04/07/2025
ປະທານປະເທດ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ນະຄອນຫຼວງວຽງຈັນ, ວັນທີ 4 ກໍລະກົດ 2025
ພະນະທ່ານ,
ຕາງໜ້າໃຫ້ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງ ສົ່ງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງ ພະນະທ່ານ ແລະ ປະຊາຊົນ ອາເມຣິກາ ທຸກຖ້ວນໜ້າ ເນື່ອງໃນໂອກາດວັນຊາດ ສະຫະລັດ ອາເມຣິກາ ຄົບຮອບ 249 ປີ.
ຂ້າພະເຈົ້າ ມີຄວາມຍິນດີ ສືບຕໍ່ເຮັດວຽກຮ່ວມກັບພະນະທ່ານ ເພື່ອຮັດແໜ້ນສາຍພົວພັນອັນຍາວນານ ແລະ ການຮ່ວມມືທີ່ມີຢູ່ແລ້ວ ບົນພື້ນຖານຄູ່ຮ່ວມມືແບບກວມລວມ ລາວ-ສະຫະລັດ ອາເມຣິກາ ເພື່ອຜົນປະໂຫຍດ ຂອງ ປະຊາຊົນສອງຊາດພວກເຮົາ ກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາແບບຍືນຍົງ ໃນພາກພື້ນ ແລະ ໃນໂລກ.
ໃນໂອກາດອັນສະຫງ່າລາສີນີ້, ຂ້າພະເຈົ້າ ຂໍອວຍພອນໃຫ້ ພະນະທ່ານ ຈົງມີພະລະນາໄມສົມບູນ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດສູງສົ່ງຂອງ ພະນະທ່ານ ແລະ ປະຊາຊົນ ອາເມຣິກາ ເພື່ອນມິດ ຈົງສືບຕໍ່ມີຄວາມກ້າວໜ້າ ແລະ ວັດທະນະຖາວອນ.
ດ້ວຍຄວາມນັບຖືຢ່າງສູງ,
ທອງລຸນ ສີສຸລິດ
ພະນະທ່ານ ໂດນັນ ທຣຳ
ປະທານາທິບໍດີ ແຫ່ງ ສະຫະລັດ ອາເມຣິກາ
ທີ່ ວໍຊິງຕັນ ດີຊີ
