ນະຄອນຫຼວງວຽງຈັນ, ວັນທີ 08 ກຸມພາ 2021

ສະຫາຍ ສີ ຈິ້ນຜິງ ທີ່ນັບຖື,

            ຕາງໜ້າໃຫ້ພັກ, ລັດຖະບານ ແລະ ປະຊາຊົນລາວ ທຸກທົ່ວໜ້າ, ຂ້າພະເຈົ້າ ຂໍສະແດງຄວາມຂອບໃຈຢ່າງສຸດຊຶ້ງ ແລະ ຮູ້ບຸນຄຸນຢ່າງລົ້ນເຫລືອ ມາຍັງສະຫາຍ ທີ່ໄດ້ສົ່ງຢາວັກຊີນ ປ້ອງກັນພະຍາດໂຄວິດ-19 ແລະ ອຸປະກອນການແພດຈຳນວນຫລວງຫລາຍ ມາຊ່ວຍ ສປປ ລາວ ພວກຂ້າພະເຈົ້າໃນຄັ້ງນີ້ ເພື່ອນຳໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢູ່ ສປປ ລາວ.

          ຂ້າພະເຈົ້າ ມີຄວາມຮູ້ສຶກຕື້ນຕັນໃຈ ແລະ ຮູ້ບຸນຄຸນເປັນຢ່າງຍິ່ງມາຍັງພັກ ແລະ ປະຊາຊົນຈີນ ອ້າຍນ້ອງ ທີ່ຍາມໃດກໍ່ມີຄວາມເປັນຫວ່ງ ເປັນໃຍ ແລະ ໃຫ້ການຊ່ວຍເຫລືອອັນລ້ໍາຄ່າແກ່ພວກຂ້າພະເຈົ້າຕະຫລອດມາ          ໂດຍສະເພາະໃນຍາມຫຍຸ້ງຍາກຄືແນວນີ້, ອັນເປັນການສະແດງໃຫ້ເຫັນເຖິງການເປັນເພື່ອນມິດສະຫາຍອ້າຍນ້ອງທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານ ຫມັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ, ຈີນ-ລາວ

          ຂ້າພະເຈົ້າ ຂໍຖືໂອກາດນີ້ ສະແດງຄວາມຍິນດີ ແລະ ຊົມເຊີຍມາຍັງ ພັກກອມມູນິດຈີນ ພາຍໃຕ້ການ         ຊີ້ນຳ-ນຳພາ ທີ່ເຂັ້ມແຂງຂອງສະຫາຍ ຕໍ່ຜົນສຳເລັດໃນການສະກັດກັ້ນ ແລະ ຄວບຄຸມການແຜ່ລະບາດຂອງພະຍາດ         ໂຄວິດ-19 ທີ່ ສປ ຈີນ ກໍ່ຄື ຄວາມສຳເລັດໃນການຜະລິດວັກຊິນທີ່ມີຄຸນນະພາບສູງ ເພື່ອສະຫນອງໃຫ້ແກ່ ປະຊາຊົນຈີນ ກໍ່ຄືປະເທດຕ່າງໆໃນໂລກ ແນໃສ່ການຕ້ານການແຜ່ລະບາດພະຍາດລະບາດຮ້າຍແຮງດັ່ງກ່າວ. ອັນນີ້ເປັນການຢັ້ງຢືນໃຫ້ປະຊາຄົມໂລກເຫັນໄດ້ເຖິງ ການນຳພາອັນສະຫຼາດສ່ອງໃສ ຂອງພັກກອມມູນິດຈີນ ແລະ ບົດບາດອິດທິພົນຂອງ ສປ ຈີນ ທີ່ນັບມື້ ນັບສູງເດັ່ນຂຶ້ນໃນເວທີພາກພື້ນ ແລະ ສາກົນ.

            ອີກເທື່ອຫນຶ່ງ, ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈມາຍັງ ສະຫາຍ ແລະ ຜ່ານສະຫາຍ ໄປຍັງການນຳພັກ ແລະ ປະຊາຊົນຈີນອ້າຍນ້ອງ ຕໍ່ການຊ່ວຍເຫຼືອອັນລ້ຳຄ່າດັ່ງກ່າວ. ເນື່ອງໃນໂອກາດປີໃຫມ່ຈີນ ປີ 2021 ທີ່ຈະມາເຖິງນີ້, ຂ້າພະເຈົ້າ ຂໍອວຍພອນ ມາຍັງສະຫາຍ ແລະ ປະຊາຊົນຈີນທຸກຖ້ວນຫນ້າ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃນຫນ້າທີ່ວຽກງານ ຂອງສະຫາຍ.

          ດ້ວຍ​ຄວາມ​ນັບ​ຖື​ຮັກແພງ.

