Ministry of Foreign Affairs of Laos - ບົດຖະແຫຼງຂ່າວ ຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ

ບົດຖະແຫຼງຂ່າວ ຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ

slk pc

- ສະບາຍດີຕອນບ່າຍ, ບັນດາທ່ານສື່ມວນຊົນ, ທ່ານຍິງ ແລະ ທ່ານຊາຍ,

ຄືດັ່ງທີ່ ບັນດາທ່ານຊາບ, ສປປ ລາວ ຮູ້ສຶກເປັນກຽດ ທີ່ໄດ້ເປັນປະທານໝູນວຽນອາຊຽນ ໃນປີນີ້ ຊຶ່ງເປັນຄັ້ງທີ 2 ຂອງການເປັນປະທານອາຊຽນຂອງສປປ ລາວ. ພວກເຮົາໄດ້ກໍານົດເອົາຄໍາຂວັນທີ່ວ່າ: “ຫັນວິໄສທັດໃຫ້ເປັນຮູບປະທໍາ ເພື່ອຄວາມເຂັ້ມແຂງຂອງປະຊາຄົມອາຊຽນ” ສໍາລັບການເປັນປະທານໃນປີນີ້ ເນື່ອງຈາກປີ 2016 ແມ່ນປີທໍາອິດຂອງການເປັນປະຊາຄົມອາຊຽນແລະ ເປັນປີທໍາອິດເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2025. ຄໍາຂວັນຂອງພວກເຮົາ ແມ່ນສອດຄ່ອງກັບຄວາມພະຍາຍາມອັນຕໍ່ເນື່ອງຂອງອາຊຽນ ໃນການສ້າງຄວາມເຂັ້ມແຂງໃຫ້ແກ່ປະຊາຄົມອາຊຽນ.
ສໍາລັບຂ້າພະເຈົ້າເອງ ແມ່ນມີຄວາມພາກພູມໃຈເປັນຢ່າງຍິ່ງ ທີ່ໄດ້ເປັນເຈົ້າພາບ ແລະ ເປັນປະທານກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ ເປັນເວລາ 4 ວັນ ນັບຕັ້ງແຕ່ວັນທີ 23 ຈົນເຖິງມື້ນີ້.
ໃນຄັ້ງນີ້ ພວກເຮົາໄດ້ຈັດກອງປະຊຸມຮ່ວມກັນທັງໝົດ 22 ກອງປະຊຸມລະດັບລັດຖະມົນຕີ ດັ່ງນີ້:

- ພວກເຮົາມີ 3 ກອງປະຊຸມຂອງລັດຖະມົນຕີຕ່າງປະເທດອາຊຽນ ຊຶ່ງແຕ່ລະກອງປະຊຸມມີຫນ້າທີ່ແຕກຕ່າງກັນ.

- ພວກເຮົາມີ 14 ກອງປະຊຸມກັບຄູ່ຮ່ວມເຈລະຈາອາຊຽນ ພາຍໃຕ້ກົນໄກທີ່ອາຊຽນເປັນຜູ້ລິເລີ່ມເຊັ່ນ: ອາຊຽນ ບວກ 1, ອາຊຽນ ບວກ 3, ກອງປະຊຸມສຸດຍອດອາຊີຕາເວັນອອກ ແລະ ກອງປະຊຸມເວທີພາກພື້ນອາຊຽນ.

- ພ້ອມກັນນັ້ນ, ພວກເຮົາກໍຍັງມີກອງປະຊຸມອະນຸພາກພື້ນລະດັບລັດຖະມົນຕີ ອີກ 5 ກອງປະຊຸມ.

