ຄັດເລືອກ ບຸກຄົນ ຫລື ອົງການຈັດຕັ້ງ ເພື່ອແຂ່ງຂັນຊິງ “ລາງວັນອາຊຽນ” ຄັ້ງປະຖົມມະເລີກ
ອາຊຽນ (ASEAN)ຈະຈັດການແຂ່ງຂັນຊີງລາງວັນ(ASEAN Prize) ຄັ້ງປະຖົມມະເລີກ, ເພື່ອມອບເປັນກຽດໃຫ້ແກ່ບຸກຄົນ ຫລື ອົງການຈັດຕັ້ງທີ່ມີຜົນງານໂດດເດັ່ນໃນການປະກອບສ່ວນສົ່ງເສີມການຮ່ວມມື ແລະ ການສ້າງປະຊາຄົມອາຊຽນ ກໍຄື ການສົ່ງເສີມເອກະລັກຂອງອາຊຽນ (ASEAN Identity), ສົ່ງເສີມນໍ້າໃຈຄອບຄົວອາຊຽນ (ASEAN Spirit), ແລະ ສະໜັບສະໜູນວິຖີທາງຂອງອາຊຽນ (ASEAN Way).
ເງື່ອນໄຂໃນການຄັດເລືອກ
- 1.ຕ້ອງເປັນພົນລະເມືອງລາວ ຫຼື ເປັນອົງການຈັດຕັ້ງ ທີ່ຂື້ນທະບຽນຖືກຕ້ອງຕາມກົດໝາຍຂອງ ສປປ ລາວລວມມີ ຫົວໜ່ວຍຕ່າງໆຂອງພາກລັດ, ພາກເອກະຊົນ, ອົງການຈັດຕັ້ງມະຫາຊົນ, ອົງການຈັດຕັ້ງສັງຄົມ,ຄອບຄົວຕົວແບບ, ສະຫະກອນແລະ ກຸ່ມການຜະລິດ-ບໍລິການ.
- 2.ຕ້ອງມີຜົນງານດີເດັ່ນແລະ ເປັນທີ່ຍອມຮັບຈາກສັງຄົມໂດຍທົ່ວໄປໂດຍສະເພາະແມ່ນ ດີເດັ່ນໃນດ້ານການປະສານງານຮ່ວມມືລະຫວ່າງປະເທດສະມາຊິກອາຊຽນ; ການຮ່ວມມືລະຫວ່າງອາຊຽນ ກັບ ສາກົນ; ຮັດແໜ້ນການພົວພັນຮ່ວມມື ລະຫວ່າງ ປະຊາຊົນ ໃນປະເທດສະມາຊິກອາຊຽນ; ມີການເຊື່ອມໂຍງດ້ານເສດຖະກິດ ແລະ ການສົ່ງເສີມມາດຕະຖານ ລະຫວ່າງປະເທດສະມາຊິກອາຊຽນ; ແລະດີເດັ່ນໃນການປະກອບສ່ວນສ້າງປະຊາຄົມອາຊຽນ.
- 3.ປະຕິບັດຕາມແນວທາງຂອງພັກ, ລະບຽບກົດໝາຍ ແລະ ນະໂຍບາຍຂອງລັດ, ເຄົາລົບນັບຖືຮີດຄອງປະເພນີອັນດີງາມຂອງຊາດ ແລະ ຂອງບັນດາເຜົ່າ.
ການສະເໜີບຸກຄົນ ຫຼື ອົງການຈັດຕັ້ງທີ່ຖືກຄັດເລືອກ
- ບຸກຄົນ ຫຼື ອົງການຈັດຕັ້ງ ທີ່ສົນໃຈສະໝັກຈະຕ້ອງຂຽນບົດປະເມີນຜົນງານຂອງຕົນ 2-3 ໜ້າ, (ນັບແຕ່ເດືອນເມສາ 2017 ຫາ ເດືອນ ມີນາ 2018) ທັງພາສາລາວ ແລະ ພາສາອັງກິດ, ໂດຍອີງໃສ່ເງື່ອນໄຂໃນການຄັດເລືອກ ທີ່ລະບຸໄວ້ໃນ ຂໍ້ 2.
- ການປະກາດ ແລະ ຮັບລາງວັນ ຈະຈັດຂື້ນໃນລະຫວ່າງ ກອງປະຊຸມສຸດຍອດອາຊຽນຄັ້ງທີ 33 ໃນເດືອນ ພະຈິກ 2018 ທີ່ ສິງກະໂປ. ຜູ້ຊະນະເລີດ ຈະໄດ້ຮັບເງິນລາງວັນ ຈຳນວນ 20,000 ໂດລາສະຫະລັດ.
- ກະລຸນາ ສົ່ງບົດປະເມີນຂອງທ່ານ ມາຍັງຈຸດປະສານງານແຫ່ງຊາດ (ກົມອາຊຽນ, ກະຊວງການຕ່າງປະເທດ)ໂດຍກົງ ຫຼື ອີເມວ This email address is being protected from spambots. You need JavaScript enabled to view it.ຊ້າສຸດພາຍໃນ ວັນທີ 16 ຕຸລາ 2018. ລາຍລະອຽດເພີ່ມເຕີມສາມາດເຂົ້າເບີ່ງໄດ້ທີ່ https://bit.ly/2zun9n3ຫຼື ຕິດຕໍ່ ເບີໂທລະສັບ 021 454115 / 020 2814 0260.