ເພື່ອເປັນການປະກອບສ່ວນເຂົ້າໃນວຽກງານປ້ອງກັນ, ຄວບຄຸມ ແລະ ສະກັດກັ້ນການແຜ່ລະບາດຂອງພະຍາດໂຄວິດ-19 ຢູ່ ນະຄອນຫຼວງວຽງຈັນ, ໃນວັນທີ 25 ຕຸລາ 2021 ກຸ່ມແມ່ຍິງນັກການທູດອາຊຽນ ທີ່ ນະຄອນຫຼວງວຽງຈັນ (ASEAN Women’s Circle in Vientiane-AWCV) ໂດຍສົມທົບກັບສະຫະພັນແມ່ຍິງກະຊວງການຕ່າງປະເທດ ນໍາໂດຍ ທ່ານ ນາງ ອາລຸນີ ກົມມະສິດ, ປະທານກິດຕິມະສັກກຸ່ມແມ່ຍິງນັກການທູດອາຊຽນ ທີ່ ນະຄອນຫຼວງວຽງຈັນ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ພັນລະຍາ ທ່ານ ລັດຖະມົນຕີກະຊວງການຕ່າງປະເທດ ໄດ້ມອບເງິນຊ່ວຍເຫຼືອ ຈໍານວນ 32 ລ້ານກີບ (ສາມ​ສິບ​ສອງ​ລ້ານ​ກີບ)ໃຫ້ແກ່ ອົງການປົກຄອງນະຄອນຫຼວງວຽງຈັນ.

ໃນພິທີມອບ-ຮັບການຊ່ວຍເຫຼືອດັ່ງກ່າວ, ທ່ານ ນາງ ອາລຸນີ ກົມມະສິດໄດ້ໃຫ້ກຽດກ່າວມອບໂດຍໄດ້ສະແດງຄວາມເປັນຫ່ວງເປັນໄຍ ຕໍ່ ບັນດາໜ່ວຍງານດ່ານໜ້າ ກໍຄື ພະນັກງານແພດໝໍ, ທະຫານ, ຕໍາຫຼວດ ແລະ ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນນະຄອນຫຼວງ,​ ເມືອງ ແລະ ບ້ານ ທີ່ຕ້ອງໄດ້ແບກຮັບພາລະຢ່າງໜັກໜ່ວງ ໃນການປະຕິບັດໜ້າທີ່ວຽກງານຢ່າງຕໍ່ເນື່ອງພ້ອມທັງໄດ້ສະແດງຄວາມຊົມເຊີຍ ທຸກພາກສ່ວນທີ່ກ່ຽວຂ້ອງ ທີ່ໄດ້ເອົາໃຈໃສ່ປະຕິບັດໜ້າທີ່ຂອງຕົນ ຢ່າງຕັ້ງໜ້າ ໃນການປະກອບສ່ວນເຂົ້າໃນວຽກງານສະກັດກັ້ນ ແລະ ຕ້ານການແຜ່ລະບາດຂອງພະຍາດໂຄວິດ-19. ໃນໂອກາດນີ້,ທ່ານ ອາດສະພັງທອງ ສີພັນດອນ, ຮອງເລຂາຄະນະພັກ, ເຈົ້າຄອງນະຄອນຫລວງວຽງຈັນ, ໄດ້ໃຫ້ກຽດຕ້ອນຮັບ ແລະສະແດງຄວາມຂອບໃຈ ມາຍັງ ກຸ່ມແມ່ຍິງນັກການທູດອາຊຽນ ທີ່ ນະຄອນຫຼວງວຽງຈັນ ແລະ ສະຫະພັນແມ່ຍິງກະຊວງການຕ່າງປະເທດ ກໍຄື ການປະກອບສ່ວນຈາກບັນດາສະມາຊິກ ແລະ ສະຖານທູດອາຊຽນ ປະຈໍາ ສປປ ລາວ ທີ່ໄດ້ປະກອບສ່ວນສົມທົບທຶນ   ເພື່ອສະໜັບສະໜູນທາງດ້ານສະບຽງອາຫານ ໃຫ້ແກ່ ຄະນະສະເພາະກິດ ແລະ ພະນັກງານດ່ານໜ້າ ໃນການປະຕິບັດໜ້າທີ່ວຽກງານ ເພື່ອຮັບມືກັບການແຜ່ລະບາດຂອງພະຍາດໂຄວິດ-19 ຢູ່ ນະຄອນຫຼວງວຽງຈັນ, ພ້ອມທັງໄດ້ຝາກສະແດງຄວາມຊົມເຊີຍໄປຍັງຄະນະພັກ-ຄະນະນຳກະຊວງການຕ່າງປະເທດ ມາໃນໂອກາດນີ້ດ້ວຍ.

