ໃນວັນທີ 10 ກັນຍາ 2015, ທີ່ ກະຊວງການຕ່າງປະເທດ ໄດ້ຈັດກອງປະຊຸມທາບທາມບຸກຄະລາກອນ ທີ່ຈະລົງຮັບສະໝັກເລືອກຕັ້ງເຂົ້າໃນຄະນະບໍລິຫານງານສູນກາງສະຫະພັນແມ່ຍິງລາວ ຊຸດທີVII (ຮອບທີ II), ໂດຍການເປັນປະທານຂອງ ສະຫາຍ ນາງ ພິມພາ ແກ້ວມີໄຊ, ປະທານຄະນະບໍລິຫານງານ ສະຫະພັນແມ່ຍິງ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ; ເປັນກຽດເຂົ້າຮ່ວມຂອງ ສະຫາຍ ດຣ ນາງ ສູນທອນ ໄຊຍະຈັກ,ກໍາມະການສູນກາງພັກ, ເລຂາຄະນະພັກ ຫົວຫນ້າຄະນະພົວພັນຕ່າງປະເທດ; ຄະນະຫົວໜ້າໜ່ວຍແມ່ຍິງ ຈາກບັນດາກົມຕ່າງໆຂອງກະຊວງ ຕປທ ແລະ ຄຕພ; ຄະນະນໍາເພດຍິງຂັ້ນພະແນກ ຂື້ນໄປ ແລະ ສະມາຊິກເພດຍິງ ລະດັບວິຊາສະເພາະຊັ້ນປະລິນຍາໂທຂື້ນໄປ ເຂົ້າຮ່ວມທັງໝົດ 100 ກວ່າ ສະຫາຍ.
ຈຸດປະສົງກອງປະຊຸມທາບທາມບຸກຄະລາກອນ ກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີVII ຄັ້ງນີ້ ແມ່ນຈະໄດ້ເຜີຍແຜ່ເຊື່ອມຊຶມບັນດາເອກະສານສໍາຄັນ ເຊັ່ນ: ບົດແນະນໍາ ກ່ຽວກັບ ການທາບທາມບຸກຄະ ລາກອນ ຂອງກອງປະຊຸມໃຫຍ່ຜູ້ແທນແມ່ຍິງລາວທົ່ວປະເທດ ຄັ້ງທີ VII (ຮອບທີ II); ຄົ້ນຄວ້າ, ເຊື່ອມຊຶມ ມາດຕະຖານເງື່ອນໄຂຂອງບຸກຄະລາກອນ ທີ່ຈະສະໝັກເຂົ້າໃນຄະນະບໍລິຫານງານສູນກາງ ສະຫະພັນແມ່ຍິງ ລາວ ຊຸດທີ VII ຕາມຂໍ້ຕົກລົງ, ສະບັບເລກທີ 507/ສສຍລ, ລົງວັນທີ 02/09/2015 ວ່າດ້ວຍມາດຕະຖານ ການເລືອກເຟັ້ນເອົາພະນັກງານເພດຍິງ ທີ່ຈະອອກສະໝັກຮັບເລືອກຕັ້ງ ເຂົ້າໃນຄະນະບໍລິຫານງານສູນກາງ ສະຫະພັນແມ່ຍິງລາວ ຊຸດທີ VI. ໃນໂອກາດດັ່ງກ່າວນີ້, ສະຫາຍ ດຣ. ນາງ ສູນທອນ ໄຊຍະຈັກ, ກໍາມະການ ສູນກາງພັກ, ເລຂາຄະນະພັກ, ຫົວຫນ້າຄະນະພົວພັນຕ່າງປະເທດ ກໍໄດ້ໃຫ້ກຽດຂຶ້ນໂອລົມເອື້ອຍນ້ອງແມ່ຍິງ ໂດຍໄດ້ຍົກໃຫ້ເຫັນສໍາເລັດການອັນໃຫຍ່ຫລວງຂອງເອື້ອຍແມ່ຍິງ ໃນຂະແຫນງການຕ່າງປະເທດທີ່ຍາດມາໄດ້ ຕະຫລອດໄລຍະ 5 ປີ ຜ່ານມາ ພ້ອມທັງໄດ້ຮຽກຮ້ອງໃຫ້ເອື້ອຍນ້ອງແມ່ຍິງ ສືບຕໍ່ປະກອບສ່ວນສຸມທຸກສະຕິ ປັນຍາເຂົ້າໃນການປະຕິບັດຫນ້າທີ່ວຽກງານ ໃນການສ້າງສາພັດທະນາປະເທດຊາດ ໂດຍສະເພາະແມ່ນໃນຫນ້າ ທີ່ວຽກງານການຕ່າງປະເທດ. ຫລັງຈາກນັ້ນ, ກໍຈະໄດ້ດໍາເນີນການທາບທາມ ຮອບທີ IIເພື່ອຄັດເລືອກເອົາ ບຸກຄະລາກອນ ທີ່ຈະລົງສະໝັກເຂົ້າເປັນຄະນະບໍລິຫານງານສູນກາງສະຫະພັນແມ່ຍິງລາວຊຸດໃໝ່ ດ້ວຍຄວາມ ຟົດຟື້ນ, ຫ້າວຫັນ ແລະ ໄດ້ຮັບຜົນສໍາເລັດເປັນຢ່າງດີ.