ໂດຍຕອບສະໜອງຕາມຄຳເຊີນຂອງ ສົມເດັດ ອັກຄະມະຫາ ເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ, ໃນວັນທີ 10-11 ມັງກອນ 2018, ພະນະທ່ານ ທອງລຸນ ສີສຸລິດ, ນາຍົກລັດຖະມົນຕີ ແຫ່ງ ສປປ ລາວ, ຈະນຳພາຄະນະຜູ້ແທນລາວ ເຂົ້າຮ່ວມກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 2, ທີ່ ພະນົມເປັນ, ກຳປູເຈຍ. ພາຍໃຕ້ຫົວຂໍ້ “ແມ່ນ້ຳເແຫ່ງສັນຕີພາບຂອງພວກເຮົາ ແລະ ການພັດທະນາແບບຍືນຍົງ” (Our River of Peace and Sustainable Development).
ກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າ ຄັ້ງນີ້ ຈະເປັນກາລະໂອກາດໃຫ້ແກ່ຜູ້ນຳປະເທດສະມາຊິກໄດ້ຕີລາຄາ ແລະ ທົບທວນຮ່ວມກັນຕໍ່ກັບຜົນຂອງການຈັດຕັ້ງປະຕິບັດວຽກງານຕ່າງໆ ຕາມຖະແຫລງການຊັນຢາ ທີ່ໄດ້ຮັບຮອງເອົາໃນກອງປະຊຸມຜູ້ນຳແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 1 (ທີ່ໄດ້ຈັດຂຶ້ນໃນວັນທີ 23 ມີນາ 2016 ທີ່ ເມືອງຊັນຢາ, ແຂວງໄຫຫນານ, ສປ ຈີນ) ທີ່ຜ່ານມາ, ພ້ອມທັງຮ່ວມກັນທົບທວນຄືນຄວາມຄືບໜ້າ ແລະ ໝາກຜົນຂອງ ການຈັດຕັ້ງປະຕິບັດບັນດາແຜນວຽກ ແລະ ໂຄງການຕ່າງໆພາຍໃຕ້ຂອບການຮ່ວມມືດັ່ງກ່າວໃນໄລຍະຜ່ານມາ ພ້ອມທັງປຶກສາຫາລື ກ່ຽວກັບ ການວາງທິດທາງການຮ່ວມມືໃນຂອບແມ່ນ້ຳຂອງ-ແມ່ນ້ຳລ້ານຊ້າງ ໃນຕໍ່ໜ້າ.
ພິເສດກອງປະຊຸມໃນຄັ້ງນີ້ ຈະມີພິທີມອບ-ຮັບ ຕຳແໜ່ງປະທານຮ່ວມກັບ ສປ ຈີນ ສຳລັບຂອບການຮ່ວມມືແມ່ນ້ຳຂອງ-ແມ່ນ້ຳຂອງລ້ານຊ້າງ ລະຫວ່າງ ສປປ ລາວ ແລະ ກຳປູເຈຍ, ຊຶ່ງ ສປປ ລາວ ຈະໄດ້ຮັບກຽດເປັນປະທານຮ່ວມກັບ ສປ ຈີນ ສຳລັບສົກປີ 2018-2020 ໂດຍອີງຕາມຮອບວຽນຕາມຊື່ຕົວອັກສອນພາສາອັງກິດ.