ເພື່ອສືບຕໍ່ລະດົມການຊ່ວຍເຫລືອໃຫ້ແກ່ປະຊາຊົນຢູ່ບັນດາແຂວງ ທີ່ໄດ້ຮັບຜົນກະທົບຈາກສະພາບອາກາດຫນາວເຢັນຜິດປົກກະຕິໃນປີນີ້, ໃນວັນທີ 1 ກຸມພາ 2016, ສະຖານກົງສຸນໃຫຍ່ ແຫ່ງ ສປປ ລາວ ປະຈຳ ຂອນແກ່ນ, ຣາຊະອານາຈັກໄທ ໄດ້ນຳເຄື່ອງຊ່ວຍເຫລືອມາມອບໃຫ້ອົງການຈັດຕັ້ງມະຫາຊົນ, ກະຊວງການຕ່າງປະເທດ ໂດຍແມ່ນ ທ່ານ ບຸນສີ ວົງບົວສີ, ກົງສຸນໃຫຍ່ ສປປລາວ ທີ່ ຂອນແກ່ນ ເປັນຜູ້ມອບ ແລະ ຕາງຫນ້າສາມອົງການຈັດຕັ້ງມະຫາຊົນກະຊວງການຕ່າງປະເທດ ແມ່ນ ທ່ານ ອານຸພາບ ວົງໜໍ່ແກ້ວ, ຄະນະບໍລິຫານງານສູນກາງຊາວຫນຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວຫນຸ່ມກະຊວງການຕ່າງປະເທດ ເປັນຜູ້ຮັບ, ໂດຍມີພະນັກງານຈາກສະຖານກົງສຸນໃຫຍ່ ແລະ ຄະນະບໍລິຫານງານຊາວຫນຸ່ມກະຊວງການຕ່າງປະເທດຈຳນວນຫນຶ່ງເຂົ້າຮ່ວມ. ເຄື່ອງຊ່ວຍເຫລືອທີ່ນຳມາມອບໃນຄັ້ງນີ້ປະກອບມີ ເສື້ອກັນໜາວ ຈຳນວນ 40 ຜືນ, ຜ້າຫົ່ມ ຈຳນວນ 10 ຜືນ ແລະ ຫມີ່ສຳເລັດຮູບ ຈຳນວນ 08 ແກັດ, ລວມມູນຄ່າທັງໝົດ 9.370 ບາດ (ສະກຸນເງິນໄທ) ຫລື ປະມານ 2.155.000 ກີບ.
ກ່ອນຫນ້ານີ້ ມີຫລາຍພາກສ່ວນຢູ່ຕ່າງປະເທດ ກໍ່ໄດ້ສືບຕໍ່ແຈ້ງຈຸດປະສົງ ແລະ ໄດ້ປະກອບສ່ວນສົມທົບດ້ານປັດໃຈເພືື່ອຊ່ວຍເຫລືອປະຊາຊົນເພື່ອຕ້ານໄພຫນາວເຊິ່ງປະກອບມີ: ສະຖານກົງສຸນໃຫຍ່ ແຫ່ງ ສປປ ລາວ ປະຈຳ ນະຄອນຊຽງໄຮ້ ຈຳນວນ 4.926 ຢວນ (ປະມານ 5.714.000 ກີບ), ສະຖານເອກອັກຄະລັດຖະທູດ ສປປ ລາວ ປະຈໍາ ອົດສະຕຣາລີ ຈຳນວນ 100 ໂດລາ ສະຫະລັດ (ປະມານ 815.000 ກີບ), ສະຖານເອກອັກຄະລັດຖະທູດ ສປປ ລາວ ປະຈໍາ ພຽງຢາງ ຈໍານວນ 200 ໂດລາສະຫະລັດ (ປະມານ 1.630.000 ກີບ), ສະຖານເອກອັກຄະລັດຖະທູດ ສປປ ລາວ ປະຈໍາ ປັກກິ່ງ, ສປ ຈີນ ຈໍານວນ 1.000 ຢວນ (ປະມານ 1.300.000 ກີບ), ສະຖານເອກອັກຄະລັດຖະທູດ ສປປ ລາວ ປະຈໍາ ແບກແລັງ, ສສ. ເຢຍລະມັນ ຈຳນວນ 50 ເອີໂຣ (ປະມານ 440.000 ກີບ), ສະຖານເອກອັກຄະລັດຖະທູດ ສປປ ລາວ ປະຈຳ ປະເທດສະວິດ ຈຳນວນ 500 ໂດລາ ສະຫະລັດ (ປະມານ 4.075.000 ກີບ), ສຳນັກງານຜູ້ຕາງຫນ້າຖາວອນ ສປປ ລາວ ປະຈຳ ອາຊຽນ ທີ່ ຈາກາກຕາ, ປະເທດອິນໂດເນເຊຍ ຈຳນວນ 150 ໂດລາ ສະຫະລັດ (ປະມານ 1.220.000 ກີບ) ແລະ ສຳນັກງານຜູ້ຕາງໜ້າງຖາວອນ ແຫ່ງ ສປປ ລາວ ປະຈຳ ອົງການ ສປຊ ທີ່ ນິວຢອກ ຈຳນວນ 50 ໂດລາ ສະຫະລັດ (ປະມານ 408.000 ກີບ) ໂດຍມອບຜ່ານຄະນະບໍລິຫານງານຊາວຫນຸ່ມກະຊວງການຕ່າງປະເທດ ເພື່ອນຳໄປມອບຕໍ່ໃຫ້ບັນດາແຂວງທີ່ໄດ້ຮັບຜົນກະທົບ.