ທ່ານ ບົວແກ້ວ ພູມວົງໄຊ, ຫົວໜ້າກົມການຂ່າວ, ໂຄສົກກະຊວງການຕ່າງປະເທດ ແຫ່ງ ສປປ ລາວ ໄດ້ຮ່ວມພິທີຖະແຫຼງຂ່າວ ກັບ ກະຊວງສາທາລະນະສຸກ ແລະ ອົງການອະນາໄມໂລກ (WHO) ກ່ຽວກັບ ມາດຕະການຄຸ້ມຄອງ ແລະ ຊ່ວຍເຫຼືອນັກສຶກສາ ແລະ ພົນລະເມືອງລາວ ທີ່ອາໄສຢູ່ ສປ ຈີນ, ໂດຍມີເນື້ອໃນວ່າ: ກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ຕິດຕາມສະພາບການລະບາດຂອງພະຍາດອັກເສບປອດ ເຊື້ອຈຸລະໂລກສາຍພັນໃໝ່ ຢ່າງໃກ້ຊິດ ພາຍຫຼັງໄດ້ເລີ່ມລະບາດຢູ່ເມືອງອູຫັ້ນ, ແຂວງຫູເປີ່ຍ ຂອງ ສປ ຈີນ ນັບແຕ່ທ້າຍປີ 2019 ເປັນຕົ້ນມາ ແລະ ໄດ້ແຜ່ລະບາດໄປຫຼາຍແຂວງ ແລະ ນະຄອນຫຼວງປັກກິງ ຂອງ ສປ ຈີນ, ແລະ ຫຼາຍປະເທດໃນໂລກ ຊຶ່ງມາຮອດວັນທີ 3 ກຸມພາ 2020 ໄດ້ມີຜູ້ເສຍຊີວິດ ທັງໝົດ 362 ຄົນ, ໃນນັ້ນມີຄົນຈີນ ທີ່ຕິດເຊື້ອແລ້ວເສຍຊີວິດຢູ່ຟິລິບປິນ 1 ຄົນ ແລະ ມີຜູ້ຕິດເຊື້ອຫຼາຍກວ່າ 17.000 ຄົນ.

ຕໍ່ສະພາບການດັ່ງກ່າວ, ກະຊວງການຕ່າງປະເທດ ແຫ່ງ ສປປ ລາວ ໂດຍສະເພາະສະຖານເອກອັກຄະລັດຖະທູດ ແລະ ບັນດາສະຖານກົງສຸນ ແຫ່ງ ສປປ ລາວ ປະຈໍາຢູ່ ສປ ຈີນ ໄດ້ເອົາໃຈໃສ່ໃຫ້ຄໍາແນະນໍາ ແລະ ປະສານກັບນັກສຶກສາລາວທີ່ຮຽນຢູ່ ສປ ຈີນ ຢ່າງໃກ້ຊິດ ພ້ອມທັງໃຫ້ຖາມເຖິງຊີວິດການເປັນຢູ່, ບັນຫາ ແລະ ຄວາມຕ້ອງການຊ່ວຍເຫຼືອຂອງເຂົາເຈົ້າ; ພ້ອມນັ້ນ ກໍໄດ້ແນະນໍາໃຫ້ນັກສຶກສາຈໍານວນຜູ້ທີ່ໄປຢ້ຽມຢາມໝູ່ ແລະ ພີ່ນ້ອງທີ່ຕ່າງແຂວງ ຫຼັງຈາກສອບເສັງແລ້ວໃຫ້ຢູ່ກັບທີ່, ຕິດຕາມຂ່າວສານຈາກເຈົ້າໜ້າທີ່ຝ່າຍຈີນຢ່າງໃກ້ຊິດ ແລະ ປະຕິບັດຕາມລະບຽບການສຸກເສີນ ແລະ ຄໍາແນະນໍາຂອງແຕ່ລະເຂດ ແລະ ແຕ່ລະໂຮງຮຽນ.