                                                                                    ທອງລຸນ ສີສຸລິດ

ສະຫາຍ ສີ ຈິ້ນຜິງ,

ເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ.

ທີ່ ນະຄອນຫລວງປັກກິ່ງ.

ສະ​ຫາຍ ຫລີ ເຄີ້ສຽງ ທີ່ ນັບຖື,

ໃນນາມລັດຖະບານ ແລະ ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ, ຂ້າພະເຈົ້າ        ຂໍສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງຍິ່ງ ມາຍັງສະຫາຍ ກໍ່ຄືລັດຖະບານ ແລະ ປະຊາຊົນຈີນ ທີ່ໄດ້ໃຫ້ການຊ່ວຍເຫລືອຢາວັກຊິນປ້ອງກັນພະຍາດໂຄວິດ-19 ຈໍານວນ 300,000 ໂດສ ແລະ ເຊີແລງ ຈຳນວນ 300,800 ອັນ ໃຫ້ແກ່ ສປປ ລາວ ພວກຂ້າພະເຈົ້າ ເພື່ອນໍາໃຊ້ເຂົ້າໃນການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດ   ໂຄວິດ-19 ຢູ່ ສປປ ລາວ.

       ຂ້າພະເຈົ້າ ມີຄວາມຮູ້ສຶກຕື້ນຕັນໃຈ ທີ່ລັດຖະບານ ແລະ ປະຊາຊົນຈີນອ້າຍນ້ອງ ຍາມໃດກໍ່ໄດ້ມີຄວາມເປັນຫ່ວງເປັນໃຍ ແກ່ພວກຂ້າພະເຈົ້າ ໃນຍາມຫຍຸ້ງຍາກ ເຖິງແມ່ນວ່າລັດຖະບານ ແລະ ປະຊາຊົນຈີນເອງ ກໍ່ໄດ້ຮັບຜົນກະທົບຈາກພະຍາດລະບາດດັ່ງກ່າວ ແລະ ພົບຄວາມຫຍຸ້ງຍາກເຊັ່ນດຽວກັນ, ແຕ່ກໍ່ໄດ້ບິແບ່ງການຊ່ວຍເຫລືອອັນລ້ຳຄ່າ ແລະ ທັນການ ມາໃຫ້ແກ່ ລັດຖະບານ ແລະ ປະຊາຊົນລາວ, ອັນເປັນການສະແດງໃຫ້ເຫັນເຖິງການເປັນເພື່ອນມິດຖານສະຫາຍອ້າຍນ້ອງທີ່ເປັນມູນເຊື້ອ, ຄູ່ຮ່ວມມືຍຸດທະສາດຮອບດ້ານ ຫມັ້ນຄົງ ຍາວນານ ຕາມທິດ 4 ດີ ແລະ ການເປັນຄູ່ຮ່ວມຊາຕາກຳ ລາວ-ຈີນ, ຈີນ-ລາວ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຈີນ ທີ່ນັບມື້ ນັບໄດ້ຮັບການເສີມຂະຫຍາຍ ເຂົ້າສູ່ລວງເລິກຢ່າງບໍ່ຢຸດຢັ້ງ.

            ອີກເທື່ອຫນຶ່ງ, ຂ້າພະເຈົ້າ ຂໍສະແດງຄວາມຂອບໃຈຢ່າງຈິງໃຈ ມາຍັງສະຫາຍ, ລັດຖະບານ ແລະ ປະຊາຊົນຈີນອ້າຍນ້ອງ ຕໍ່ການຊ່ວຍເຫລືອໃນຄັ້ງນີ້. ເນື່ອງໃນບຸນປີໃຫມ່ຈີນ ປີ 2021 ທີ່ຈະມາເຖິງນີ້, ຂ້າພະເຈົ້າ ຂໍອວຍພອນໄຊອັນປະເສີດມາຍັງສະຫາຍ, ການນຳພັກ, ລັດຖະບານ ກໍ່ຄືປະຊາຊົນຈີນ ທຸກຖ້ວນຫນ້າ ຈົ່ງມີສຸຂະພາບເຂັ້ມແຂງ,    ມີຄວາມຜາສຸກ ແລະ ປະສົບຜົນສຳເລັດ   ໃໝ່ໃຫຍ່ຫລວງກວ່າເກົ່າ ໃນຫນ້າທີ່ອັນມີກຽດສະຫງ່າງາມ ຂອງສະຫາຍ.

          ດ້ວຍ​ຄວາມ​ນັບ​ຖື​ຮັກແພງ.

                                                                                    ທອງລຸນ ສີສຸລິດ

ສະຫາຍ ຫລີ ເຄີ້ສຽງ,

ນາຍົກລັດຖະມົນຕີ ແຫ່ງ ສປ ຈີນ

ທີ່ ນະຄອນຫລວງປັກກິ່ງ.