ຖະ​ແຫຼງການລັດຖະມົນຕີ​ຕ່າງປະ​ເທດ​ອາຊຽນ

ກ່ຽວກັບ ເຫດການລະເບີດແຕກ ທີ່ ດາວາວ, ປະເທດ ຟິລິບປິນ

(ວັນທີ 4 ກັນຍາ 2016)

----------------------------------------------

ອາຊຽນ ກ່າວປະນາມຢ່າງແຂງແຮງ ຕໍ່ເຫດການລະເບີດແຕກ ຊຶ່ງເປັນການກໍ່ການຮ້າຍ ທີ່ ດາ​ວາວ, ສາທາລະນະ​ລັດ ຟິລິບ​ປິນ ​ໃນ​ວັນ​ທີ 2 ກັນຍາ 2016 ອັນ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ​ແລະ ບາດ​ເຈັບ​.

ອາຊຽນ ສະ​ແດງ​ຄວາມ​ເຫັນ​ອົກ​ເຫັນ​ໃຈ ​ແລະ ​ເສົ້າ​ສະຫຼົດ​ໃຈ​ຢ່າງ​ສຸດ​ຊຶ້ງ ມາ​ຍັງ ລັດຖະບານ ຟິລິບ​ປິນ ​ໂດຍ​ສະ​ເພາະ​ແມ່ນ​ຄອບຄົວ​ຂອງ​ຜູ້​ໄດ້​ຮັບ​ເຄາະ​ຮ້າຍ​ຈາກ​​ເຫດການລະເບີດແຕກຄັ້ງນີ້.

ອາຊຽນ ສະໜັບສະໜຸນ ລັດຖະບານ ຟິລິບປິນ ຢ່າງເຕັມປ່ຽມ ໃນການນໍາເອົາຜູ້ກະທໍາຜິດ ມາສູ່ຂະບວນການຍຸຕິທໍາ ແລະ ເຮັດໃຫ້ສະພາບກັບຄືນສູ່ປົກກະຕິ​.

ອາຊຽນ ຢືນຢັນຄືນຄວາມໝາຍໝັ້ນຂອງຕົນ ໃນການຮ່ວມມືກັບວົງຄະນາຍາດສາກົນ ​ເພື່ອຕ້ານ​ລັດທິຄວາມ​ຮຸນ​ແຮງ ແລະ ການກໍ່ການຮ້າຍ ທຸກຮູບແບບ ​ແລະ ທຸກ​ຮູບ​ການ ບໍ່​ວ່າ​ດ້ວຍ​ແຮງ​ຈູງ​ໃຈ​ໃດ​, ຢູ່ແຫ່ງຫົນໃດ​ໃດ, ​ເວລາ​ໃດ ​ແລະ ​ໃຜ​ກໍ​ຕາມ ທີ່ກະທໍາການກໍ່ການຮ້າຍ.

**************************************