ນອກຈາກກອງປະຊຸມເຫຼົ່ານີ້, ພວກເຮົາຍັງມີອີກຫຼາຍກອງປະຊຸມແບບສອງຝ່າຍ.
ໃນທຸກໆກອງປະຊຸມ, ພວກເຮົາໄດ້ມີການປຶກສາຫາລືກັນຢ່າງຄົບຖ້ວນຮອບດ້ານ, ກົງໄປກົງມາ ແລະ ມີໝາກຜົນ.
ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49, ພວກເຮົາໄດ້ມີການປຶກສາຫາລື ກ່ຽວກັບບັນຫາສໍາຄັນທາງດ້ານການເມືອງ, ຄວາມໝັ້ນຄົງ ແລະ ການຮ່ວມມືເພື່ອການພັດທະນາພາຍໃນອາຊຽນ ແລະ ລະຫວ່າງອາຊຽນ ແລະ ຄູ່ຮ່ວມເຈລະຈາ ແລະ ຄູ່ຮ່ວມພາຍນອກຢ່າງມີໝາກຜົນ.

- ພວກເຮົາຢໍ້າຄືນຄວາມໝາຍໝັ້ນ ສົ່ງເສີມຄວາມພະຍາຍາມສ້າງປະຊາຄົມອາຊຽນ ໂດຍການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ແລະ ແຜນແມ່ບົດທັງສາມເສົາຄໍ້າ ຢ່າງມີປະສິດທິຜົນ ໂດຍມີເປົ້າຫມາຍເພື່ອສົ່ງເສີມປະຊາຄົມອາຊຽນໃຫ້ເຂັ້ມແຂງອັນເປັນການປະກອບສ່ວນຕໍ່ການຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ.

- ປີນີ້ ແມ່ນຄົບຮອບ 40 ປີ ຂອງສົນທິສັນຍາວ່າດ້ວຍໄມຕີຈິດ ແລະ ການຮ່ວມມືໃນອາຊີຕາເວັນອອກສ່ຽງໃຕ້. ສະນັ້ນ,ໃນໂອກາດນີ້ ພວກເຮົາໄດ້ຮັບຮອງເອົາຖະແຫຼງການຂອງລັດຖະມົນຕີຕ່າງປະເທດອາຊຽນໃນໂອກາດຄົບຮອບ40 ປີ ຂອງ ສົນທິສັນຍາດັ່ງກ່າວ ເພື່ອຢໍ້າຄືນຄວາມໝາຍຄວາມສໍາຄັນຂອງສົນທິສັນຍາສະບັບນີ້ ຊຶ່ງເປັນກົດແຫ່ງການປະພຶດທີ່ສໍາຄັນ ສໍາລັບການດໍາເນີນການພົວພັນລະຫວ່າງລັດໃນພາກພື້ນ ແລະ ການສົ່ງເສີມການຮ່ວມມືລະຫວ່າງ ອາຊຽນກັບນອກພາກພື້ນ ເພື່ອສົ່ງເສີມສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ. ພວກເຮົາຍິນດີທີ່ຫລາຍປະເທດໄດ້ຮັບຮູ້ ສົນທິສັນຍາດັ່ງກ່າວ ແລະ ພ້ອມທັງເຫັນດີຮັບເອົາ 4 ປະເທດ ຄື: ຈີເລ, ເອຢິບ, ອີຣານ ແລະ ມາຣົກ ເຂົ້າເປັນພາຄີຂອງສົນທິສັນຍານີ້.

- ພວກເຮົາຍັງໄດ້ອອກຖະແຫຼງການຮ່ວມຂອງລັດຖະມົນຕີຕ່າງປະເທດອາຊຽນ ວ່າດ້ວຍການຮັກສາສັນຕິພາບ ແລະ ສະຖຽນລະພາບໃນພາກພື້ນ.

