ໃນວັນທີ 12 ພະຈິກ 2024, ທີ່ ນະຄອນຫຼວງວຽງຈັນ, ສປປ ລາວ, ທ່ານ ທອງຜ່ານ ສະຫວັນເພັດ, ຮອງລັດຖະມົນຕີກະຊວງການຕ່າງປະເທດ, ຫົວໜ້າເຈົ້າໜ້າທີ່ອາວຸໂສອາຊຽນຂອງ ສປປ ລາວ ໄດ້ເປັນເຈົ້າພາບ ແລະ ປະທານກອງປະຊຸມເວທີປຶກສາຫາລືທາງທະເລອາຊຽນ ຄັ້ງທີ 14, ຊຶ່ງມີຄະນະຜູ້ແທນຈາກປະເທດສະມາຊິກອາຊຽນ ແລະ ກອງເລຂາອາຊຽນ ເຂົ້າຮ່ວມ. ສ່ວນຄະນະ ຕີມໍແລັດສະເຕ ເຂົ້າຮ່ວມ ໃນຖານະຜູ້ສັງເກດການ.

ກອງ​ປະຊຸມ​ ໄດ້​ປຶກສາ​ຫາລືກ່ຽວ​ກັບ ການເພີ່ມທະວີການຮ່ວມມືດ້ານທະເລ​, ລວມທັງສຶກສາຄວາມເປັນໄປໄດ້ກ່ຽວກັບຂໍ້ລິເລີ່ມໃໝ່ສໍາລັບການຮ່ວມມື ເພື່ອສົ່ງເສີມສະຖຽນລະພາບການທາງທະເລ ເພື່ອເປັນຜົນປະໂຫຍດລວມຂອງປະເທດສະມາຊິກອາຊຽນ. ພ້ອມນີ້, ກໍໄດ້ຮັບຊາບການລາຍງານຄວາມຄືບໜ້າກ່ຽວກັບ ການປັບປຸງເອກະສານແນວຄວາມຄິດທາງທະເລ ຂອງອາຊຽນ, ຊຶ່ງປີນີ້ແມ່ນເນັ້ນໃສ່ລາຍງານກ່ຽວກັບການປະມົງແບບຍືນຍົງ. ນອນຈາກນີ້, ກໍ່ໄດ້ປຶກສາຫາລືກ່ຽວກັບໂຄງການສ້າງເວບໄຊ ແລະ ການສ້າງເຄືອຂ່າຍຜູ້ຊ່ຽວຊານທາງທະເລຂອງກອງປະຊຸມເວທີທະເລອາຊຽນແບບເປີດກວ້າງ.

ກອງປະຊຸມຄັ້ງນີ້ ຍັງໄດ້ປຶກສາຫາລື ເພື່ອກະກຽມໃຫ້ແກ່ກອງປະຊຸມເວທີປຶກສາຫາລືທາງທະເລອາຊຽນແບບເປີດກວ້າງ ຄັ້ງທີ 12 ທີ່ຈະຈັດໃນວັນທີ 13 ພະຈິກ 2024 ທີ່ ນະຄອນຫຼວງວຽງຈັນ.