ຮຽນ: ພະນະທ່ານ ທອງລຸນ ສີສຸລິດ
ຂ້າພະເຈົ້າ ຂໍສະແດງຄວາມຍິນດີ ທີ່ກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກປະຊາຊົນ ປະຕິວັດລາວ ທີ່ໄດ້ຮັບຜົນສໍາເລັດເປັນຢ່າງດີ ແລະ ຂໍສະແດງຄວາມຍິນດີກັບທ່ານ ທີ່ໄດ້ຮັບເລືອກຕັ້ງເປັນ ເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນ ປະຕິວັດລາວ, ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນ ຈາກສະມາຊິກພັກ ເນື່ອງຈາກທ່ານມີຜົນງານໃນການບໍລິຫານປະເທດ ຕະຫຼອດໄລຍະ 5 ປີຜ່ານມາ. ຂ້າພະເຈົ້າ ເຊື່ອໝັ້ນເປັນຢ່າງຍິ່ງວ່າ ພາຍໃຕ້ການນໍາພາຂອງທ່ານ ສາທາລະນະລັດ ປະຊາທິປະໄຕ ປະຊາຊົນລາວ ຈະມີຄວາມຈະເລີນຮຸ່ງເຮືອງ ແລະ ປະຊາຊົນລາວ ຈະມີຊີວິດການເປັນຢູ່ທີ່ດີຍິ່ງໆຂື້ນ.
ຂ້າພະເຈົ້າ ຍິນດີທີ່ໄດ້ຮ່ວມເຮັດວຽກກັບທ່ານຢ່າງໃກ້ຊິດ ໃນການພັດທະນາສາຍພົວພັນໄທ-ລາວ ໃຫ້ແໜ້ນແຟ້ນຍິ່ງໆຂື້ນ ໃນຖານະເພື່ອນບ້ານທີ່ໃກ້ຊິດ ຕະຫຼອດໄລຍະ 5 ປີຜ່ານມາ. ຂ້າພະເຈົ້າ ຂໍຢືນຢັນວ່າ ຈະສືບຕໍ່ຊຸກຍູ້ການເປັນຄູ່ຮ່ວມຍຸດທະສາດ ເພື່ອການຈະເລີນເຕີບໂຕ ແລະ ການພັດທະນາແບບຢືນຍົງ ໃຫ້ເກີດຜົນເປັນຮູບປະທໍາ ໂດຍສະເພາະໃນໂອກາດ ຄົບຮອບ 70 ປີ ການສ້າງຕັ້ງສາຍພົວພັນການທູດ ລະຫວ່າງ ໄທ ກັບ ສປປ ລາວ ເພື່ອໃຫ້ສອງປະເທດກ້າວໄປໜ້າ ຢ່າງໝັ້ນຍືນ ຮັ່ງມີ ແລະ ຢືນຍົງ.
ສຸດທ້າຍນີ້, ຂ້າພະເຈົ້າ ແລະ ຄອບຄົວ ຂໍພາວານາຄຸນພະສີລັດຕະນະໄຕ ແລະ ສິ່ງສັກສິດທັງຫຼາຍຈົ່ງປົກປ້ອງທ່ານ ແລະ ທ່ານ ນ. ນາລີ ພ້ອມດ້ວຍຄອບຄົວ ຈົ່ງປະສົບຜົນສໍາເລັດໃນໜ້າທີ່ການງານ ມີສຸຂະພາບແຂງແຮງ ແລະ ຄວາມວັດທະນະຖາວອນຕະຫຼອດໄປ.
ພົນເອກ ປຣະຢຸດ ຈັນໂອຊາ
ນາຍົກລັດຖະມົນຕີ ແຫ່ງ ຣາຊະອານາຈັກໄທ
ຮຽນ: ພະນະທ່ານ ສະເຫຼີມໄຊ ກົມມະສິດ
ໃນຖານະເພື່ອນທີ່ໄດ້ເຮັດວຽກຮ່ວມກັນມາ ຂ້າພະເຈົ້າ ຂໍສະແດງຄວາມຍິນດີກັບທ່ານ ທີ່ໄດ້ຮັບເລືອກໃຫ້ດໍາລົງຕໍາແໜ່ງສໍາຄັນ ໃນການບໍລິຫານປະເທດ ສປປ ລາວ ໃນຖານະກໍາມະການກົມການເມືອງສູນກາງ ພັກປະຊາຊົນ ປະຕິວັດລາວ ເຊິ່ງສະແດງໃຫ້ເຫັນເຖິງຄວາມເຊື່ອໝັ້ນ ຈາກສະມາຊິກ ພັກປະຊາຊົນ ປະຕິວັດລາວ ໃນການດໍາເນີນນະໂຍ ບາຍການຕ່າງປະເທດ ຂອງທ່ານທີ່ໄດ້ຮັບໝາກຜົນ ຕະຫຼອດໄລຍະເວລາ 5 ປີຜ່ານມາ.
ຂ້າພະເຈົ້າ ຂໍຢືນຢັນ ທີ່ຈະສືບຕໍ່ຮ່ວມມືກັບທ່ານ ຢ່າງໃກ້ຊິດ ເພື່ອເສີມສ້າງຄວາມໝັ້ນຄົງ ແລະ ຄວາມຈະເລີນຮຸ່ງເຮືອງຂອງທັງສອງປະເທດ ແລະ ພາກພື້ນຕໍ່ໄປ ໂດຍສະເພາະໃນໂອກາດ ຄົບຮອບ 70 ປີ ການສ້າງຕັ້ງສາຍພົວພັນການທູດ ລະຫວ່າງ ໄທ ແລະ ສປປ ລາວ.
ຂ້າພະເຈົ້າ ຂໍຖືໂອກາດນີ້ ອວຍພອນໃຫ້ທ່ານ ແລະ ຄອບຄົວ ຈົ່ງປະສົບຄວາມສໍາເລັດໃນໜ້າທີ່ການງານ ມີຄວາມຜາສຸກ ແລະ ມີພາລານາໄມທີ່ແຂງແຮງຕະຫຼອດໄປ.
ດອນ ປະຣະມັດວິໄນ
ຮອງນາຍົກລັດຖະມົນຕີ ແລະ
ລັດຖະມົນຕີວ່າການກະຊວງການຕ່າງປະເທດ ແຫ່ງ ຣາຊະອານາຈັກໄທ