- ພວກເຮົາຈະສືບຕໍ່ຮັດແໜ້ນການຮ່ວມມືກັບຄູ່ເຈລະຈາ ກໍຄື ການຮັດແໜ້ນການຮ່ວມມືກັບຄູ່ຮ່ວມມືພາຍນອກອື່ນໆ ຜ່ານບັນດາກົນໄກທີ່ອາຊຽນເປັນຜູ້ລິເລີ່ມ ເຊັ່ນ ອາຊຽນ ບວກ 1, ອາຊຽນ ບວກ 3, ກອງປະຊຸມລັດຖະມົນຕີປ້ອງກັນປະເທດອາຊຽນ-ບວກ, ເວທີພາກພື້ນອາຊຽນແລະ ກອງປະຊຸມສຸດຍອດອາຊີຕາເວັນອອກ ເພື່ອຜົນປະໂຫຍດຮ່ວມກັນ ພ້ອມທັງຮັດແໜ້ນຄວາມເປັນແກນກາງຂອງອາຊຽນ ໃນບັນດາກົນໄກເຫຼົ່ານັ້ນ ແລະ ໃນໂຄງສ້າງພາກພື້ນທີ່ພວມຜັນແປ. ໃນນີ້, ພວກເຮົາໄດ້ເຫັນດີຮັບເອົາ ເຢຍລະມັນ ເປັນຄູ່ຮ່ວມພັດທະນາ ແລະ ສະວິດ ເປັນຄູ່ຮ່ວມຂະແຫນງການ.

- ລັດຖະມົນຕີຕ່າງປະເທດ ໄດ້ຮັບຮອງເອົາຖະແຫລງການຮ່ວມຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49.

