ໃນ​ຕອນ​ເຊົ້າ​ຂອງວັນ​ທີ 28 ພຶດສະພາ 2016, ກະຊວງ​ການ​ຕ່າງປະ​ເທດ​ ໄດ້​ຈັດ​ພິທີປູກຕົ້ນໄມ້ຂຶ້ນຢ່າງເປັນຂະບວນການ ເພື່ອຕ້ອນຮັບ ວັນປູກຕົ້ນໄມ້ແຫ່ງຊາດ ວັນທີ 01 ມິຖຸນາ 2016 ທີ່ຈະມາເຖິງນີ້, ທີ່ ນະຄອນຫລວງວຽງຈັນ, ຊຶ່ງມີ ຫົວຫນ້າ​ຫ້ອງການ, ​ຫົວຫນ້າ​ກົມ, ຮອງ​ກົມ ແລະ ບັນດາພະນັກງານຂອງກະຊວງການຕ່າງປະເທດ ເຂົ້າ​ຮ່ວມ​ຢ່າງ​ພ້ອມພຽງ.

ໃນວັນ​ທີ 29 ​ເມສາ​ ນີ້, ຢູ່​ ນະຄອນຫລວງ​ວຽງ​ຈັນ, ສະຫະພັນ​ກຳມະບານ ​ກະຊວງ​ການ​ຕ່າງປະ​ເທດ ​ໄດ້​ຈັດປາຖະ​ກະຖາ ສະ​ເຫລີ​ມສະຫລອງ​ວັນ​ກຳມະກອນ​ສາກົນ ຄົບຮອບ 130 ປີ (01/05/1886-01/05/2016) ​ເພື່ອ​ເຮັດ​ໃຫ້​ບັນດາ​ສະມາຊິກ​ກຳມະບານ ຢູ່ ​ກະຊວງ​ການ​ຕ່າງປະ​ເທດ ​ໄດ້​ເຊື່ອມ​ຊຶມ​ຢ່າງ​ເລິກ​ເຊິ່ງ​ເຖິງ​ປະຫວັດ​ແຫ່ງ​ການ​ກຳ​ເນີ​ດ, ​ເຕີບ​ໃຫຍ່​ຂະຫຍາຍຕົວ ​ແລະ ພາລະ​ກຳ​ປະຫວັດສາດ​ ຂອງ​ຂະ​ບວນການ​ກຳມະກອນ​ສາກົນ, ຮຽນ​ຮູ້​ເຖິງ​ທາດ​ແທ້​ຂອງ​ຊົນ​ຊັ້ນກຳມະກອນ​ລາວ ພາຍ​ໃຕ້​ການ​ນຳພາ​ຂອງ ​ພັກ​ປະຊາຊົນ​ປະຕິວັດ​ລາວ ​ໃນ​ອະ​ດີດ​ເຖິງ​ປັດຈຸບັນ.

ໃນ​ວັນ​ທີ 21ມີນາ 2016, ທີ່ເດີ່ນເຕະບານສະຕາ, ນະຄອນຫລວງ​ວຽງ​ຈັນ, ໄດ້​ມີການ​ຈັດຕັ້ງ​ພິທີ​ເປີດ​ຂະ​ບວນການສ້າງ​ກິດຈະກຳ ​ເພື່ອ​ຂໍ່ານັບ​ຮັບ​ຕ້ອນ​ວັນສ້າງຕັ້ງພັກປະຊາຊົນ ປະຕິວັດລາວ ​ຄົບຮອບ 61 ປີ (22/03/1955-22/03/2016) ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 61 ປີ (14/04/1955-14/04/2016). ​ໂດຍການ​ໃຫ້​ກຽດເຂົ້າຮ່ວມຂອງ ສະຫາຍ ສະເຫລີມໄຊ ກົມມະສິດ, ກຳມະການ​ສູນ​ກາງ​ພັກ, ເລຂາຄະນະພັກ, ລັດຖະມົນຕີຊ່ວຍວ່າການກະຊວງການຕ່າງປະເທດ, ມີ ສະຫາຍ ອານຸພາບ ວົງໜໍ່ແກ້ວ, ກຳມະການ​ຄະນະ​ບໍລິຫານ​ງານ​ສູນ​ກາງຊາວ​ຫນຸ່ມ​ ປະຊາຊົນ​ ປະຕິວັດ​ລາວ, ເລຂາຄະນະບໍລິຫານງານຊາວໜຸ່ມ ກະຊວງການຕ່າງປະເທດ ພ້ອມ​ດ້ວຍບັນດາສະມາຊິກຊາວໜຸ່ມ ກະຊວງ ຕປທ ເຂົ້າຮ່ວມຢ່າງພ້ອມພຽງ.