ພະນະທ່ານ ດາໂຕະ ໄຊຟຸດດິນ ບິນ ອັບດຸນລາ
ລັດຖະມົນຕີກະຊວງການຕ່າງປະເທດແຫ່ງມາເລເຊຍ
ທີ່ກົວລາລໍາເປີ
ພະນະທ່ານ,
ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ແລະ ພອນໄຊອັນປະເສີດມາຍັງ ພະນະທ່ານ ເນື່ອງໃນໂອກາດທີ່ ພະນະທ່ານໄດ້ຮັບແຕ່ງຕັ້ງໃຫ້ດຳລົງຕຳແໜ່ງເປັນ ລັດຖະມົນຕີກະຊວງການຕ່າງປະເທດ ແຫ່ງ ມາເລເຊຍອີກໜຶ່ງສະໄໝ.
ຂ້າພະເຈົ້າຫວັງວ່າຈະໄດ້ເຮັດວຽກຮ່ວມກັບ ພະນະທ່ານຢ່າງໃກ້ຊິດ ໂດຍສະເພາະການເປັນປະທານຮ່ວມກົນໄກການຮ່ວມມືຂອງຄະນະກໍາມາທິການ ວ່າດ້ວຍ ການຮ່ວມມືສອງຝ່າຍຫຼື (JCBC) ເພື່ອສືບຕໍ່ຮັດແໜ້ນແລະ ເສີມຂະຫຍາຍສາຍພົວພັນມິດຕະພາບອັນເປັນມູນເຊື້ອ ແລະ ການຮ່ວມມື ທີ່ມີມາແຕ່ດົນນານ ລະຫວ່າງ ສອງກະຊວງການຕ່າງປະເທດພວກເຮົາ ໃຫ້ແຕກດອກອອກຜົນຍິ່ງໆ ຂຶ້ນໃນຊຸມປີຕໍ່ໜ້າທັງໃນຂອບສອງຝ່າຍແລະ ຫຼາຍຝ່າຍກໍຄືໃນຄອບຄົວອາຊຽນ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດພວກເຮົາ.
ຂ້າພະເຈົ້າຂໍຖືໂອກາດນີ້ອວຍພອນໄຊໃຫ້ພະນະທ່ານຈົ່ງມີພະລະນາໄມສົມບູນ, ມີຄວາມຜາສຸກແລະປະສົບຜົນສຳເລັດໃນໜ້າທີ່ວຽກງານອັນສູງສົ່ງຂອງ ພະນະທ່ານ.
ດ້ວຍຄວາມນັບຖືຢ່າງສູງ,
ສະເຫຼີມໄຊ ກົມມະສິດ
ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ
ນະຄອນຫຼວງວຽງຈັນ, ວັນທີ 30 ສິງຫາ 2021