ແຈ້ງການຂອງຫ້ອງວ່າການປະທານປະເທດ 

ຕອບສະໜອງຕາມຄຳເຊີນຂອງ ພະນະທ່ານ ບຸນຍັງ ວໍລະຈິດ, ປະທານປະເທດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ພະນະທ່ານ ດຣ. ໂທນີ ທານ ເກັງ ຢຳ, ປະທານາທິບໍດີ ແຫ່ງ ສາທາລະນະລັດ ສິງກະໂປ ພ້ອມດ້ວຍພັນລະຍາ ແລະ ຄະນະ ຈະເດີນທາງມາຢ້ຽມຢາມທາງລັດຖະກິດ ຢູ່ ສປປ ລາວ ໃນ​ລະຫວ່າງວັນ​ທີ 11-14 ມັງກອນ 2017 ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສອງປະເທດ ລາວ ແລະ ສິງກະໂປ ໃຫ້ແໜ້ນແຟ້ນ ຍິ່ງໆຂຶ້ນ.

****************************

ຊີວະປະຫວັດຫຍໍ້

1. ປະຫວັດສະເພາະ

-       ຊື່ ແລະ ນາມສະກຸນ: ພະນະທ່ານ ດຣ. ໂທນີ ທານ ເກັງ ຢຳ (H.E Dr. Tony Tan Keng Yam) 

-       ຕຳແໜ່ງ: ປະທານາທິບໍດີ ແຫ່ງ ສາທາລະນະລັດ ສິງກະໂປ.

-       ວັນເດືອນປີເກີດ: 7 ກຸມພາ 1940

-       ສະພາບຄອບຄົວ: ແຕ່ງງານ, ມີລູກ 4 ຄົນ

2. ລະດັບການສຶກສາ

-       ຮຽນສາມັນສຶກສາ ທີ່ ໂຮງຮຽນ ເຊນ ແພດທຣິກ ແລະ ສະຖາບັນ ເຊນ ໂຈເຊັບ.

-       ປີ 1962 ຈົບການສຶກສາ ລະດັບປະລິນຍາຕີ ກຽດນິຍົມອັນດັບໝຶ່ງ ຂະແໜ່ງຟີຊິກສາດ ມະຫາວິທະຍາໄລ ສິງກະໂປ. ຫລັງຈາກນັ້ນ, ສຶກສາຕໍ່ໃນ ລະດັບປະລິນຍາໂທ ສາຂາວິທະຍາສາດທຳມະຊາດ ທີ່ ສະຖາບັນ ເຕັກໂນໂລຊີ ແມດຊາຈູເຊັດ, ປະເທດ ສະຫະລັດ ອາເມລິກາ ແລະ ສຶກສາຕໍ່ ປະລິນຍາເອກຂະແໜງຄະນິດສາດປະຍຸກ ທີ່ ມະຫາວິທະຍາໄລ ອາດີເລດ ປະເທດ ອົດສະຕາລີ.

3. ປະສົບການເຮັດງານ

-       ກໍລະກົດ 2011: ລົງສະໝັກເລືອກຕັ້ງ ປະທານາທິບໍດີ ຊຶ່ງໄດ້ຮັບເລືອກ ແລະ ກາຍເປັນປະທານາທິບໍດີ ຄົນທີ່ 7 ແຫ່ງ ສາທາລະນະລັດ ສິງກະໂປ ໃນວັນທີ 1 ກັນຍາ 2011.

-    ກັນຍາ 2005: ເຂົ້າບຳນານ ແລະ ຖືກແຕ່ງຕັ້ງເປັນຮອງຜູ້ອຳນວຍການ ແລະ ຜູ້ບໍລິຫານລະດັບສູງ ຂອງວິສະຫະກິດ ເພື່ອການລົງທຶນ ຂອງ ລັດຖະບານ ສິງກະໂປ; ເປັນປະທານກອງທຶນເພື່ອການຄົ້ນຄ້ວາແຫ່ງຊາດ; ເປັນຮອງປະທານ ສະພາຄົ້ນຄວ້າ ນະວັດຕະກຳ ແລະ ວິສາຫະກິດ, ແລະ ເປັນປະທານ ກຸ່ມບໍລິສັດ ສື່ມວນຊົນ ສິງກະໂປ.

-       ສິງຫາ 2003: ເປັນຮອງນາຍົກລັດຖະມົນຕີ ແລະ ລັດຖະມົນຕີປະສານງານ ປະຈຳ ກະຊວງປ້ອງກັນຊາດ ແລະ ປ້ອງກັນຄວາມສະຫງົບ.

-       ສິງຫາ1995: ກັບມາເຮັດວຽກກັບ ພາກລັດ ແລະ ໄດ້ຮັບການແຕ່ງຕັ້ງເປັນ ຮອງນາຍົກ ລັດຖະມົນຕີ ແລະ ລັດຖະມົນຕີ ກະຊວງປ້ອງກັນປະເທດ.

-       ທັນວາ 1991: ໄດ້ລາອອກຈາກ ພາກລັດ ແລະ ກັບໄປເຮັດວຽກກັບພາກເອກະຊົນ ຊຶ່ງໄດ້ເປັນຜູ້ອຳນວຍການໃຫ່ຍທະນາຄານ OCBC.

-       ແຕ່ປີ 1985 - 1991: ເປັນລັດຖະມົນຕີ ກະຊວງສຶກສາທິການ.

-       ແຕ່ປີ 1983 - 1985: ເປັນລັດຖະມົນຕີກະຊວງການເງິນ, ຂະນະດຽວກັນ ກໍດຳລົງຕຳແໜ່ງເປັນ ລັດຖະມົນຕີກະຊວງການຄ້າ ແລະ ອຸດສາຫະກຳ.

-       ປີ 1981: ຖືກແຕ່ງຕັ້ງເປັນລັດຖະມົນຕີກະຊວງການຄ້າ ແລະ ອຸດສາຫະກຳ.

-       ປີ 1980: ຖືກແຕ່ງຕັ້ງເປັນລັດຖະມົນຕີກະຊວງສຶກສາທິການ, ຂະນະດຽວກັນ ກໍດຳລົງຕຳແໜ່ງເປັນ ຮອງຄະນະບໍດີມະຫາວິທະຍາໄລ ແຫ່ງຊາດ ສິງກະໂປ.

-       ປີ 1979: ເລີ່ມເຂົ້າມາຫລິ້ນການເມືອງ ແລະ ຖືກເລືອກຕັ້ງ ເປັນສະມາຊິກສະພາ ກ່ອນຈະໄດ້ຮັບການແຕ່ງຕັ້ງເປັນ ລັດຖະມົນຕີ ແຫ່ງລັດ ອາວຸໂສ ປະຈຳ ກະຊວງສຶກສາທິການ.

-       ປີ 1969: ເຂົ້າເຮັດວຽກທີ່ ທະນາຄານ OCBC (Overseas-Chinese Banking Corporation), ຊຶ່ງ ທ່ານ ໄດ້ຂຶ້ນດຳລົງຕຳແໜ່ງເປັນຜູ້ຈັດການ ໃນເວລາຕໍ່ມາ.

-       ປີ 1967: ເປັນອາຈານສອນ ຢູ່ ຄະນະຄະນິດສາດ ມະຫາວິທະຍາໄລ ສິງກະໂປ.

-       ປີ 1964: ເປັນອາຈານສອນ ຢູ່ ຄະນະຟີຊິກສາດ ມະຫາວິທະຍາໄລ ສິງກະໂປ.