ນະ​ຄອນ​ຫລວງວຽງ​ຈັນ, ວັນ​ທີ 25 ກຸມພາ 2023

ສົມເດັດ ເຊັກຄ໌ ນາວາຟ ອານ-ອາມັດ ອານ-ຈາເບີ ອານ-ຊາບາ

ກະສັດ ແຫ່ງ ລັດກູເວດ

ທີ່ ກູເວດ

ສົມເດັດ,

ໃນ​ນາມປະ​ຊາ​ຊົນ ແຫ່ງ ​ສາທາລະນະລັດ ​ປະຊາທິປະໄຕ ​ປະຊາຊົນລາວ ແລະ ໃນ​ນາມ​ສ່ວນ​ຕົວ, ຂ້າ​ພະ​ເຈົ້າ​ ຂໍ​ສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນ ແລະ ພອນ​ໄຊ​ອັນ​ປະ​ເສີດ​ມາ​ຍັງ​ ສົມ​ເດັດ ແລະ ປະ​ຊາ​ຊົນກູ​ເວດ ເພື່ອນ​ມິດ​ ເນື່ອງ​ໃນ​ໂອ​ກາດ​​ວັນ​ຊາດ​ ແຫ່ງ ລັດ​ກູ​ເວດ ຄົບ​ຮອບ 62 ປີ.

ສປປ ລາວ ແລະ ລັດ​ກູເວດ ມີສາຍພົ​ວ​ພັນມິດ​ຕະ​ພາບ, ການຮ່ວມມືອັນດີ ແລະ ​ສະ​ໜັບ​ສະ​ໜູນ​ເຊິ່ງ​ກັນ​ແລະ​ກັນ​ ໃນ​ເວ​ທີ​ພາກ​ພື້ນ ແລະ ສາ​ກົນ ຕະຫຼອດມາ. ຂ້າ​ພະ​ເຈົ້າ ເຊື່ອ​ໝັ້ນ​ວ່າ ​ສາຍ​ພົວ​ພັນ​ມິດຕະພາບ ແລະ ການຮ່ວມມືອັນດີທີ່ມີຢູ່ແລ້ວນັ້ນ ຈະສືບ​ຕໍ່ໄດ້ຮັບ​ການເສີມ​ຂະ​ຫຍາຍ​ໃນ​ຊຸມ​ປີ​ຕໍ່​ໜ້າ ເພື່ອ​ຜົນ​ປະ​ໂຫຍດ​ຂອງປະ​ຊາ​ຊົນ​ສອງຊາດ​ພວກ​ເຮົາ.

ຂ້າ​ພະ​ເຈົ້າ ຂໍຖືໂອກາດນີ້ ອວ​ຍ​ພອນໄຊ ມາຍັງ ​​ສົມເດັດ ຈົ່ງມີ​ພະ​ລາ​ນາ​ໄມສົມ​ບູນ, ມີ​ຄວາມຜາສຸກ ແລະ ຂໍໃຫ້ປະຊາຊົນ ກູເວດ ເພື່ອນມິດ ຈົ່ງສືບຕໍ່ມີຄວາມຈະເລີນກ້າວໜ້າ ແລະ ວັດທະນະຖາວອນ.

ດ້ວຍ​ຄວາມ​ນັບ​ຖືຢ່າງ​ສູງ.

ທອງລຸນ ສີສຸລິດ

--------------------------------------------------------------------------------

ສົມເດັດ,

ໃນ​ນາມ​ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະ​ຊາ​ຊົນລາວ ກໍ່ຄື ໃນ​ນາມ​ສ່ວນ​ຕົວ, ຂ້າ​ພະ​ເຈົ້າ​ ມີ​ຄວາມ​ປິ​ຕິ​ຍິນ​ດີເປັນ​ຢ່າງ​ຍິ່ງສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນ ແລະ ພອນ​ໄຊ​ອັນ​ປະ​ເສີດ ມາ​ຍັງ ​ສົມເດັດ ແລະ ລັດຖະບານ ​ກູເວດ ເນື່ອງໃນໂອກາດວັນຊາດ ແຫ່ງ ລັດກູເວດ ຄົບຮອບ 62 ປີ.

