ໃນຕອນເຊົ້າຂອງວັນທີ 27 ພະຈິກ 2024, ທີ່ ກະຊວງການຕ່າງປະເທດ, ສະຫາຍ ທອງສະຫວັນ ພົມວິຫານ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົນທະນາທາງໂທລະສັບ ຜ່ານລະບົບທາງໄກກັບ ສະຫາຍ ບຸຍ ແທັງ ເຊີນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ.

ໃນໂອກາດດັ່ງກ່າວ, ສະຫາຍ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ບຸຍ ແທັງ ເຊີນ ໄດ້ສະແດງຄວາມຊົມເຊີຍຕໍ່ ສະຫາຍ ທອງສະຫວັນ ພົມວິຫານ ທີ່ໄດ້ຮັບການແຕ່ງຕັ້ງເປັນ ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ຄົນໃໝ່, ພ້ອມທັງໄດ້ຝາກຄໍາຢື້ຢາມຖາມຂ່າວອັນອົບອຸ່ນ ຈາກບັນດາສະຫາຍການນໍາຂອງ ສສ. ຫວຽດນາມ ເຖິງ ບັນດາການນໍາຂອງ ສປປ ລາວ ແລະ ໄດ້ອວຍພອນໄຊອັນປະເສີດ ເນື່ອງໃນໂອກາດວັນຊາດ ສປປ ລາວ ຄົບຮອບ 49 ປີ ແລະ ວັນເກີດ ປະທານ ໄກສອນ ພົມວິຫານ ຄົບຮອບ 104 ປີ ທີ່ຈະມາເຖິງນີ້.

ສອງລັດຖະມົນຕີກະຊວງການຕ່າງປະເທດ ລາວ-ຫວຽດນາມ ໄດ້ທົບທວນຄືນການພົວພັນຮ່ວມມືສອງຝ່າຍ ໃນໄລຍະຜ່ານມາ ແລະ ໄດ້ແລກປ່ຽນຄໍາຄິດເຫັນ ເພື່ອຊຸກຍູ້ການຮ່ວມມືໃນຕໍ່ໜ້າ, ໂດຍໄດ້ສະແດງຄວາມເຫັນດີເປັນເອກະພາບຮ່ວມກັນຕີລາຄາສູງຕໍ່ການພົວພັນຮ່ວມມື ລະຫວ່າງ ສອງປະເທດ ໃນຕະຫຼອດໄລຍະທີ່ຜ່ານມາ, ສະແດງອອກຄືສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງປະເທດ ນັບມື້ນັບມີການພັດທະນາເຂົ້າສູ່ລວງເລິກ ແລະ ນໍາຜົນປະໂຫຍດຢ່າງແທ້ຈິງມາສູ່ປະຊາຊົນສອງຊາດ ເວົ້າລວມ, ເວົ້າສະເພາະ ການປະສານງານ ແລະ ການຮ່ວມມື ລະຫວ່າງສອງກະຊວງການຕ່າງປະເທດ ກໍ່ນັບມື້ນັບແຫນ້ນແຟ້ນ ແລະ ມີປະສິດທິຜົນ ໂດຍສະເພາະການເປັນເສນາທິການໃຫ້ແກ່ການນໍາຂັ້ນສູງຂອງສອງປະເທດ ໃນການຊຸກຍູ້ ແລະ ຕິດຕາມການຈັດຕັ້ງປະຕິບັດຜົນການຕົກລົງຂອງການນໍາຂັ້ນສູງ. ໃນຕໍ່ໜ້າ, ສອງຝ່າຍເຫັນດີເປັນເອກະພາບຈະສືບຕໍ່ກະກຽມກອງປະຊຸມຄະນະກໍາມະການຮ່ວມມືສອງຝ່າຍ ລະຫວ່າງສອງລັດຖະບານ ຄັ້ງທີ 47 ທີ່ຈະມີຂຶ້ນໃນຕົ້ນປີ 2025, ການພົບປະລະຫວ່າງ 3 ປະມຸກລັດ 3 ປະເທດ ລາວ-ຫວຽດນາມ-ກໍາປູເຈຍ ແລະ ກອງປະຊຸມປຶກສາຫາລືດ້ານການເມືອງຂັ້ນລັດຖະມົນຕີ ລາວ-ຫວຽດນາມ ຄັ້ງທີ 11, ພ້ອມທັງສືບຕໍ່ຈັດຕັ້ງຜັນຂະຫຍາຍບົດບັນທຶກການຮ່ວມມື ລະຫວ່າງສອງກະຊວງ ໄລຍະປີ 2021-2025 ໃຫ້ປະກົດຜົນເປັນຈິງ ໂດຍສະເພາະ ວຽກງານຊາຍແດນ, ການຕ້ານການຄ້າມະນຸດ ແລະ ວຽກງານການປົກປ້ອງພົນລະເມືອງ.

ໃນຂະນະດຽວກັນ, ສະຫາຍ ລັດຖະມົນຕີກະຊວງການຕ່າງປະເທດ ທອງສະຫວັນ ພົມວິຫານ ກໍ່ໄດ້ສະແດງຄວາມຍິນດີ ແລະ ຂອບໃຈຕໍ່ຄໍາອວຍພອນອັນປະເສີດ ແລະ ຈົບງາມ, ພ້ອມທັງໄດ້ຕາງໜ້າໃຫ້ພັກ, ລັດ ແລະ ປະຊາຊົນລາວບັນດາເຜົ່າ ສະແດງຄວາມຂອບໃຈ ແລະ ຮູ້ບຸນຄຸນຕໍ່ການຊ່ວຍເຫຼືອອັນລໍ້າຄ່າ, ມີປະສິດທິພາບ ແລະ ທັນການຂອງພັກ, ລັດ ແລະ ປະຊາຊົນຫວຽດນາມອ້າຍນ້ອງ ໃນເມື່ອກ່ອນ ກໍ່ຄືໃນໄລຍະແຫ່ງການປົກປັກຮັກສາ ແລະ ສ້າງສາພັດທະນາປະເທດຊາດ ໂດຍສະເພາະການຊ່ວຍເຫຼືອ ແລະ ສະໜັບສະໜູນດ້ານຕ່າງໆ ໃຫ້ແກ່ການເປັນປະທານອາຊຽນຂອງ ສປປ ລາວ ໃນປີ 2024, ຊຶ່ງມີຜົນສໍາເລັດຢ່າງຈົບງາມ. ໃນໂອກາດນີ້, ກໍໄດ້ຖືໂອກາດອວຍພອນໃຫ້ ສະຫາຍ ບຸຍ ແທັງ ເຊີນ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສສ. ຫວຽດນາມ ພ້ອມດ້ວຍການນໍາ ແລະ ພະນັກງານກະຊວງການຕ່າງປະເທດ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນສູງສົ່ງ ແລະ ມີກຽດ ແລະ ຫວັງວ່າ ຈະໄດ້ຕ້ອນຮັບ ສະຫາຍ ບຸຍ ແທັງ ເຊີນ ໃນໂອກາດເດີນທາງມາເຂົ້າຮ່ວມກອງປະຊຸມປຶກສາຫາລືດ້ານການເມືອງ ລາວ-ຫວຽດນາມ ທີ່ ນະຄອນຫຼວງວຽງຈັນ ໃນອະນາຄົດອັນໃກ້ນີ້.