ນະຄອນຫຼວງວຽງຈັນ, 07 ກຸມພາ 2019

ພະນະທ່ານ,

ໃນ​ນາມ​ລັດ​ຖະ​ບານ, ປະ​ຊາ​ຊົນລາວ ທຸກຖ້ວນໜ້າ ແລະ ໃນນາມສ່ວນຕົວ, ຂ້າພະເຈົ້າ ມີ​ຄວາມ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ ​ສົ່ງ​ຄຳ​ຊົມ​ເຊີຍ​ອັນ​ອົບ​ອຸ່ນ ​ແລະ ຈິງ​ໃຈ ມາ​ຍັງ ພະນະ​​ທ່ານ ​ເນື່ອງ​ໃນ​ໂອກາດ ທີ່ ​ພະນະທ່ານ ​ໄດ້​ຖືກແຕ່ງຕັ້ງ​​ດຳລົງ​ຕຳແ​ໜ່​ງເປັນ ຜູ້ສຳເລັດຣາຊະການແຫ່ງເຄືອຈັກກະພົບ ອົດສະຕຣາລີ.

ຂ້າພະເຈົ້າ ຕີ​ລາ​ຄາ​ສູງ​ຕໍ່​ສາຍ​ພົວ​ພັນ​ມິດຕະພາບອັນຍາວນານ ແລະ ການຮ່ວມ​ມື​ທີ່ມີປະສິດທິພາບ​ລະ​ຫວ່າງ ສປປ ລາວ ແລະ ອົດສະຕຣາລີ ທີ່ສືບຕໍ່ຂະຫຍາຍຕົວຢ່າງຕໍ່ເນື່ອງຕະຫຼອດ​ໄລ​ຍະ 66 ປີ​ ທີ່​ຜ່ານ​ມາ. ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນມາຍັງລັດຖະບານ ແລະ ປະຊາຊົນ ອົດສະຕຣາລີ ທີ່ໄດ້ໃຫ້ການສະນັບສະໜູນ ແລະ ຊ່ວຍເຫລືອອັນລໍ້າຄ່າແກ່ ສປປ ລາວ ໃນໄລຍະຜ່ານມາ ອັນໄດ້ປະກອບສ່ວນສໍາຄັນເຂົ້າໃນການພັດທະນາເສດຖະກິດ-ສັງຄົມ ຂອງ ສປປ ລາວ.

ໃນໄລຍະຜ່ານມາສອງປະເທດ ໄດ້ມີການແລກປ່ຽນການຢ້ຽມຢາມ ລະຫວ່າງຄະນະຜູ້ແທນຂັ້ນຕ່າງໆ ຢ່າງເປັນປົກກະຕິ. ເຫດການທີ່ພົ້ນເດັ່ນໃນປີ 2018 ແມ່ນການພົບປະສອງຝ່າຍ ລະຫວ່າງ ສອງນາຍົກລັດຖະມົນຕີ ໃນໂອກາດເຂົ້າຮ່ວມກອງປະຊຸມສຸດຍອດ ອາຊຽນ-ອົດສະຕຣາລີ ສະໄໝພິເສດ ໃນເດືອນມີນາ ທີ່ ອົດສະຕຣາລີ.

ຂ້າພະເຈົ້າ ເຊື່ອໝັ້ນວ່າ ສາຍພົວພັນມິດຕະພາບອັນຍາວນານຂອງສອງປະເທດພວກເຮົາ ຈະສືບຕໍ່ໄດ້ຮັບການເສີມຂະຫຍາຍ ແລະ ຫວັງຢ່າງຍິ່ງວ່າຈະໄດ້ເຮັດວຽກຮ່ວມກັບ ພະນະທ່ານ ໃນຊຸມປີຕໍ່ໜ້າ ເພື່ອນໍາເອົາຜົນປະໂຫຍດຕົວຈິງມາສູ່ປະຊາຊົນສອງຊາດພວກເຮົາ.

ຂ້າພະເຈົ້າ ຂໍຖືໂອກາດອັນສະຫງ່າລາສີນີ້ ອວຍພອນໃຫ້ ພະນະທ່ານ ຈົ່ງມີພະລານາໄມສົມບູນ, ມີຄວາມຜາສຸກ ແລະ ປະສົບຜົນ ສຳເລັດໃນພາລະກິດອັນສູງສົ່ງຂອງ ພະນະທ່ານ.

ດ້ວຍຄວາມເຄົາລົບ ແລະ ນັບຖືຢ່າງສູງ.

ບຸນ​ຍັງວໍ​ລະ​ຈິດ

ພະນະທ່ານ ເດວິດ ເຮີເລ

ຜູ້ສຳເລັດຣາຊະການແຫ່ງເຄືອຈັກກະພົບ ອົດສະຕຣາລີ

ທີ່ ແຄນເບີຣາ