຫວຽດນາມ ໂດຍມີ ສະຫາຍ ໂຕ ເລີມ ເປັນຜູ້ນໍາພານັ້ນ, ສະຫາຍຫວຽດນາມ ຈະສືບຕໍ່ໄດ້ຮັບຜົນສໍາເລັດອັນໃໝ່ໃຫຍ່ຫຼວງກວ່າເກົ່າ ໃນການຈັດຕັ້ງ ແລະ ຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XIII ຂອງພັກກອມມູນິດຫວຽດນາມ, ບັນລຸຈຸດໝາຍແຫ່ງການສ້າງ ສສ ຫວຽດນາມ ໃຫ້ເປັນປະເທດອຸດສາຫະກໍາຕາມທິດທັນສະໄໝໃຫ້ສໍາເລັດ, ໂດຍກໍານົດເປົ້າໜາຍ ແລະ ທິດທາງຍຸດທະສາດຮອດປີ 2030 ແລະ ວິໄສທັດ ຮອດປີ 2045 ເພື່ອເຮັດໃຫ້ປະເທດຫວຽດນາມ ກາຍເປັນປະເທດທີ່ທັນສະໄໝ ແລະ ມີລາຍຮັບສູງ.

ພ້ອມນີ້, ສະຫາຍ ຮອງລັດຖະມົນຕີ ໂພໄຊ ໄຂຄຳພິທູນ ໄດ້ສະແດງຄວາມຊົມເຊີຍ ຕໍ່ຜົນສຳເລັດ ທີ່ຂະແໜງການຕ່າງປະເທດຫວຽດນາມ ຍາດມາໄດ້ຕະຫຼອດໄລຍະ 79 ປີຜ່ານມາ, ຊຶ່ງເປັນຂະແໜງການນໍາໜ້າພາທາງທີ່ເຂັ້ມແຂງ ແລະ ມີການວາງນະໂຍບາຍທີ່ຖືກຕ້ອງຕາມແຕ່ລະໄລຍະ ອັນເຮັດໃຫ້ບົດບາດ, ຊື່ສຽງ ແລະ ອິດທິພົນຂອງຫວຽດນາມ ນັບມື້ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ, ປະກອບສ່ວນອັນສໍາຄັນໃຫ້ແກ່ການພັດທະນາເສດຖະກິດ-ສັງຄົມ ຂອງ ສສ ຫວຽດນາມ ໃຫ້ຂະຫຍາຍຕົວ ແລະ ພັດທະນາຢ່າງບໍ່ຢຸດຢັ້ງ ແລະ ໄດ້ຕີລາຄາສູງ ຕໍ່ການຊ່ວຍເຫຼືອຢ່າງທັນການ ແລະ ມີຄຸນຄ່າຂອງສະຫາຍຫວຽດນາມຕໍ່ ສປປ ລາວ ໃນໄລຍະຜ່ານມາ ບໍ່ວ່າໃນສະໄໝຕໍ່ສູ້ກູ້ຊາດ ກໍຄືໃນໄລຍະສ້າງສາ ແລະ ພັດທະນາປະເທດຊາດໃນປັດຈຸບັນ, ພ້ອມທັງໄດ້ສະແດງຄວາມຊົມເຊີຍ ຕໍ່ການຮ່ວມມື ແລະ ປະກອບສ່ວນອັນສໍາຄັນຂອງ ສະຖານທູດຫວຽດນາມ ໃນການປະສານງານ ແລະ ອຳນວຍຄວາມສະດວກດ້ານຕ່າງໆໃນໄລຍະຜ່ານມາ, ເຮັດໃຫ້ການ ເຄື່ອນໄຫວຢ້ຽມຢາມ ແລະ ການຮ່ວມມືສອງຝ່າຍລະຫວ່າງ ລາວ-ຫວຽດນາມ ໄດ້ຮັບຜົນສຳເລັດຢ່າງຈົບງາມ, ລວມທັງການປະກອບສ່ວນຊຸກຍູ້ໃຫ້ຫຼາຍໂຄງການຮ່ວມມືສອງຝ່າຍມີຄວາມຄືບໜ້າເປັນກ້າວໆ, ຫຼາຍໂຄງການກໍໄດ້ເຮັດສຳເລັດ ແລະ ເປີດນຳໃຊ້ຢ່າງມີປະສິດທິຜົນ, ຊຶ່ງປະກອບສ່ວນເຂົ້າໃນການເສີມຂະຫຍາຍ ສາຍພົວພັນມິດຕະພາບອັນຍິ່ງໃຫຍ່ ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ຫວຽດນາມ-ລາວ.

ໃນໂອກາດດຽວກັນນີ້, ສະຫາຍ ຟານ ມິງ ຈ້ຽນ ໄດ້ສະແດງຄວາມຂອບໃຈຢ່າງຈິງໃຈ ຕໍ່ຄໍາອວຍພອນອັນປະເສີດ, ຄໍາຊົມເຊີຍ ແລະ ຄໍາເວົ້າອັນຈົບງາມຂອງ ສະຫາຍ ຮອງລັດຖະມົນຕີ ໂພໄຊ ໄຂຄຳພິທູນ ແລະ ຄະນະຈາກກະຊວງການຕ່າງປະເທດລາວ ທີ່ມາອວຍພອນໃນຄັ້ງນີ້, ພ້ອມທັງສະແດງຄວາມຢືນຢັນວ່າ ສະຖານທູດ ກໍຄື ກະຊວງການຕ່າງປະເທດຫວຽດນາມ ຈະສືບຕໍ່ຮັກສາມູນເຊື້ອການພົວພັນອັນສະໜິດແໜ້ນ ກັບກະຊວງການຕ່າງປະເທດລາວ ເພື່ອຮ່ວມກັນຈັດຕັ້ງຜັນຂະຫຍາຍບັນດາວຽກງານທີ່ຂັ້ນເທິງໄດ້ຕົກລົງຮ່ວມກັນແລ້ວນັ້ນ ໃຫ້ປະກົດຜົນເປັນຈິງ, ມີປະສິດທິພາບ ແລະ ປະສິດທິຜົນ ເພື່ອນໍາເອົາຜົນປະໂຫຍດສູງສຸດມາສູ່ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ.