ນະຄອນຫຼວງພະນົມເປັນ, ວັນທີ 01 ທັນວາ 2017
ພະນະທ່ານ ທອງລຸນ ສີສຸລິດ
ນາຍົກລັດຖະມົນຕີ
ສາທາລະນະລັດ ປະຊາທິປະໄຕ ປະຊາຊົນລາວ
ນະຄອນຫຼວງວຽງຈັນ.
ພະນະທ່ານ,
ໃນນາມຕາງໜ້າລັດຖະບານ ແລະ ປະຊາຊົນ ແຫ່ງ ຣາຊະອານາຈັກ ກຳປູເຈຍ, ຂ້າພະເຈົ້າ ຂໍສົ່ງຄຳຊົມເຊີຍອັນອົບອຸ່ນ ມາຍັງ ພະນະທ່ານ ແລະ ຜ່ານພະນະທ່ານ ໄປຍັງ ລັດຖະບານ ແລະ ປະຊາຊົນ ແຫ່ງ ສປປ ລາວ ເນື່ອງໃນໂອກາດອັນສະຫງ່າລາສີວັນຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ.
ປະເທດລາວ ພາຍໃຕ້ການນຳພາ ຂອງພະນະທ່ານ ແມ່ນສືບຕໍ່ມີສັນຕິພາບ, ມີສະຖຽນລະພາບ ແລະ ເສດຖະກິດມີຄວາມຈະເລີນກ້າວໜ້າ. ລັດຖະບານ ແລະ ປະຊາຊົນລາວ ກໍໄດ້ປະສົບຄວາມສຳເລັດໃນການພັດທະນາເສດຖະກິດ-ສັງຄົມຢ່າງກ້າວກະໂດດ ໃນໄລຍະເວລາ 42 ປີ. ດ້ວຍຄວາມພະຍາຍາມຮ່ວມກັນຂອງພວກເຮົາ, ຂ້າພະເຈົ້າ ຂໍຢືນຢັນຄືນຄວາມມຸ້ງໝັ້ນ ທີ່ຈະສືບຕໍ່ເຮັດວຽກຢ່າງໃກ້ຊິດຮ່ວມກັບ ພະນະທ່ານ ເພື່ອຍົກສູງສາຍພົວພັນສອງຝ່າຍ ໃຫ້ມີບາດກ້າວອັນໃໝ່ທີ່ສູງຂຶ້ນ ເພື່ອຜົນປະໂຫຍດລວມ ຂອງສອງປະເທດ ແລະ ປະຊາຊົນສອງຊາດພວກເຮົາ ກໍຄື ເພື່ອຄວາມຜາສຸກຂອງປະຊາຄົມອາຊຽນ ດ້ວຍການສົ່ງເສີມສັນຕິພາບ, ສະຖຽນລະພາບ ແລະ ການພັດທະນາແບບຍືນຍົງ ໃນພາກພື້ນ ແລະ ໃນໂລກ.
ຂ້າພະເຈົ້າ ຂໍຖືໂອກາດນີ້ ອວຍພອນມາຍັງ ພະນະທ່ານ ຈົ່ງມີສຸຂະພາບແຂງແຮງ ແລະ ປະສົບຜົນສຳເລັດໃນໜ້າທີ່ອັນມີກຽດສູງສົ່ງ ຂອງພະນະທ່ານ ແລະ ຄວາມຈະເລີນຮຸ່ງເຮືອງສີວິໄລ ຂອງປະຊາຊົນລາວ.
ດ້ວຍຄວາມນັບຖືຢ່າງສູງ,
ຮຸນ ແຊນ
ພະນະທ່ານ ສະເຫຼີມໄຊ ກົມມະສິດ
ລັດຖະມົນຕີກະຊວງການຕ່າງປະເທດ
ສາທາລະນະລັດ ປະຊາທິປະໄຕ ປະຊາຊົນລາວ
ນະຄອນຫຼວງວຽງຈັນ
ພະນະທ່ານ, ສະບານດີ ລັດຖະມົນຕີ ແລະ ເພື່ອນ
ຂ້າພະເຈົ້າ ມີຄວາມປິຕີຍິນດີເປັນຢ່າງຍິ່ງ ຂໍສົ່ງຄຳຊົມເຊີຍຢ່າງຈິງໃຈ ມາຍັງ ພະນະທ່ານ ແລະ ເພື່ອນປະຊາຊົນລາວ ເນື່ອງໃນໂອກາດທີ່ມີຄວາມສຸກ ວັນຊາດ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ຄົບຮອບ 42 ປີ.
ກຳປູເຈຍ ແລະ ລາວ ໄດ້ຖະນຸຖະໜອມມິດຕະພາບທີ່ເປັນມູນເຊື້ອອັນຍາວນານຜ່ານການເຕີບໃຫຍ່ດ້ວຍຄວາມເຄົາລົບນັບຖືເຊິ່ງກັນ ແລະ ກັນ, ມິດຕະພາບ ແລະ ການຮ່ວມມືອັນໃກ້ຊິດຂອງພວກເຮົາ ໄດ້ຜ່ານຜົນປະໂຫຍດຫຼາຍຂັ້ນຕອນ ເພື່ອຄວາມຜາສຸກ ແລະ ຄວາມວັດທະນາຖາວອນ ຂອງປະຊາຊົນພວກເຮົາ.
ຂ້າພະເຈົ້າ ເຊື່ອໝັ້ນວ່າ ສາຍພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີ, ບ້ານໃກ້ເຮືອນຄຽງທີ່ດີ ແລະ ການຮ່ວມມືທີ່ເຕັມໄປດ້ວຍໄມຕີຈິດມິດຕະພາບອັນເຂັ້ມແຂງ ລະຫວ່າງສອງປະເທດພວກເຮົາ ໂດຍສະເພາະ ລະຫວ່າງ ສອງກະຊວງການຕ່າງປະເທດ ຈະສືບຕໍ່ແໜ້ນແຟ້ນ ແລະ ເລີກເຊິ່ງຍິ່ງໆຂຶ້ນ ເພື່ອຜົນປະໂຫຍດລວມ ຂອງປະຊາຊົນສອງຊາດພວກເຮົາ ກໍຄືຄວາມເຂັ້ມແຂງຂອງຄອບຄົວອາຊຽນ.
ດ້ວຍຄວາມນັບຖືຢ່າງສູງ ແລະ ຂໍອວຍພອນອັນປະເສີດ ມາຍັງ ພະນະທ່ານ ຈົ່ງມີສຸຂະພາບແຂງແຮງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່ອັນມີກຽດສູງສົ່ງ ຂອງພະນະທ່ານ.
ປຣາກ ໂຊຄົນ