ໃນ​ຕອນ​ເຊົ້າ​ວັນ​ທີ 27 ສິງຫາ 2016, ກະຊວງ​ການ​ຕ່າງປະ​ເທດ​ໄດ້​ຈັດ​ຕັ້ງ​ຂະ​ບວນການ​ອອກ​ແຮງ​ງານອະນາ​ໄມຢູ່​ບໍລິ​ເວນ​​ພາຍ​ໃນ​ ​ແລະ ອ້ອມ​ຂ້າງ​ກະຊວງ​ການ​ຕ່າງປະ​ເທດ​ເພື່ອຄຳນັບ​ຮັບ​ຕ້ອນ​ກອງ​ປະຊຸມ​ສຸດ​ຍອດ​ອາ​ຊຽນ ຄັ້ງ​ທີ 28 – 29 ​​ແລະ ກອງ​ປະຊຸມ​ອື່ນໆ​ທີ່​ກ່ຽວຂ້ອງ ເຊິ່ງຈະ​ຈັດ​ຂຶ້ນ​ ທີ່ ນະຄອນຫລວງ​ວຽງ​ຈັນ ​ໃນ​ລະຫວ່າງ​ວັນ​ທີ 3-8 ກັນຍາ 2016.​ ການອອກແຮງງານລວມຄັ້ງນີ້​​ມີຫົວຫນ້າ​ຫ້ອງການ, ບັນດາ​ຫົວຫນ້າ​ກົມ, ຮອງ​ກົມ​ພ້ອມ​ດ້ວຍພະນັກງານວິ​ຊາ​ການກະຊວງ​​ເຂົ້າ​ຮ່ວມ​ຢ່າງ​ພ້ອມພຽງ.ການອອກ​ແຮງ​ງານ​ລວມ​ຄັ້ງ​ນີ້,​ນອກຈາກ​​ຈະເປັນ​ການສ້າງ​ຂະ​ບວນການ​ເພື່ອ​ຄຳນັບຮັບ​ຕ້ອນ​ບັນດາກອງ​ປະຊຸມ​ສຸດ​ຍອດ​ ​ແລ້ວ​ຍັງ​ເປັນ​ການ​ສ້າງ​ຂະ​ບວນການ​ເພື່ອ​ຊົມ​ເຊີຍ​ວັນ​ຍຶດອຳນາດ ຄົບຮອບ 41 ປີ (23 ສິງຫາ 1975 - 23 ສິງຫາ 2016), ວັນ​ລັດຖະທຳ​ມະນູນ​ແຫ່ງ​ຊາດຄົບຮອບ 25 ປີ (15 ສິງຫາ 1991 – 15 ສິງຫາ 2016) ​ພ້ອມ​ທັງ​ເປັນ​ການ​ປະກອບສ່ວນ​ເຂົ້າ​ໃນ​ການ​ສ້າງນະຄອນຫລວງ​ວຽງ​ຈັນ​ໃຫ້​ມີ​ຄວາມ​ສະອາດ​ສວຍ​ງາມ ​ເພື່ອ​ຕ້ອນຮັບ​ແຂກ​ຕ່າງປະ​ເທດ​ທີ່​ຈະ​ເຂົ້າມາ​ຮ່ວມກອງ​ປະຊຸມ​ສຸດ​ຍອດ​ອາ​ຊຽນ​ ​ແລະ ກອງ​ປະຊຸມ​ອື່ນໆ​ທີ່ກ່ຽວ​ຂ້ອງ ໃນ​ຕົ້ນ​ເດືອນ​ກັນຍາ​ນີ້.

ໃນວັນ​ທີ 29 ກໍລະກົດ 2016, ທີ່ ກະຊວງ​ການ​ຕ່າງປະ​ເທດ, ສະຫະພັນ​ແມ່ຍິງ ​ກະຊວງ​ການ​ຕ່າງປະ​ເທດ ໄດ້​ຈັດ​ພິທີສະ​ເຫລີ​ມສະຫລອງ ວັນ​ສ້າງ​ຕັ້ງ​ສະຫະພັນ​ແມ່ຍິງ​ລາວ ຄົບຮອບ 61 ປີ (20 ກໍລະກົດ 1955-20 ກໍ​ລະ​ກົດ 2016), ​ໂດ​​ຍໃຫ້ກຽ​ດ​ເຂົ້າ​ຮ່ວມເປັນ​ປະທານ​ຂອງ​ ທ່ານ ນາງ ຄຳເພົາ​ ເອີນ​ທະ​ວັນ, ຄະນະ​ປະ​ຈໍາ​ພັກ​ກະຊວງ, ຮອງ​ລັດຖະມົນຕີ​ກະຊວງ​ການ​ຕ່າງປະ​ເທດ, ມີ​ຄະນະ​ພັກ​ກະຊວງ, ຄະນະ​ສະຫະ​ພັນ​ແມ່ຍິງ​ກະຊວງ, ຄະນະ​ກົມ, ຜູ້ຕາງໜ້າ​ຈາກ​ສາມ​ອົງການຈັດ​ຕັ້ງ​ມະ​ຫາ​ຊົນ, ພະນັກງານອາວຸໂສບໍານານ, ສະມາຊິກ​ສະຫະພັນ​ແມ່ຍິງ, ພ້ອມພະນັກງານກ່ຽວຂ້ອງ ​ຂອງກະຊວງ​ການ​ຕ່າງປະ​ເທດ ​ເຂົ້າ​ຮ່ວມຫລາຍ​ກວ່າ 400 ​ຄົນ.