ຂ້າພະເຈົ້າ ມີຄວາມປິຕິຍິນດີເປັນຢ່າງຍິ່ງທີ່ເຫັນວ່າ ສາຍພົວພັນມິດຕະພາບ ແລະ ການຮ່ວມມືທີ່ດີ ລະຫວ່າງ ສປປ ລາວ ແລະ ລັດກູເວດ ໄດ້ຮັບການພັດທະນາຢ່າງຕໍ່ເນື່ອງ ໃນຊຸມປີຜ່ານມາ. ຂ້າພະເຈົ້າ ຫວັງວ່າ ຈະໄດ້ເຮັດວຽກຮ່ວມກັບ ສົມເດັດ ຢ່າງໃກ້ຊິດ ເພື່ອສົ່ງເສີມສາຍພົວພັນມິດຕະພາບ ແລະ ການຮ່ວມມື ແນ່ໃສ່ ນໍາເອົາຜົນປະໂຫຍດ ມາສູ່ ປະຊາຊົນສອງຊາດພວກເຮົາ.

ຂ້າ​ພະ​ເຈົ້າ ຂໍ​ຖື​ໂອ​ກາດນີ້ ອວຍ​ພອນໄຊ​ອັນປະເສີດ ມາຍັງ​ ສົມເດັດ ຈົ່ງ​ມີ​ພະ​ລາ​ນາ​ໄມສົມ​ບູນ, ມີ​ຄວາມ​ຜາ​ສຸກ ແລະ ຂໍໃຫ້ປະສົບຜົນສໍາເລັດໃນຫນ້າທີ່ອັນມີກຽດສູງສົ່ງຂອງ ສົມເດັດ.

ດ້ວຍ​ຄວາມ​ນັບ​ຖື​ຢ່າງ​ສູງ,

ສອນໄຊ ສີພັນດອນ

ສົມເດັດ ເຊັກຄ໌ ອາມັດ ນາວາບຟ໌ ອານ-ອາມັດ ອານ-ຊາບາ

ນາຍົກລັດຖະມົນຕີ ແຫ່ງ ລັດ ກູເວດ

ທີ່ ກູເວດ

-------------------------------------------------------------------------------

ພະນະທ່ານ,

ຂ້າພະເຈົ້າ ຂໍສະແດງຄວາມຊົມເຊີຍອັນອົບອຸ່ນ ແລະ ພອນໄຊອັນປະເສີດ ມາຍັງ ພະນະທ່ານ ແລະ ພະນັກງານກະຊວງການຕ່າງປະເທດ ແຫ່ງ ລັດກູເວດ ທຸກຖ້ວນໜ້າ ເນື່ອງໃນໂອກາດວັນຊາດ ແຫ່ງ ລັດກູເວດ ຄົບຮອບ 62 ປີ.

ຂ້າພະເຈົ້າ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສອງປະເທດພວກເຮົາ ທີ່ໄດ້ຮັບການພັດທະນາປັນໄລຍະເວລາຫຼາຍກວ່າ 1 ທົດສະວັດ. ຂ້າພະເຈົ້າ ຫວັງເປັນຢ່າງຍິ່ງວ່າ ຈະໄດ້ຮ່ວມເຮັດວຽກກັບ ພະນະທ່ານ ເພື່ອເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ທີ່ມີຢູ່ແລ້ວນັ້ນ ລະຫວ່າງ ສປປ ລາວ ແລະ ກູເວດ ກໍຄື ລະຫວ່າງ ສອງກະຊວງການຕ່າງປະເທດຂອງພວກເຮົາ ເພື່ອຜົນປະໂຫຍດຮ່ວມມກັນ ຂອງສອງຊາດພວກເຮົາ ກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາຢູ່ ພາກພື້ນ ແລະ ໃນໂລກ.

ຂ້າພະເຈົ້າ ຂໍຖືໂອກາດນີ້ອວຍພອນໃຫ້ ພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດ ໃນໜ້າທີ່ອັນມີກຽດສູງສົ່ງຂອງ ພະນະທ່ານ.

ສະເຫຼີມໄຊ ກົມມະສິດ

ພະນະທ່ານ ເຊັກຄ໌ ຊາເລັມ ອັບດຸນລາ ອານ-ຈາເບີ ອານ-ຊາບາ

ລັດຖະມົນຕີກະຊວງການຕ່າງປະເທດ ແຫ່ງ ລັດກູເວດ.

ທີ່ ກູເວດ