ນັກສຶກສາລາວທີ່ໄປຮຽນຢູ່ ສປ ຈີນ ໃນສົກ 2019-2020 ມີທັງໝົດ 8.230 ຄົນ ຍິງ 3.542 ຄົນ, ແຕ່ຫຼັງຈາກເສັງຈົບພາກຮຽນທີ 1 ໃນທ້າຍເດືອນ ທັນວາ 2019, ນັກສຶກສາລາວສ່ວນໃຫຍ່ແມ່ນໄດ້ເດີນທາງກັບ ສປປ ລາວ ເພື່ອຢ້ຽມຢາມຄອບຄົວຕາມປົກກະຕິ. ມາຮອດວັນທີ 30 ມັງກອນ 2020, ມີນັກສຶກສາລາວທີ່ຍັງຢູ່ ສປ ຈີນ ຈໍານວນ 242 ຄົນ ຍິງ 71 ຄົນ ໃນນີ້ຢູ່ນະຄອນຫຼວງປັກກິງ 10 ຄົນ, ຍິງ 5 ຄົນ ແລະ ຢູ່ເມືອງອູຮັນ 37 ຄົນ, ຍິງ 18 ຄົນ ຊຶ່ງນັກສຶກສາເຫຼົ່ານີ້ແມ່ນມີສຸຂະພາບແຂງແຮງດີ ແລະ ຢູ່ໃນຄວາມຮັບຜິດຊອບຂອງໂຮງຮຽນ ໂດຍທາງໂຮງຮຽນຈີນມີການຈັດຫານໍ້າດື່ມ ແລະ ອາຫານການກິນໄວ້ບໍລິການ ແລະ ເປີດຮ້ານຄ້າພາຍໃນໂຮງຮຽນ. ໂດຍລວມແລ້ວ, ນັກສຶກສາລາວ ກໍຄືນັກສຶກສາຕ່າງປະເທດທີ່ຢູ່ມະຫາວິທະຍາໄລຕ່າງໆໃນ ສປ ຈີນ ແມ່ນໄດ້ຮັບການເອົາໃຈໃສ່ຈາກການຈັດຕັ້ງຂອງຝ່າຍຈີນເປັນຢ່າງດີ.

ກະຊວງການຕ່າງປະເທດ ແລະ ບັນດາສໍານັກງານຕາງໜ້າ ແຫ່ງ ສປປ ລາວ ຢູ່ ສປ ຈີນ ຈະສືບປະສານງານຢ່າງໃກ້ຊີດກັບບັນດານັກສຶກສາລາວຜູ້ທີ່ຍັງຢູ່ປະເທດຈີນ ເພື່ອໃຫ້ກໍາລັງໃຈ ແລະ ຄວາມຊ່ວຍເຫຼືອແກ່ເຂົາເຈົ້າ ພ້ອມທັງສືບຕໍ່ປະສານກັບເຈົ້າໜ້າທີ່ຂອງຝ່າຍຈີນ ກ່ຽວກັບມາດການຕອບໂຕ້ກັບການລະບາດຂອງພະຍາດດັ່ງກ່າວໃນແຕ່ລະໄລຍະ. ໃນໂອກາດນີ້, ກະຊວງການຕ່າງປະເທດ ຂໍແຈ້ງໃຫ້ບັນດານັກສຶກສາລາວເຮົາຜູ້ທີ່ຍັງຢູ່ ສປ ຈີນ ຈົ່ງປະຕິບັດຕາມຄໍາແນະນໍາຂອງບັນດາສໍານັກງານຕາງໜ້າ ແຫ່ງ ສປປ ລາວ ປະຈໍາ ສປ ຈີນ ແລະ ປະຕິບັດຕາມລະບຽບການສຸກເສີນຂອງຝ່າຍຈີນຢ່າງເຂັ້ມງວດ. ສໍາລັບນັກສຶກສາລາວຜູ້ທີ່ເດີນກັບ ສປປ ລາວ ເພື່ອຢ້ຽມຢາມຄອບຄົວນັ້ນ ກໍໃຫ້ຕິດຕາມຂໍ້ມູນຂ່າວສານຈາກທາງມະຫາວິທະຍາໄລທີ່ຕົນສຶກສາຢູ່ນັ້ນຢ່າງເປັນປົກກະຕິ ກ່ຽວກັບການເປີດພາກຮຽນທີ 2 ຂອງສົກປີ 2019-2020 ພາຍຫຼັງທີ່ທາງການຈີນໄດ້ປະກາດສືບຕໍ່ປິດສະຖາບັນການສຶກສາຕ່າງໆແຕ່ຂັ້ນມະຫາວິທະຍາໄລ ລົງຮອດຂັ້ນອະນຸບານຢ່າງບໍ່ມີກໍານົດ.

                   ນະຄອນຫຼວງວຽງຈັນ, ວັນທີ 3 ກຸມພາ 2020