ໃນຕອນເຊົ້າຂອງວັນທີ 12 ພະຈິກ 2024, ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ, ຄະນະກຳມະການພົວພັນຄົນເຊື້ອຊາດລາວຢູ່ຕ່າງປະເທດ, ກະຊວງການຕ່າງປະເທດ ຮ່ວມກັບສູນກາງແນວລາວສ້າງຊາດ ໄດ້ຈັດກອງປະຊຸມພົບປະພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງປະຖົມມະເລີກ ພາຍໃຕ້ຫົວຂໍ້ “ຮັກບ້ານເກີດ”, ໂດຍການໃຫ້ກຽດເຂົ້າຮ່ວມເປັນປະທານຂອງ ທ່ານ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ປະທານຄະນະກຳມະການພົວພັນຄົນເຊື້ອຊາດລາວຢູ່ຕ່າງປະເທດ; ມີບັນດາການນຳພັກ-ລັດ, ເອກອັກຄະລັດຖະທູດ ແລະ ພີ່ນ້ອງເຊື້ອຊາດລາວຈາກຕ່າງປະເທດ ແລະ ພີ່ນ້ອງເຊື້ອຊາດລາວທີ່ດຳລົງຊີວິວິດ ແລະ ເຮັດທຸລະກິດຢູ່ ສປປ ລາວ ແລະ ແຂກຖືກເຊີນ ປະມານ 500 ທ່ານ ເຂົ້າຮ່ວມຢ່າງພ້ອມພຽງ.

ໃນໂອກາດນີ້, ທ່ານ ສະເຫຼີມໄຊ ກົມມະສິດ, ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ, ປະທານຄະນະກໍາມະການພົວພັນຄົນເຊື້ອຊາດລາວຢູ່ຕ່າງປະເທດ ໄດ້ໃຫ້ກຽດຂຶ້ນກ່າວມີຄຳເຫັນເປີດກອງປະຊຸມພົບປະພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງປະຖົມມະເລີກ ພາຍໃຕ້ຫົວຂໍ້ “ຮັກບ້ານເກີດ” ຢ່າງເປັນທາງການ, ເຊິ່ງຖືເປັນນິມິດໝາຍອັນສໍາຄັນ ແລະ ເປັນຄັ້ງປະຫວັດສາດບໍ່ເຄີຍມີມາກ່ອນ ມີຂຶ້ນປີທີ່ ສປປ ລາວ ມີຜົນສຳເລັດພົ້ນເດັ່ນຫຼາຍເຫດການ ເປັນຕົ້ນ ການເປັນປະທານອາຊຽນຂອງ ສປປ ລາວ ແລະ ທັງເປັນປີທ່ອງທ່ຽວລາວ ປີ 2024, ສະແດງຄວາມຊົມເຊີຍຕໍ່ບັນດາພີ່ນ້ອງຄົນເຊື້ອຊາດລາວຢູ່ຕ່າງປະເທດ ແລະ ພີ່ນ້ອງຄົນເຊື້ອຊາດລາວທີ່ດໍາລົງຊີວິດຢູ່ ສປປ ລາວ ຫຼາຍກວ່າ 400 ທ່ານ ທີ່ໄດ້ພ້ອມໃຈກັນມາເຂົ້າຮ່ວມກອງປະຊຸມຄັ້ງນີ້ ສະແດງໃຫ້ເຫັນເຖິງຄວາມສາມັກຄີຮັກແພງ ຮັກປະເທດຊາດບ້ານເກີດເມືອງນອນຂອງຕົນ. ກອງປະຊຸມນີ້ ເປັນເວທີເພື່ອສ້າງໂອກາດໃຫ້ພີ່ນ້ອງຄົນເຊື້ອຊາດລາວຢູ່ຕ່າງປະເທດ ໄດ້ມີໂອກາດຫວນມາຢ້ຽມຢາມບ້ານເກີດ ແລະ ພົບປະແລກປ່ຽນຄຳຄິດເຫັນເຊິ່ງກັນ ແລະ ກັນ, ຮັດແຫນ້ນການຮ່ວມມືລະຫວ່າງ ພີ່ນ້ອງເຊື້ອຊາດລາວທີ່ອາໄສຢູ່ຕ່າງປະເທດ, ຜູ້ທີ່ມາດຳລົງຊີວິດຢູ່ ສປປ ລາວ ແລະ ຊາວລາວຢູ່ໃນປະເທດ, ເປີດກວ້າງການເຜີຍແຜ່ຂໍ້ມູນຂ່າວສານອັນຖືກຕ້ອງເປັນຈິງ ກ່ຽວກັບສະພາບການພັດທະນາເສດຖະກິດ-ສັງຄົມຂອງ ສປປ ລາວ ໃນແຕ່ລະໄລຍະ, ສ້າງເງື່ອນໄຂອຳນວຍຄວາມສະດວກໃຫ້ແກ່ພີ່ນ້ອງເຊື້ອຊາດລາວທີ່ມີຄວາມສົນໃຈໃນການເຂົ້າມາລົງທຶນຢູ່ ສປປ ລາວ ເປັນຕົ້ນ: ການດຳເນີນທຸລະກິດຮ້ານອາຫານ, ໂຮງແຮມ, ລົງທຶນດ້ານການສຶກສາ, ກະສິກຳ ແລະ ອື່ນໆ. ປະຈຸບັນ ພີ່ນ້ອງຄົນເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ມີປະມານ 981.900 ຄົນ (ຫຼາຍກວ່າ 10% ຂອງພົນລະເມືອງລາວ) ທີ່ອາໄສຢູ່ຫຼາຍກວ່າ 18 ປະເທດໃນທົ່ວໂລກ, ເຖິງຈະຢູ່ຫ່າງໄກບ້ານເກີດເມືອງນອນ ແຕ່ກໍ່ມີຄວາມເອກອ້າງທະນົງໃຈຕໍ່ການເປັນເຊື້ອຊາດລາວ, ມີນ້ຳໃຈຮັກຊາດ ຮັກບ້ານເກີດ, ຮັກສາມູນເຊື້ອວັດທະນະທຳ ແລະ ຮີດຄອງປະເພນີອັນດີງາມ, ປະກອບສ່ວນສຳຄັນເຂົ້າໃນການສ້າງສາພັດທະນາປະເທດຊາດ ທັງທາງກົງ ແລະ ທາງອ້ອມ, ເປັນຂົວຕໍ່ສຳຄັນໃນການໂຄສະນາເຜີຍແຜ່ດ້ານວັດທະນະທຳ-ຮີດຄອງປະເພນີ, ສາສະຫນາ, ພາສາ, ພາບພົດທີ່ດີຂອງປະເທດ, ຂົນຂວາຍຍາດແຍ່ງເອົາການຊ່ວຍເຫຼືອດ້ານທຶນຮອນ, ການລົງທຶນມາສູ່ປະເທດຊາດ, ຮັດແໜ້ນການພົວພັນຕ່າງປະເທດກັບບັນດາປະເທດທີ່ເຂົາເຈົ້າດຳລົງຊີວິດຢູ່. ລັດຖະບານ ແລະ ປະຊາຊົນລາວ ໄດ້ຕີລາຄາສູງຕໍ່ການປະກອບສ່ວນຊ່ວຍເຫຼືອ ແລະ ຖືວ່າພີ່ນ້ອງເຊື້ອຊາດລາວທີ່ອາໄສຢູ່ຕ່າງປະເທດ ແມ່ນພາກສ່ວນຫນຶ່ງທີ່ສຳຄັນບໍ່ສາມາດຕັດແຍກອອກຈາກວົງຄະນະຍາດແຫ່ງຊາດລາວໄດ້, ເປັນກຳລັງແຮງທີ່ສຳຄັນອັນຫນຶ່ງໃນພາລະກິດການສ້າງສາ ແລະ ພັດທະນາປະເທດຊາດ. ຍ້ອນເຫັນໄດ້ເຖິງຄວາມສຳຄັນຂອງພີ່ນ້ອງເຊື້ອຊາດລາວຢູ່ຕ່າງປະເທດ, ລັດຖະບານ ຈຶ່ງໄດ້ມີນະໂຍບາຍເປີດກວ້າງເພື່ອຕ້ອນຮັບພີ່ນ້ອງເຊື້ອຊາດລາວຢູ່ຕ່າງປະເທດ, ເອົາໃຈໃສ່ໃນການສ້າງເງື່ອນໄຂ ແລະ ອຳນວຍຄວາມສະດວກຍິ່ງຂຶ້ນ ໂດຍກຳນົດນະໂຍບາຍຕ່າງໆ ເປັນຕົ້ນແມ່ນ ການອອກດຳລັດເລກທີ 475 ວ່າດ້ວຍ ການອອກວີຊາ ແລະ ການກໍານົດເວລາພັກເຊົາຢູ່ ສປປ ລາວ ໃຫ້ຄົນເຊື້ອຊາດລາວຢູ່ຕ່າງປະເທດ, ສືບຕໍ່ປະຕິບັດນະໂຍບາຍ ແລະ ສ້າງເງື່ອນໄຂອັນໃຫມ່ເພື່ອໃຫ້ແທດເຫມາະກັບສະພາບໃນແຕ່ລະຍຸກສະໄຫມ. ພ້ອມນັ້ນ, ທ່ານປະທານ ຍັງໄດ້ຮຽກຮ້ອງມາຍັງພີ່ນ້ອງຄົນເຊື້ອຊາດລາວຫມົດທຸກຄົນ ຈົ່ງສືບຕໍ່ເພີ່ມທະວີຄວາມສາມັກຄີຮັກແພງເຊິ່ງກັນ ແລະ ກັນ, ມີຄວາມທະນົງໃຈຕໍ່ເລືອດເນື້ອເຊື້ອຊາດລາວ, ຮັກບ້ານເກີດ, ເຄື່ອນໄຫວດຳລົງຊີວິດຢ່າງຫມັ້ນຄົງ, ສືບຕໍ່ຮັກສາຮີດຄອງປະເພນີອັນດີງາມ ແລະ ເອກະລັກດ້ານວັດທະນະທຳຂອງຊາດລາວໄວ້, ສືບຕໍ່ນຳເອົາຜົນຂອງກອງປະຊຸມຄັ້ງນີ້ ໄປຈັດຕັ້ງຜັນຂະຫຍາຍໃຫ້ເປັນຮູບປະທຳ ແລະ ມີປະສິດທິຜົນຍິ່ງຂຶ້ນ, ນຳເອົາເນື້ອໃນຈິດໃຈຂອງກອງປະຊຸມ ໄປບອກເລົ່າຖ່າຍທອດຕໍ່ຜຸ້ທີ່ບໍ່ໄດ້ມາຮ່ວມ, ປະກອບສ່ວນສ້າງສາພັດທະນາບ້ານເກີດເມືອງນອນຕາມເງື່ອນໄຂ ແລະ ຄວາມສາມາດຕົວຈິງຂອງຕົນ.

ກອງປະຊຸມຄັ້ງນີ້, ຜູ້ເຂົ້າຮ່ວມ ຍັງໄດ້ຮັບຟັງລາຍງານຈາກ ທ່ານ ບຸນເຫຼືອ ພັນດານຸວົງ, ຮອງລັດຖະມົນຕີກະຊວງການຕ່າງປະເທດ ກ່ຽວກັບ ການສັງລວມນະໂຍບາຍ ແລະ ນິຕິກຳທີ່ຈະອຳນວຍຄວາມສະດວກໃຫ້ແກ່ຄົນເຊື້ອຊາດລາວຢູ່ຕ່າງປະເທດ ແນໃສ່ສ້າງເງື່ອນໄຂທີ່ສະດວກໃຫ້ພີ່ນ້ອງຊາວລາວຢູ່ຕ່າງປະເທດ ໄດ້ຫັນຫນ້າມາຫາປະເທດຊາດບ້ານເກີດເມືອງນອນຂອງຕົນ ເພື່ອປະກອບສ່ວນດ້ານເຫື່ອແຮງ, ສະຕິປັນຍາ, ທຶນຮອນເຂົ້າໃນພາລະກິດສ້າງສາພັດທະນາປະເທດຊາດ; ແລະ ໄດ້ຮັບຟັງບົດລາຍງານຈາກ ທ່ານ ນາງ ພອນວັນ ອຸທະວົງ, ຮອງລັດຖະມົນຕີກະຊວງແຜນການ ແລະ ການລົງທຶນ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ 