ໃນວັນທີ 7 ພະຈິກ 2024 ທີ່ ເຊອູນ, ສ. ເກົາຫລີ, ທ່ານ ສະ​ເຫຼີ​ມ​ໄຊ ກົມ​ມະ​ສິດ, ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໃນນາມປະທານອາຊຽນປີ 2024 ໄດ້ນໍາພາຄະນະເຂົ້າຮ່ວມກອງປະຊຸມສາກົນ 2024 ວ່າດ້ວຍການເປັນຄູ່ຮ່ວມມືອາຊຽນ-ສ. ເກົາຫລີ. ຈຸດປະສົງຂອງກອງປະຊຸມສາກົນຄັ້ງນີ້ ແມ່ນເພື່ອສະເຫຼີມສະຫຼອງການພົວພັນຮ່ວມມືອາຊຽນ-ສ.ເກົາຫຼີ ຄົບຮອບ 35 ປີ ໃນປີ 2024, ການຍົກລະດັບຂຶ້ນເປັນຄູ່ຮ່ວມ       ຍຸດທະສາດຮອບດ້ານອາຊຽນ-ສ. ເກົາຫລີ ແລະ ສະເຫຼີມສະຫຼອງຄົບຮອບ 15 ປີ ແຫ່ງການສ້າງຕັ້ງສູນອາຊຽນ-ສ. ເກົາຫລີ.

ໃນໂອກາດດັ່ງກ່າວ, ທ່ານ ຮອງນາຍົກລັດຖະມົນຕີ ສະ​ເຫຼີມ​ໄຊ ກົມມະ​ສິດ ໄດ້ຕີລາຄາສູງຕໍ່ໝາກຜົນຂອງການການພົວພັນຮ່ວມມືອາຊຽນ-ສ.ເກົາຫຼີ ຕະຫຼອດໄລຍະ 35 ປີຜ່ານມາ ອັນໄດ້ປະກອບສ່ວນສໍາຄັນ ເຂົ້າໃນຂະບວນການສ້າງປະຊາຄົມອາຊຽນ ກໍຄື ເປົົ້າໝາຍລວມແຫ່ງການສົ່ງເສີມ ແລະ ປົກປັກຮັກສາສັນຕິພາບ, ສະຖຽນລະພາບ ແລະ ຄວາມສົມບູນພູນສຸກ ຢູ່ໃນພາກພື້ນ ແລະ ໃນໂລກ ໂດຍລວມ.  ພ້ອມນີ້, ທ່ານ ຮອງນາຍົກລັດຖະມົນຕີ ຍັງໄດ້ຕີລາຄາສູງຕໍ່ການຍົກລະດັບການພົວພັນອາຊຽນ-ສ.ເກົາຫລີ ຂື້ນເປັນຄູ່ຮ່ວມມືຍຸດທະສາດຮອບດ້ານອາຊຽນ-ສ.ເກົາຫລີ ໃນກອງປະຊຸມ    ສຸດຍອດອາຊຽນ-ສ.ເກົາຫລີ ຄັ້ງທີ 25 ໃນເດືອນ ຕຸລາ 2024 ທີ່ ນະຄອນຫຼວງວຽງຈັນ, ເຊິ່ງການຍົກລະດັບການພົວພັນຮ່ວມມືດັ່ງກ່າວ ໄດ້ສະແດງໃຫ້ເຫັນຄວາມໝາຍໝັ້ນຂອງອາຊຽນ ແລະ ສ.ເກົາຫລີ ທີ່ຈະສືບຕໍ່ຮ່ວມມືກັນ ເພື່ອຮັດແໜ້ນການພົວພັນໃຫ້ແໜ້ນແຟ້ນຂຶ້ນກວ່າເກົ່າ.

ນອກຈາກນີ້, ກອງປະຊຸມ ຍັງໄດ້ປຶກສາຫາລື ແລະ ແລກປ່ຽນຄໍາເຫັນ ເພື່ອກໍານົດທິດທາງຕໍ່ໜ້າໃນການຜັນຂະຫຍາຍການເປັນຄູ່ຮ່ວມມືຍຸດທະສາດຮອບດ້ານໃຫ້ເປັນຮູບປະທຳ  ໂດຍສະເພາະ ເນັ້ນໃສ່ການເພີ່ມທະວີການຮ່ວມມືໃນຫລາຍຂົງເຂດ ເຊັ່ນ: ດ້ານການຄ້າ, ການລົງທຶນ, ທ່ອງທ່ຽວ, ການໄປມາຫາສູ່ລະຫວ່າງປະຊາຊົນ, ການສຶກສາ, ການແລກປ່ຽນດ້ານວັດທະນະທໍາ ໂດຍຜ່ານບັນດາກິດຈະກໍາພາຍໃຕ້ ສູນອາຊຽນ-ສ.ເກົາຫລີ.

