ພະນະທ່ານ ທອງລຸນ ສີສຸລິດ
ນາຍົກລັດຖະມົນຕີ
ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ
ທີ່ ນະຄອນຫຼວງວຽງຈັນ
ພະນະທ່ານ ນາຍົກລັດຖະມົນຕີ,
ຂ້າພະເຈົ້າ ໄດ້ຮັບຊາບຂ່າວດ້ວຍຄວາມເສົ້າໂສກ ກ່ຽວກັບອຸທົກກະໄພນໍ້າຖ້ວມທີ່ຮຸນແຮງ ຫຼັງຈາກເຂື່ອນເຊປຽນ-ເຊນໍ້ານ້ອຍແຕກ ໃນປະເທດຂອງພະນະທ່ານ ອັນເປັນສາເຫດໃຫ້ມີຜູ້ເສຍຊີວິດ ແລະ ຜູ້ສູນຫາຍເປັນຈຳນວນຫຼວງຫຼາຍ. ຂ້າພະເຈົ້າຫວັງວ່າ ສະພາບການດັ່ງກ່າວຈະມີສະຖຽນລະພາບ ແລະ ຈະບໍ່ມີເຫດການນໍ້າຖ້ວມອີກເນື່ອງຈາກເຂື່ອນພັງລົງຢ່າງສີ້ນເຊີງ.
ຂ້າພະເຈົ້າ ຂໍສະແດງຄວາມເຫັນອົກເຫັນໃຈຢ່າງຈິງໃຈມາຍັງພະນະທ່ານ ແລະ ປະຊາຊົນລາວ ຂອງທ່ານ ໂດຍສະເພາະແມ່ນຄວາມອາໄລອາວອນຕໍ່ຄອບຄົວຜູ້ທີ່ໄດ້ຮັບເຄາະຮ້າຍ ແລະ ບາດເຈັບຈາກເຫດການນີ້, ທີ່ຂ້າພະເຈົ້າຫວັງວ່າ ຈະໄດ້ຮັບການຟື້ນຟູສູ່ສະພາບປົກກະຕິໂດຍໄວ.
ດ້ວຍຄວາມນັບຖືຢ່າງສູງ,
ອັງແກນລາ ແມັກແກນ
ນາຍົກລັດຖະມົນຕີ
ແຫ່ງສາທາລະນະລັດ ສະຫະພັນ ເຢຍລະມັນ
ພະນະທ່ານ,
ຂ້າພະເຈົ້າຂໍສະແດງຄວາມເສຍໃຈດ້ວຍຄວາມຈິງໃຈ ຕໍ່ກັບການສູນເສຍຊິວິດເປັນຈຳນວນຫຼວງຫຼາຍ ແລະ ຄວາມເສຍຫາຍອັນໃຫຍ່ຫຼວງ ເນື່ອງຈາກເຂື່ອນໄຟຟ້າພັງ ທີ່ ສປປ ລາວ.
ຕໍ່ໜ້າໂສກນາດຕະກຳດັ່ງກ່າວ, ຂ້າພະເຈົ້າຂໍໃຫ້ຄອບຄົວ ແລະ ໝູ່ເພື່ອນ ຂອງຜູ້ຖືກເຄາະຮ້າຍ ພ້ອມທັງຄົນທີ່ຮັກ ແລະ ທຸກໆຄົນ ທີ່ຖືກຜົນກະທົບ ຈົ່ງເຂັ້ມແຂງ ແລະ ອົດທົນ. ຂ້າພະເຈົ້າຂໍໃຫ້ມີການ ໂຮມແຮງໂຮມໃຈກັນທົ່ວປະເທດ ສືບຕໍ່ດຳເນີນການກູ້ໄພ, ຊອກຫາຜູ້ຫາຍສາບສູນ ແລະ ແກ້ໄຂຜົນສະທ້ອນທີ່ເຈັບປວດຈາກໄພພິບັດໃນຄັ້ງນີ້ໃຫ້ລຸລ່ວງໄປ.
ດ້ວຍຄວາມນັບຖືຢ່າງສູງ,
ດາລີອາ ກຣີເບົາສໄກເຕ
ປະທານາທິບໍດີ ແຫ່ງ ສາທາລະນະລັດ ລິດທົວເນຍ
ພະນະທ່ານ,
ເພື່ອນຮ່ວມງານ ທີ່ນັບຖື,
ພວກຂ້າພະເຈົ້າ ຂໍສະແດງຄວາມເສຍໃຈຢ່າງເລີກເຊິ່ງ ຕໍ່ການສູນເສຍຊີວິດ ແລະ ປະຊາຊົນຈຳນວນຫຼາຍພັນ ຄອບຄົວ ທີ່ໄດ້ຮັບຜົນກະທົບຈາກອຸປະຕິເຫດໂສກນາດຕະກຳ ກ່ຽວກັບ ເຂື່ອນໄຟ້ຟ້າ ເຊປຽນ-ເຊນ້ຳນ້ອຍ ໃນແຂວງອັດຕະປື. ການດຳເນີນການທີ່ມີປະສິດທິພາບ ແລະ ທັນເວລາ ໂດຍ ລັດຖະບານຂອງທ່ານ ໃນການ ຊ່ວຍເຫຼືອປະຊາຊົນທີ່ຕົກທຸກໄດ້ຍາກ ສົມຄວນໄດ້ຮັບການເຄົາລົບນັບຖືຈາກພວກຂ້າພະເຈົ້າ ແລະ ແນ່ນອນແລ້ວ ເປັນການຊ່ວຍແບ່ງເບົາຄວາມທຸກທໍລະມານຂອງຜູ້ທີ່ໄດ້ຮັບຜົນກະທົບ.
ໃນນາມສ່ວນຕົວ, ໃນນາມລັດຖະບານ ແລະ ໃນນາມປະຊາຊົນປອກຕຸຍການ, ຂ້າພະເຈົ້າ ຂໍສົ່ງຄວາມເສົ້າສະຫຼົດໃຈອັນຈິງໃຈທີ່ສຸດ ມາຍັງພະນະທ່ານ, ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ຄອບຄົວຜູ້ຖືກເຄາະຮ້າຍທັງຫຼາຍ ແລະ ຂໍໃຫ້ການບໍລິການພື້ນຖານຕ່າງໆຢູ່ໃນເມືອງທີ່ໄດ້ຮັບຜົນກະທົບທັງໝົດ ໄດ້ຮັບການຟື້ນຟູຄືນໂດຍໄວ.
ດ້ວຍຄວາມນັບຖືຢ່າງສູງ,
ໂອກັດໂຕ ຊານໂຕສ໌ ຊິນວາ
ລັດຖະມົນຕີກະຊວງການຕ່າງປະເທດ ປອກຕຸຍການ