27/11/2024
ໃນຕອນເຊົ້າຂອງ ວັນທີ 26 ພະຈິກ 2024, ທີ່ກະຊວງການຕ່າງປະເທດ ໄດ້ຈັດພິທີມອບ-ຮັບໜ້າທີ່ ການນຳຂັ້ນສູງ ຂອງກະຊວງການຕ່າງປະເທດ ລະຫວ່າງ ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ເລຂາຄະນະພັກກະຊວງ, ຮອງນາຍົກລັດຖະມົນຕີ, ລັດຖະມົນຕີກະຊວງການຕາງປະເທດ (ຜູ້ເກົ່າ) ແລະ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ, ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ (ຜູ້ໃໝ່) ໂດຍການເປັນປະທານຂອງ ສະຫາຍ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ມີບັນດາ ຮອງລັດຖະມົນຕີ, ຫົວໜ້າກົມ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຄະນະພົວພັນຕ່າງປະເທດສູນກາງພັກ ພ້ອມດ້ວຍພະນັກງານ-ລັດຖະກອນ ຂອງກະຊວງການຕ່າງປະເທດເຂົ້າຮ່ວມ.
ໂອກາດນີ້, ສະຫາຍ ທອງຈັນ ໂຂງພູມຄຳ, ຮອງຫົວໜ້າຄະນະຈັດຕັ້ງສູນກາງພັກ ຕາງໜ້າໃຫ້ຄະນະຈັດຕັ້ງສູນກາງພັກ ໄດ້ຂຶ້ນຜ່ານ ລັດຖະດຳລັດຂອງປະທານປະເທດ ວ່າດ້ວຍ ການຍົກຍ້າຍສະມາຊິກຂອງລັດຖະບານ ໂດຍຍົກຍ້າຍ ສະຫາຍ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ໄປຮັບໜ້າທີ່ ຮອງນາຍົກລັດຖະມົນຕີ ຢູ່ສຳນັກງານນາຍົກລັດຖະມົນຕີ ແລະ ຜ່ານມະຕິຂອງ ກົມການເມືອງສູນກາງພັກ ແລະ ລັດຖະດຳລັດຂອງປະທານປະເທດ ວ່າດ້ວຍ ການແຕ່ງຕັ້ງ ສະຫາຍ ທອງສະຫວັນ ພົມວິຫານ, ກຳມະການສູນກາງພັກ ເປັນ ເລຂາຄະນະພັກກະຊວງ, ລັດຖະມົນຕີກະຊວງການຕ່າງປະເທດ. ໃນພິທີດັ່ງກ່າວ, ສະຫາຍ ສະເຫຼີມໄຊ ກົມມະສິດ ໄດ້ສະຫຼຸບຜົນງານການເຄື່ອນໄຫວການນໍາພາ-ຊີ້ນຳໄລຍະ 9 ປີກວ່າ ທີ່ຜ່ານມາ ໃນຖານະເປັນລັດຖະມົນຕີກະຊວງການຕ່າງປະເທດ ໂດຍຍົກໃຫ້ເຫັນຜົນສຳເລັດໃນຫຼາຍດ້ານ ໃນການເຮັດໜ້າທີ່ເປັນເສນາທິການໃຫ້ແກ່ລັດຖະບານຢ່າງລວມສູນໃນວຽກງານການຕ່າງປະເທດ ທັງໃນຂອບສອງຝ່າຍ ແລະ ຫຼາຍຝ່າຍ ລວມທັງການເຮັດໜ້າທີ່ ເປັນປະທານອາຊຽນ ເຖິງ 2 ຄັ້ງ ຄື: ປີ 2016 ແລະ 2024, ເຊິ່ງເປັນການປະກອບສ່ວນຢ່າງຕັ້ງໜ້າເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ເຮັດໃຫ້ບົດບາດຂອງ ສປປ ລາວ ສູງເດັ່ນຂື້ນເປັນກ້າວໆມາ ແລະ ສະຫາຍ ສະເຫລີມໄຊ ໄດ້ສະແດງຄວາມຂອບໃຈຕໍ່ການນຳ ພັກ-ລັດ ທີ່ສືບຕໍ່ໃຫ້ຄວາມເຊື່ອຫມັ້ນ ແລະ ໄວ້ວາງໃຈ ມອບໝາຍໜ້າທີ່ໃໝ່ຂອງລັດຖະບານ ໃນຖານະເປັນ ຮອງນາຍົກລັດຖະມົນຕີ ເພື່ອນຳພາ-ຊີ້ນຳ ວຽກລວມຂອງລັດຖະບານ ຕາມການມອບໝາຍ. ຈາກນັ້ນ, ສະຫາຍ ທອງສະຫັວນ ພົມວິຫານ ໄດ້ຂຶ້ນກ່າວຮັບໜ້າທີ່ໃຫມ່ ໂດຍຕີລາຄາສູງຕໍ່ຜົນສຳເລັດຂອງ ກະຊວງການຕ່າງປະເທດ ໃນໄລຍະຜ່ານມາ ພາຍໃຕ້ການນຳພາ-ຊີ້ນຳຂອງ ສະຫາຍລັດຖະມົນຕີກະຊວງການຕ່າງປະເທດຜູ້ເກົ່າ ແລະ ໄດ້ໃຫ້ຄຳໝັ້ນສັນຍາວ່າ ຈະອຸທິດເຫື່ອແຮງ ແລະ ສະຕິປັນຍາສືບຕໍ່ປະຕິບັດໜ້າທີ່ເປັນເສານາທິການໃຫ້ແກ່ລັດຖະບານໃນວຽກງານການຕ່າງປະເທດ ເພື່ອປະຕິບັດແນວທາງການຕ່າງປະເທດ ໃຫ້ໄດ້ຮັບຜົນສຳເລັດ ແລະ ມີບາດກ້າວຂະຫຍາຍຕົວຍິ່ງໆຂື້ນໄປ.
ໃນໂອກາດນີ້, ສະຫາຍ ສອນໄຊ ສີພັນດອນ, ກໍາມະການກົມການເມືອງສູນກາງພັກ, ນາຍົກລັດຖະມົນຕີ ທີ່ໄດ້ຕາງໜ້າໃຫ້ກົມການເມືອງສູນກາງພັກ ເຂົ້າຮ່ວມພິທີດັ່ງກ່າວ, ໄດ້ສະແດງຄວາມຍິນດີ, ຊົມເຊີຍ ແລະ ຕີລາຄາສູງຕໍ່ບັນດາຜົນງານອັນພົ້ນເດັ່ນຂອງວຽກງານການຕ່າງປະເທດຍາດມາໄດ້ ໃນໄລຍະ ຫລາຍກວ່າ 9 ປີ ຜ່ານມາ ໂດຍພາຍໃຕ້ການ ນຳພາ-ຊີ້ນຳ ຂອງ ສະຫາຍ ສະເຫລີມໄຊ ກົມມະສິດ, ທີ່ເປັນລັດຖະມົນຕີກະຊວງການຕ່າງປະເທດ, ເຖິງແມ່ນວ່າສະພາບການພາກພື້ນ ແລະ ສາກົນ ໄດ້ສືບຕໍ່ຜັນແປໄປຢ່າງສັບສົນ ແລະ ສະຫຼັບສັບຊ້ອນ ແຕ່ໂດຍພາຍໃຕ້ການນຳພາ-ຊີ້ນຳອັນເຂັ້ມແຂງຂອງ ສະຫາຍ ລັດຖະມົນຕີ ສະເຫລີມໄຊ ກົມມະສິດ ໄດ້ເຮັດໃຫ້ຂະແໜງການຕ່າງປະເທດ ສາມາດເຮັດສຳເລັດໜ້າທີ່ການເມືອງອັນໜັກໜ່ວງຂອງຕົນ ແລະ ຍາດມາໄດ້ຜົນງານທີ່ພົ້ນເດັ່ນຫຼາຍດ້ານ ເຊິ່ງສະແດງອອກ ໃຫ້ເຫັນ ການພົວພັນຮ່ວມມືກັບສາກົນນັບມື້ນັບກ້ວາງຂວາງ ແລະ ເຂົ້າສູ່ລ່ວງເລິກ. ພິເສດ, ແມ່ນການເຮັດໜ້າທີ່ ການເປັນປະທານອາຊຽນ ຂອງ ສປປ ລາວ 2 ຄັ້ງ ຄື: ປີ 2016 ແລະ 2024 ທີ່ໄດ້ຮັບຜົນສຳເລັດຢ່າງຈົບງາມ. ຜົນສຳເລັດທັງໝົດນັ້ນ, ໄດ້ປະກອບສ່ວນອັນສຳຄັນເຂົ້າໃນການສ້າງສະພາບແວດລ້ອມພາຍນອກທີ່ເອື້ອອຳນວຍໃຫ້ແກ່ການປົກປັກຮັກສາ ແລະ ສ້າງສາພັດທະນາປະເທດຊາດ, ເຮັດໃຫ້ລະບອບການເມືອງມີສະຖຽນລະພາບ, ສັງຄົມມີຄວາມສະຫງົບປອດໄພ ແລະ ເສດຖະກິດ ໄດ້ຮັບການພັດທະນາເຕີບໃຫຍ່ເຂັ້ມແຂງຂຶ້ນເປັນກ້າວໆ ອັນເປັນພື້ນຖານທີ່ໜັກແໜ້ນໃຫ້ແກ່ການເຊື່ອມໂຍງກັບພາກພື້ນ ແລະ ສາກົນ ເຮັດໃຫ້ຖານະຊື່ສຽງຂອງ ສປປ ລາວ ໃນເວທີພາກພື້ນ ແລະ ສາກົນໄດ້ຮັບການຍົກສູງຂຶ້ນຢ່າງບໍ່ຢຸດຢັ້ງ ແລະ ເຊື່ອໝັ້ນວ່າລັດຖະມົນຕີກະຊວງການຕ່າງປະເທດຜູ້ໃຫມ່ ເຊິ່ງເຄີຍໄດ້ປະຕິບັດໜ້າທີ່ວຽກງານຢູ່ກະຊວງການຕ່າງປະເທດມາກ່ອນ ຈະພ້ອມກັນກັບໝູ່ຄະນະຍົກສູງຄວາມຮັບຜິດຊອບ, ສືບຕໍ່ເຮັດສຳເລັດໜ້າທີ່ການເມືອງ-ການຕ່າງປະເທດທີ່ພັກ-ລັດ ແລະ ປະຊາຊົນມອບໝາຍໃຫ້ຢ່າງມີຜົນສຳເລັດ.