ກຸ່ມແມ່ຍິງນັກການທູດອາຊຽນ ທີ່ ນະຄອນຫຼວງວຽງຈັນ ສ້າງຕັ້ງຂຶ້ນໃນປີ 2016, ຈຸດ​ປະ​ສົງ​ເພື່ອ​ສົ່ງ​ເສີມ​ຄວາມ​ສາ​ມັກ​ຄີ​ໃນ​ອາ​ຊຽນ, ການ​ຮ່ວມ​ມື ແລະ ຄວາມ​ເຂົ້າ​ໃຈ​ເຊິ່ງ​ກັນ ແລະ ກັນ ລະ​ຫວ່າງ​ສະ​ມາ​ຄົມ​ແມ່​ຍິງ​ອາ​ຊຽນ ທີ່​ນະ​ຄອນ​ຫລວງວຽງ​ຈັນ ​ດ້ວຍການ​ແລກ​ປ່ຽນ​ທາງ​ດ້ານ​ວັດ​ທະ​ນະທຳ ແລະ ສັງ​ຄົມ​ລະ​ຫວ່າງ​ສະ​ມາ​ຊິກ ໂດຍຜ່ານການຈັດກິດຈະກຳຕ່າງໆຮ່ວມກັນເຊັ່ນ: ການ​ໄປ​ແລກ​ປ່ຽນ​ວັ​ດ​ທະ​ນະ​ທຳ​ຂອງ​ແຕ່​ລະ​ປະ​ເທດ​ສະ​ມາ​ຊິກ​ ໃນ​ກຸ່ມ ກຍອວ, ຈັດງານ​ລ້ຽງ​ນ້ຳ​​ຊາ​ພົບ​ປະ​ສ້າງ​ສັນ ແລະ ແລ​ກ​ປ່ຽນ​ວັດ​ທະ​ນະ​ທຳ ປະ​ຈຳ​ປີ ​ຂອງ​ສະ​ຫະ​ພັນ​ແມ່​ຍິງ​ກະ​ຊວງ​ການ​ຕ່າງ​ປະ​ເທດ ແລະ ນັກ​ການ​ທູດ​ຍິງ ແລະ ທຸ​ຕາ​ນຸ​ທູດ​ເພດ​ຍິງ ຈາກ​ບັນ​ດາ​ສະ​ຖານ​ທູດ ແລະ ອົງ​ການ​ຈັດ​ຕັ້ງ​ສາ​ກົນ ປະ​ຈຳ​ ສ​ປ​ປ​ ລາວ. ນອກຈາກນັ້ນ, ຍັງໄດ້ຈັດກິດຈະກຳເພື່ອ​ປະ​ກອບ​ສ່ວນ​ຊ່ວຍ​ເຫລືອ​ສັງ​ຄົມ ເປັນຕົ້ນແມ່ນການ​ລ​ະ​ດົມ​ທຶນ​ຊ່ວຍ​ເຫລືອ​ແມ່​ຍິງ ແລະ ເດັກ​ນ້ອຍ​ຜູ້​ທຸກຍາກ​ທີ່ຢູ່​ຫ່າງ​ໄກ​ສອກ​ຫລີກ ແລະ ອື່ນໆ.