ພວກເຮົາ, ບັນດາລັດຖະມົນຕີຕ່າງປະເທດອາຊຽນ ໄດ້ພົບປະກັບຄູ່ຮ່ວມຕໍາແໜ່ງຈາກ 10 ບັນດາຄູ່ເຈລະຈາ ໃນແຕ່ລະກອງປະຊຸມລັດຖະມົນຕີຕ່າງປະເທດ ກັບ ຄູ່ຮ່ວມເຈລະຈາ ບວກ ເຊັ່ນ: ອົດສະຕຣາລີ, ການາດາ, ຈີນ, ສະຫະພາບເອີລົບ, ອິນເດຍ, ຍີ່ປຸ່ນ, ນິວຊີແລນ, ສາທາລະນະລັດເກົາຫຼີ, ສະຫະພັນລັດເຊຍ ແລະ ສະຫະລັດອາເມລິກາ. ພວກເຮົາທົບທວນຄືນຄວາມຄືບໜ້າຂອງການຮ່ວມມືລະຫວ່າງ ອາຊຽນ ແລະ ຄູ່ເຈລະຈາໃນໄລຍະຜ່ານມາ ແລະ ໄດ້ກໍານົດທິດທາງໃນອະນາຄົດ ເພື່ອການຮັດແໜ້ນການຮ່ວມມືໃນທຸກຂະແໜງການໃຫ້ໃກ້ຊິດກວ່າເກົ່າ ເຊັ່ນ: ການຄ້າ, ການລົງທຶນ, ການເຊື່ອມຈອດ, ການທ່ອງທ່ຽວ ແລະ ການໄປມາຫາສູູ່ລະຫວ່າງປະຊາຊົນ.
ພວກເຮົາ ໄດ້ພົບປະກັບຄູ່ຮ່ວມຕໍາແໜ່ງ ພາຍໃຕ້ຂອບການຮ່ວມມືອາຊຽນບວກ 3. ໃນນີ້, ພວກເຮົາຢໍ້າຄືນຄວາມໝາຍໝັ້ນເພື່ອສົ່ງເສີມກົນໄກອາຊຽນບວກ 3 ຊຶ່ງເປັນກົນໄກສໍາຄັນ ເພື່ອໄປສູ່ການສ້າງປະຊາຄົມເສດຖະກິດອາຊີຕາເວັນອອກ ໃນໄລຍະຍາວ. ພວກເຮົາ ໄດ້ປຶກສາຫາລືບັນດາກິດຈະກໍາ ເພື່ອສະເຫຼີມສະຫຼອງການຮ່ວມມືອາຊຽນບວກ 3 ຄົບຮອບ 20 ປີ ໃນປີ 2017. ໃນຖານະເປັນປະທານອາຊຽນ ແລະ ປະທານອາຊຽນບວກ 3, ສປປ ລາວ ໄດ້ສະເໜີຮ່າງຖະແຫຼງການ ວ່າດ້ວຍການສົ່ງເສີມການຮ່ວມມືເພື່ອການພັດທະນາແບບຍືນຍົງ ທີ່ຈະຖືກຮັບຮອງໃນກອງປະຊຸມສຸດຍອດອາຊຽນບວກ 3 ຄັ້ງທີ 19 ໃນເດືອນກັນຍາ 2016 ທີ່ ນະຄອນຫຼວງວຽງຈັນ, ສປປ ລາວ. ຂໍ້ສະເໜີນີ້ ກໍໄດ້ຮັບການສະໜັບສະໜູນຈາກບັນດາປະເທດສະມາຊິກອາຊຽນບວກ 3 ຢ່າງກວ້າງຂວາງ.
ໃນກອງປະຊຸຸມລັດຖະມົນຕີຕ່າງປະເທດຂອງກອງປະຊຸມສຸດຍອດອາຊີຕາເວັນອອກ, ພວກເຮົາໄດ້ຢືນຢັນຄືນຄວາມສໍາຄັນຂອງການສ້າງຄວາມເຂັ້ມແຂງໃຫ້ແກ່ກົນໄກດັ່ງກ່າວ ຊຶ່ງເປັນເວທີຜູ້ນໍາ ສໍາລັບການປຶກສາຫາລື ກ່ຽວກັບບັນຫາຍຸດທະສາດ, ການເມືອງ ແລະ ເສດຖະກິດ ທີ່ມີຄວາມເປັນຫ່ວງ ແລະ ສົນໃຈຮ່ວມກັນ ໂດຍມີເປົ້າຫມາຍ ເພື່ອສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກທາງດ້ານເສດຖະກິດໃນອາຊີຕາເວັນອອກ.ພວກເຮົາໄດ້ປຶກສາຫາລື ກ່ຽວກັບທິດທາງ ເພື່ອຈັດຕັ້ງປະຕິບັດ 6 ຂົງເຂດບູລິມະສິດຂອງ ກອງປະຊຸມສຸດຍອດອາຊີຕາເວັນອອກ ຢ່າງມີປະສິດທິພາບ. ໃນນີ້, ກອງປະຊຸມ ໄດ້ສະແດງການສະໜັບສະໜູນຢ່າງກວ້າງຂວາງຕໍ່ຮ່າງຖະແຫຼງການວຽງຈັນ ວ່າດ້ວຍ ການສົ່ງເສີມການຮ່ວມມື ເພື່ອພັດທະນາພື້ນຖານໂຄງລ່າງໃນອາຊີຕາເວັນອອກ ທີ່ສະເໜີໂດຍ ສປປ ລາວເຮົາ ຊຶ່ງຈະໄດ້ຮັບຮອງເອົາໂດຍ ບັນດາຜູ້ນໍາອາຊີຕາເວັນອອກ ໃນກອງປະຊຸມສຸດຍອດອາຊີຕາເວັນອອກ ຄັ້ງທີ 11 ໃນເດືອນກັນຍາ 2016 ທີ່ ນະຄອນຫຼວງວຽງຈັນ.ຖະແຫຼງການດັ່ງກ່າວ ມີຈຸດປະສົງ ເພື່ອລະດົມຄວາມສາມາດຂອງພາກພື້ນ ໃນການສົ່ງເສີມບັນດາໂຄງການພັດທະນາພື້ນຖານໂຄງລ່າງ ເພື່ອກ້າວໄປສູ່ການຮັດແໜ້ນການເຊື່ອມຈອດພາກພື້ນ ອັນເປັນການປະກອບສ່ວນສົ່ງເສີມການພັດທະນາແບບຍືນຍົງ, ການເຕີບໂຕທາງດ້ານເສດຖະກິດ ແລະ ການເຊື່ອມໂຍງພາກພື້ນ ກໍຄື ການສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ.
ໃນກອງປະຊຸມເວທີພາກພື້ນອາຊຽນ, ພວກເຮົາໄດ້ຢໍ້າຄືນຄວາມສໍາຄັນຂອງເວທີດັ່ງກ່າວ ຊຶ່ງເປັນເວທີ ເພື່ອການປຶກສາຫາລືຢ່າງສ້າງສັນແລະ ການຮ່ວມມືທາງດ້ານການເມືອງ ແລະ ຄວາມໝັ້ນຄົງທີ່ທຸກຝ່າຍມີຄວາມເປັນຫ່ວງ ແລະ ຄວາມສົນໃຈຮ່ວມກັນ ແລະ ທັງຢໍ້າຄືນ ບົດບາດສໍາຄັນຂອງເວທີພາກພື້ນອາຊຽນໃນການປະກອບສ່ວນ ໃນການຮັບມືກັບບັນດາສີ່ງທ້າທາຍຕໍ່ຄວາມໝັ້ນຄົງທີ່ບໍ່ແມ່ນການທະຫານ ທີ່ນັບມື້ນັບເພີ່ມຂຶ້ນ.