ໃນໂອກາດດຽວກັນນີ້, ທ່ານຮອງນາຍົກລັດຖະມົນຕີ ສະເຫຼີມໄຊ ກົມມະສິດ ຍັງໄດ້ພົບປະສອງຝ່າຍກັບ ທ່ານ ໂຈ ແທ ຢຸນ (Cho Tae-yul) ລັດຖະມົນຕີຕ່າງປະເທດ ແຫ່ງ ສ. ເກົາຫຼີ ເພື່ອປຶກສາຫາລືກ່ຽວກັບການພົວພັນຮ່ວມມືໃນໄລຍະທີ່ຜ່ານມາ ໂດຍສະເພາະຜົນການພົບປະສອງຝ່າຍ ລະຫວ່າງ ພະນະທ່ານ ທອງລູນ ສີສຸລິດ, ປະທານປະເທດ ແຫ່ງ ສປປ ລາວ ແລະ ພະນະທ່ານ ຢຸນ ຊອກ ຢອນ, ປະທານາທິບໍດີ ແຫ່ງ ສ. ເກົາຫຼີ ເນື່ອງໃນໂອກາດມາຢ້ຽມຢາມເຮັດວຽກ ແລະ ເຂົ້າຮ່ວມກອງປະຊຸມສຸດຍອດ ອາຊຽນ-ສ.ເກົາຫຼີ ຄັ້ງທີ 25 ທີ່ ນະຄອນຫຼວງວຽງຈັນ, ຊຶ່ງສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມລະຫວ່າງສອງປະເທດ ທີ່ໄດ້ຮັບການເສີມຂະຫຍາຍຢ່າງຕໍ່ເນື່ອງ ໃນຕະຫຼອດໄລຍະ 3 ທົດສະວັດຜ່ານມາ ໂດຍເຫັນໄດ້ຈາກການແລກປ່ຽນການຢ້ຽມຢາມຂອງການນໍາຂັ້ນສູງຂອງສອງປະເທດຢ່າງເປັນປົກກະຕິ, ລວມທັງການຮ່ວມມືດ້ານເສດຖະກິດ-ການຄ້າ, ການສົ່ງເສີມດ້ານການທ່ອງທ່ຽວ, ຊຸກຍູ້ຂົງເຂດການລົງທຶນ, ຂົງເຂດອຸດສາຫະກໍາການຜະລິດ, ອຸດສາຫະກໍາຍານຍົນ, ອຸດສາຫະກໍາປຸງແຕ່ງຜົນຜະລິດກະສິກໍາ ແລະ ອື່ນໆ. ໃນໂອກາດນີ້, ທ່ານຮອງນາຍົກລັດຖະມົນຕີ ໄດ້ສະແດງຄວາມຂອບໃຈຢ່າງຈິງໃຈຕໍ່ການສະໜັບສະໜູນຊ່ວຍເຫຼືອອັນລ້ຳຄ່າຈາກ ລັດຖະບານ ແລະ ປະຊາຊົນ ສ. ເກົາຫຼີ ໃນໄລຍະຜ່ານມາ, ເຊິ່ງໄດ້ສຸມໃສ່ຂະແໜງການບູລິມະສິດຂອງ ສປປ ລາວ ເປັນຕົ້ນແມ່ນ ການພັດທະນາ​ຂະແໜງສາທາລະນະ​ສຸກ, ການເກັບກູ້ລະເບີດບໍ່ທັນແຕກ (UXO) ແລະ ການ​ພັດທະນາ​ຊົນນະບົດ, ການພັດທະນາ​ຊັບພະຍາກອນ​ມະ​ນຸດ, ການຊ່ວຍເຫຼືອດ້ານແຮງງານ ແລະ ອື່ນໆ, ພິເສດ ແມ່ນການສະໜັບສະໜູນ ສປປ ລາວ ໃນການເປັນປະທານອາຊຽນ 2024. ພ້ອມນີ້, ກໍ່ໄດ້ສະເໜີໃຫ້ສອງຝ່າຍປຶກສາຫາລືກ່ຽວກັບການກະກຽມຈັດພິທີສະເຫຼີມສະຫຼອງ 30 ປີແຫ່ງການສ້າງຕັ້ງການພົວພັນທາງການທູດລະຫວ່າງສອງປະເທດໃຫ້ມີຄວາມຟົດຟື້ນ ແລະ ມີຄວາມໝາຍອັນເລິກເຊິ່ງ ເພື່ອສະແດງໃຫ້ເຫັນເຖິງການຮ່ວມມືອັນມີໝາກຜົນ ລະຫວ່າງ ສປປ ລາວ ແລະ ສ. ເກົາຫຼີ ຕະຫຼອດໄລຍະ 30 ປີ ຜ່ານມາ.