9 ຂອງ ສປປ ລາວ. ພ້ອມດຽວກັນນັ້ນ, ກອງປະຊຸມ ຍັງໄດ້ຮັບຟັງການລາຍງານຈາກ ຕົວແທນພີ່ນ້ອງຄົນເຊື້ອຊາດລາວຢູ່ຕ່າງປະເທດ ແລະ ຕົວແທນພີ່ນ້ອງເຊື້ອຊາດລາວທີ່ມາດຳລົງຊີວິດຖາວອນຢູ່ບ້ານເກີດ ໃນຫຼາຍຫົວຂໍ້ສຳຄັນ ຄື: 1.) ການເຕົ້າໂຮມຄວາມສາມັກຄີພີ່ນ້ອງເຊື້ອຊາດລາວຢູ່ ປະເທດຝຣັ່ງ; 2.) ການສົ່ງເສີມລູກຫຼານເຊື້ອຊາດລາວຮຽນຮູ້ ແລະ ສືບທອດພາສາ-ວັດທະນະທຳຂອງຊາດຢູ່ຕ່າງປະເທດ; 3.) ການເຕົ້າໂຮມພະສົງລາວອ້ອມຂ້າງ ອົງການພຣະສົງລາວເຖຣະວາດຢູ່ທະວີບເອີຣົບ; 4.) ກາລະໂອກາດ ແລະ ສິ່ງທ້າທາຍໃນການດຳເນີນທຸລະກິດຢູ່ ສປປ ລາວ; 5.) ທ່າແຮງ ແລະ ເງື່ອນໄຂຂອງພີ່ນ້ອງເຊື້ອຊາດລາວ ໃນການປະກອບສ່ວນສ້າງສາພັດທະນາບ້ານເກີດ; 6.) ການປະກອບສ່ວນສ້າງຊັບພະຍາກອນມະນຸດດ້ານວິຊາການຢູ່ ສປປ ລາວ. ໃນຕອນທ້າຍ, ບັນດາຜູ້ເຂົ້າຮ່ວມຍັງໄດ້ແລກປ່ຽນຄຳຄິດເຫັນ ແລະ ຍົກຂໍ້ສະເໜີຕໍ່ກອງປະຊຸມຢ່າງສ້າງສັນ ແລະ ກົງໄປກົງມາ, ເຮັດໃຫ້ເນື້ອໃນຈິດໃຈຂອງກອງປະຊຸມຄົບຖ້ວນສົມບູນ, ສາມາດເຂົ້າໃຈເຖິງສະພາບຊີວິດການເປັນຢູ່ ແລະ ຄວາມມຸ້ງມາດປາຖະຫນາຂອງພີ່ນ້ອງຊາວລາວຢູ່ຕ່າງປະເທດ ແລະ ຕົວແທນພີ່ນ້ອງເຊື້ອຊາດລາວ ທີ່ມາທໍາມາຫາກີນຢູ່ ສປປ ລາວ ໄດ້ເປັນຢ່າງດີ.

ກອງປະຊຸມພົບປະພີ່ນ້ອງເຊື້ອຊາດລາວຢູ່ຕ່າງປະເທດ ຄັ້ງປະຖົມມະເລີກນີ້ ໄດ້ດຳເນີນໄປດ້ວຍບັນຍາກາດແຫ່ງໄມຕີຈິດມິດຕະພາບອັນອົບອຸ່ນ, ມີຄວາມຟົດຟື້ນ, ສາມັກຄີຮັກແພງ, ມີເນື້ອໃນອຸດົມສົມບູນ, ຖືເປັນການໄຂສັງກາດກອງປະຊຸມຄັ້ງປະຫວັດສາດ ໃນການເຕົ້າໂຮມຄວາມສາມັກຄີເປັນນ້ຳຫນຶ່ງໃຈດຽວກັນຂອງປະຊາຊົນລາວບັນດາເຜົ່າ ບໍ່ວ່າຢູ່ພາຍໃນ ຫຼື ຕ່າງປະເທດ, ປະກອບສ່ວນກຳລັງແຮງຂອງຕົນເຂົ້າໃນການສ້າງສາພັດທະນາປະເທດຊາດ ໃຫ້ຈະເລີນຮຸ່ງເຮື່ອງຂຶ້ນເທື່ອລະກ້າວ ກໍຄື ການນຳເອົາປະເທດຊາດ ຫລຸດພົ້ນອອກຈາກສະຖານະພາບດ້ອຍພັດທະນາໃນອະນາຄົດ.