- ລັດຖະມົນຕີເວທີພາກພື້ນອາຊຽນ ໄດ້ຮັບຮອງເອົາ 23 ກິດຈະກໍາ ສໍາລັບສົກປີ 2016-2017 ແລະ ເຫັນດີຮັບຮອງເອົາ 3 ຖະແຫຼງການ ຄື:

ຖະແຫຼງການເວທີພາກພື້ນອາຊຽນ ວ່າດ້ວຍ ການຮັດແໜ້ນການຮ່ວມມື ເພື່ອຄຸ້ມຄອງການເຄື່ອນໄຫວຂ້າມຊາຍແດນຂອງກຸ່ມອາຊະຍາກອນ;
ຖະແຫຼງການເວທີພາກພື້ນອາຊຽນວ່າດ້ວຍການຮັດແໜ້ນການຮ່ວມມືລະຫວ່າງບັນດາອົງກອນທີ່ຮັບຜິດຊອບການບັງຄັບໃຊ້ກົດໝາຍທາງທະເລ; ແລະ
ຖະແຫຼງການລັດຖະມົນຕີຕ່າງປະເທດເວທີພາກພື້ນອາຊຽນກ່ຽວກັບການກໍ່ການຮ້າຍ.

- ສປປ ລາວ, ໃນນາມປະທານເວທີພາກພື້ນອາຊຽນ, ໄດ້ນໍາສະເໜີປຶ້ມວິໄສທັດຄວາມໝັ້ນຄົງປະຈໍາປີ ຂອງເວທີພາກພື້ນອາຊຽນ 2016 ຊຶ່ງເປັນສະບັບທີ 17 ທີ່ໄດ້ຮວບຮວມເອົາການປະກອບຄໍາຄິດເຫັນຈາກບັນດາປະເທດເຂົ້າຮ່ວມເວທີພາກພື້ນອາຊຽນ. ປຶ້ມວິໄສທັດດັ່ງກ່າວ ຖືເປັນເອກະສານສໍາຄັນ ໃນການສົ່ງເສີມຄວາມເຂົ້າໃຈ, ການໄວ້ເນື້ອເຊື່ອໃຈ ແລະ ຄວາມໂປ່ງໃສ່ ລະຫວ່າງປະເທດຜູ້ເຂົ້າຮ່ວມເວທີພາກພື້ນອາຊຽນ.

