ນະຄອນຫຼວງວຽງຈັນ, ວັນທີ       ສິງຫາ 2020

ສົມເດັດ ຣາຊາທິບໍດີ,

ໃນ​ນາມ​ປະຊາຊົນລາວທັງຊາດ ​ແລະໃນ​ນາມ​ສ່ວນ​ຕົວ, ຂ້າພະ​ເຈົ້າ​ ຂໍສະແດງຄວາມຊົມ​ເຊີຍ​ອັນ​ອົບ​ອຸ່ນແລະພອນ​ໄຊ​ອັນ​ປະ​ເສີດ​ມາ​ຍັງສົມເດັດ ຣາຊາທິບໍດີ ແລະ ປະຊາຊົນມາເລເຊຍ ​ເພື່ອນ​ມິດທຸກຖ້ວນໜ້າເນື່ອງ​ໃນ​ໂອກາດ​ວັນຊາດ​ແຫ່ງ ມາເລເຊຍຄົບຮອບ 63ປີ.

ຂ້າພະເຈົ້າ ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືອັນດີງາມ ລະຫວ່າງ ສປປ ລາວ ແລະ ມາເລເຊຍ ທີ່ໄດ້ຮັບການພັດທະນາ ແລະ ຂະຫຍາຍຕົວໃນຫຼາຍດ້ານຕະຫຼອດໄລຍະເວລາຫຼາຍກວ່າ 5 ທົດສະວັດທີ່ຜ່ານມາ. ຂ້າພະເຈົ້າເຊື້ອໝັ້ນຢ່າງໜັກແໜ້ນວ່າ ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອທີ່ດີດັ່ງກ່າວ ລະຫວ່າງສອງປະເທດ ​ພວກເຮົາຈະ​ສືບ​ຕໍ່ໄດ້ຮັບການເສີມຂະຫຍາຍ ແລະ ຮັດແໜ້ນໃຫ້ເຂົ້າສູ່ລວງເລິກ ແລະ ແຕກດອກອອກຜົນຍິ່ງໆຂຶ້ນໃນຊຸມປີຕໍ່ໜ້າ ເພື່ອນໍາເອົາ​ຜົນ​ປະ​ໂຫຍ​ດຕົວຈິງມາສູ່ປະຊາຊົນ​ສອງ​ຊາດ​ ກໍຄື ເພື່ອສັນຕິພາບ, ສະຖຽນລະພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ ໃນໂລກ.

ຂ້າພະ​ເຈົ້າ​ ຂໍຖື​ໂອກາດອັນສະຫງ່າລາສີນີ້ ອວຍພອນ​ໄຊອັນປະເສີດແດ່ ສົມເດັດຣາຊາທິບໍດີ ​ຈົ່ງ​ມີພະລາ​ນາ​ໄມ​ສົມ​ບູນ, ມີຄວາມຜາສຸກແລະ ປະສົບຜົນສໍາເລັດໃນໜ້າທີ່ອັນສູງສົ່ງຂອງພະອົງ ແລະ ຂໍໃຫ້ປະຊາຊົນມາເລເຊຍ ຈົ່ງສືບຕໍ່ມີຄວາມຈະເລີນກ້າວໜ້າ ແລະ ວັດທະນະຖາວອນຍິ່ງໆຂຶ້ນ.

​

         ດ້ວຍ​ຄວາມ​ເຄົາລົບ ​ແລະນັບຖື​ເປັນ​ຢ່າງ​ສູງ.

                                                           ບຸນຍັງ ວໍລະຈິດ

                                             ປະທານປະເທດ ແຫ່ງ ສປປ ລາວ

ສົມເດັດ ອັນ-ຊຸນຕານ ອັບ​ດູນລາ ຣີ ອາຢາ​ຕູ​ດິນ

ອັນ-ມູສຕາຟາບິ​ນລາຊາອິບນີອັນ-ມາຣູມ

ຊູນຕານຮາ​ຈິອາ​ມັດຊາ ​ອັນ-ມູສຕາອິນບິ​ນລາ

ເຈົ້າຊີວິດ ແຫ່ງ ມາເລເຊຍ

ທີ່ ກົວລາລຳເປີ

  ນະຄອນຫຼວງວຽງຈັນ, ວັນທີ   ສິງຫາ 2020

 ພະນະ​ທ່ານ,

 ເນື່ອງໃນໂອກາດວັນຊາດ​ແຫ່ງມາເລເຊຍຄົບຮອບ 63ປີ, ໃນນາມລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມຊົມເຊີຍຢ່າງຈິງໃຈ ແລະ ພອນໄຊອັນປະເສີດ ມາຍັງ ພະນະທ່ານ ແລະ ຜ່ານ ພະນະທ່ານ    ໄປຍັງ ລັດຖະບານ ແລະ ປະຊາຊົນມາເລເຊຍ ເພື່ອນມິດທຸກຖ້ວນໜ້າ.

 ຂ້າພະ​ເຈົ້າມີ​ຄວາມ​ພາກພູມໃຈ​ເປັນ​ຢ່າງ​ຍິ່ງ​ ທີ່ເຫັນວ່າຕະຫຼອດໄລຍະ5ທົດສະວັດກວ່າ     ຜ່ານມາ,ສາຍພົວພັນມິດຕະພາບ ແລະ ການຮ່ວມມືທີ່ດີງາມ ຂອງສອງ​ປະ​ເທດ​ພວກ​ເຮົາ​ໄດ້​ຮັບ​ການສົ່ງ​ເສີມໃຫ້ຂະຫຍາຍຕົວຢ່າງ​ຕໍ່​ເນື່ອງທັງໃນຂອບສອງຝ່າຍແລະຫຼາຍຝ່າຍ. ຂ້າພະເຈົ້າ ພ້ອມແລ້ວທີ່ຈະເຮັດວຽກຮ່ວມກັບ ພະນະທ່ານ ຢ່າງ​ໃກ້ຊິດ ​ເພື່ອຮັດແໜ້ນການ​ພົວພັນ​ໃຫ້​​ແຕກດອກ​ອອກ​ຜົນ​ຍິ່ງໆຂຶ້ນ ​ໃນ​ຊຸມ​ປີ​ຕໍ່​ໜ້າ ເພື່ອ​ຜົນ​ປະ​ໂຫຍ​ດຂອງ​ປະຊາຊົນ​ສອງ​ຊາດ ລາວ ແລະ ມາເລເຊຍ​ກໍ​ຄືເພື່ອ​ສັນຕິພາບ, ສະຖຽນ​ລະ​ພາບ ແລະ ການຮ່ວມມື ເພື່ອການພັດທະນາໃນພາກພື້ນ ແລະ     ໃນໂລກ.

 ໃນໂອກາດອັນສະຫງ່າລາສີນີ້, ຂ້າພະເຈົ້າຂໍອວຍພອນໄຊອັນປະເສີດ ມາຍັງພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນສໍາເລັດໃນໜ້າທີ່ວຽກງານອັນມີກຽດສູງສົ່ງຂອງພະນະທ່ານ.

         ດ້ວຍ​ຄວາມ​ເຄົາລົບ ​ແລະນັບຖື​ເປັນ​ຢ່າງ​ສູງ.

                                                                    ທອງລຸນ ສີສຸລິດ

                                                            ນາຍົກລັດຖະມົນຕີ ແຫ່ງ ສປປ ລາວ

ພະນະທ່ານ ຕັນ ສຣິ ດາໂຕະ ມູຢິດດິນ ໂມດ ຢັດຊິນ

ນາຍົກລັດຖະມົນຕີ ແຫ່ງ ມາເລເຊຍ

ກົວລາລຳເປີ