ບັນດາທ່ານສື່ມວນຊົນ, ທ່ານຍິງ ແລະ ທ່ານຊາຍ,

ໃນບັນດາກອງປະຊຸມດັ່ງກ່າວນີ້, ພວກເຮົາ ໄດ້ແລກປ່ຽນທັດສະນະຢ່າງເປີດເຜີຍ, ກົງໄປກົງມາ ແລະ ສ້າງສັນ ກ່ຽວກັບບັນຫາພາກພື້ນ ແລະ ສາກົນທີ່ທຸກຝ່າຍມີຄວາມສົນໃຈ ແລະ ເປັນຫ່ວງຮ່ວມກັນ.
ສະຫລຸບແລ້ວ, ຂ້າພະເຈົ້າຂໍແຈ້ງບັນດາທ່ານສື່ມວນຊົນວ່າ ກອງປະຊຸມລັດຖະມົນຕີຕ່າງປະເທດ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ ແມ່ນໄດ້ປິດລົງດ້ວຍຜົນສໍາເລັດອັນສະຫງ່າງາມ.
ສິ່ງເຫຼົ່ານັ້ນ ແມ່ນໃຈຄວາມສໍາຄັນທີ່ເປັນຜົນຂອງກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມອື່ນໆທີ່ກ່ຽວຂ້ອງ.
ພວກທ່ານສາມາດຊອກຫາລາຍລະອຽດເພີ່ມເຕີມໄດ້ໃນຖະແຫຼງການຮ່ວມຂອງກອງປະຊຸມລັດຖະມົນຕີຕ່າງປະເທດ ຄັ້ງທີ 49 ແລະ ບັນດາຖະແຫຼງການປະທານຂອງບັນດາກອງປະຊຸມທີ່ກ່ຽວຂ້ອງ ທີ່ໄດ້ຈະແຈກຢາຍ ແລະ ເອົາຂື້ນໃນເວັບໄຊໃນໄວໆນີ້.
ຂ້າພະເຈົ້າ ຂໍຖືໂອກາດນີ້ ສະແດງຄວາມຂອບໃຈຢ່າງຈິງໃຈມາຍັງບັນດາທ່ານລັດຖະມົນຕີທັງໝົດ ສໍາລັບການຮ່ວມມືອັນດີ, ການປະກອບສ່ວນຢ່າງຫ້າວຫັນ ແລະ ການປຶກສາຫາລືຢ່າງສ້າງສັນ ຊຶ່ງເຮັດໃຫ້ກອງປະຊຸມລັດຖະມົນຕີຕ່າງປະເທດອາຊຽນ ຄັ້ງທີ 49 ແລະ ກອງປະຊຸມລະດັບລັດຖະມົນຕີອື່ນໆທີ່ກ່ຽວຂ້ອງ ໄດ້ຮັບຜົນສໍາເລັດ ຊຶ່ງເປັນການສ້າງພື້ນຖານອັນດີ ສໍາລັບການຈັດກອງປະຊຸມສຸດຍອດອາຊຽນ ຄັ້ງທີ 28 ແລະ ຄັ້ງທີ 29 ແລະ ກອງປະຊຸມສຸດຍອດອື່ນໆທີ່ກ່ຽວຂ້ອງ ຊຶ່ງຈະຈັດຂຶ້ນໃນວັນທີ 6-8 ກັນຍາ ໃນປີນີ້ິ ໃຫ້ໄດ້ຮັບຜົນສໍາເລັດ.ຂໍເຊີນ ບັນດາທ່ານສື່ມວນຊົນທັງໝົດ ເພື່ອມາຕິດຕາມບັນດາກອງປະຊຸມສຸດຍອດດັ່ງກ່າວ.
ຂ້າພະເຈົ້າ ຈະຂໍຢຸດຢູ່ທີ່ນີ້ ແລະ ເປີດໂອກາດໃຫ້ບັນດາທ່ານສື່ມວນຊົນ ມີຄໍາຖາມ ແລະ ຄໍາຄິດເຫັນ.

ຂອບໃຈ ສໍາລັບການຮ່ວມມື.

ມື້ນີ້	19
ມື້ວານ	205
ອາທິດນີ້	1146
ເດືອນນີ້	4013

-

ເຊື່ອມຕໍ່ເວັບໄຊພາຍໃນລາວ

ທູດລາວທີ່ປະຈຳຢູ່ຕ່າງປະເທດ

ແຈ້ງການ

ສາລະຄະດີ 70ປີ ວັນການທູດລາວ

ຈຳນວນຜູ້ເຂົ້າຊົມ