ເພື່ອເປັນການຂໍ່ານັບຮັບຕ້ອນກອງປະຊຸມໃຫ່ຍຂອງອົງຄະນະພັກກະຊວງການຕ່າງປະເທດ ແລະ ຄະນະພົວ ພັນຕ່າງປະເທດສູນກາງພັກຄັ້ງທີ່ III, ກອງປະຊຸມໃຫຍ່ຂອງອົງຄະນະພັກກະຊວງແຜນ ການ ແລະ ການລົງທຶນ ຄັ້ງທີ III ແລະ ກອງປະຊຸມໃຫຍ່ຜູ້ແທນຊາວຫນຸ່ມທົ່ວປະເທດ ຄັ້ງທີ VII ທີ່ຈະໄດ້ຈັດຂຶ້ນໃນມໍ່ໆນີ້, ໃນຕອນບ່າຍວັນທີ 15 ພຶດສະພາ 2015, ທີ່ ສູນການຮ່ວມມື ແລະ ຝຶກອົບຮົມສາກົນ, ຄະນະບໍລິຫານງານຊາວຫນຸ່ມ ກະຊວງການຕ່າງປະເທດ ແລະ ຄະນະພົວພັນ ຕ່າງປະເທດສູນກາງພັກ ໄດ້ຈັດກອງປະຊຸມສຳມະນາພົບປະແລກປ່ຽນດ້ານວິຊາການ ຮ່ວມກັບ ຄະນະຊາວຫນຸ່ມກະຊວງແຜນການ ແລະ ການລົງທຶນ. ພາຍໃຕ້ການເປັນປະທານກິດຕິມະສັກຂອງ ທ່ານ ສະເຫລີມໄຊ ກົມມະສິດ, ຄະນະພັກກະຊວງ, ລັດຖະມົນຕີຊ່ວຍວ່າການກະຊວງການຕ່າງປະ ເທດ ແລະ ທ່ານ ນາງ ຄຳຈັນ ວົງແສນບຸນ, ຄະນະປະຈຳພັກກະຊວງ, ລັດຖະມົນຕີຊ່ວຍວ່າການ ກະຊວງແຜນການ ແລະ ການລົງທຶນ, ເຊິ່ງມີ ສະຫາຍ ອານຸພາບ ວົງໜໍ່ແກ້ວ, ເລຂາຄະນະບໍ ລິຫານງານຊາວຫນຸ່ມກະຊວງການຕ່າງປະເທດ ແລະ ຄຕພ, ສະຫາຍ ມະໂນທອງ ວົງໄຊ, ເລຂາຄະ ນະບໍລິຫານງານຊາວຫນຸ່ມກະຊວງແຜນການ ແລະ ການລົງທຶນ, ມີບັນດາສະມາຊິກຊາວຫນຸ່ມຂອງ ທັງສອງກະຊວງ ເຂົ້າຮ່ວມຈໍານວນ 400 ກວ່າສະຫາຍ.

ກອງປະຊຸມໃນຄັ້ງນີ້ ໄດ້ສົນທະນາ ແລະ ແລກປ່ຽນພາຍໃຕ້ຫົວຂໍ້: “ເປົ້າ​ຫມາຍ​ການ​ພັດທະນາ​ແບບ​ຍືນ​ຍົງຂອງ​ສາກົນ, ວິ​ໄສ​ທັດ​ອາ​ຊຽນຫລັງ​ປີ 2015 ​ແລະ ​ແຜນ​ພັດ​ທະນາ​ເສດຖະກິດ-ສົງ​ຄົມ ​ແຫ່ງ​ຊາດ 5 ປີ ຄັ້ງ​ທີ VIII (2016-2020). ຈຸດປະສົງແມ່ນເພື່ອເຮັດໃຫ້ຜູ້ເຂົ້າຮ່ວມຮັບຮູ້ ແລະ ເຂົ້າໃຈ ກ່ຽວກັບ ເປົ້າຫມາຍການພັດທະນາຂອງສາກົນ, ວິໄສທັດຂອງອາຊຽນ ແລະ  ​ແຜນ​ພັດ​ທະນາ​ເສດຖະກິດ-ສົງ​ຄົມ ​ແຫ່ງ​ຊາດ 5 ປີ ຄັ້ງ​ທີ VIII ຂອງລັດຖະບານ.ພ້ອມນີ້, ຊາວຫນຸ່ມຜູ້ເຂົ້າຮ່ວມກອງ ປະຊຸມໄດ້ສົນທະນາແລກປ່ຽນຄຳຄິດເຫັນແບບລົງເລິກ ກ່ຽວກັບ ເນື້ອໃນຈິດໃຈ ແລະ ຄວາມ​ສຳ​ຄັນ​ຂ​ອງ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ-ສັງ​ຄົມແຫ່ງ​ຊາດທີ່​ເຊື່ອມ​ສານ​ເອົາ​ບັນ​ດາ​ເປົ້າ​ ໝາຍ​ສາ​ກົນ​ເຂົ້າ​ນຳ ກໍ່​ຄື​ການ​ລິ​ເລີ່ມ​ຂະ​ບວນ​ການ​ປຶກ​ສາ​ຫາ​ລື​ກ່ຽວ​ກັບ​ການ​ກຳ​ນົດ​ເປົ້າ​ໝາຍ​ເພື່ອ​ການ​ພັດ​ທະ​ນາ​ແບບ​ຍືນ​ຍົງພາຍຫຼັງ​ການເຂົ້າຮ່ວມປະຊາຄົມເສດຖະກິດອາຊຽນ ໃນທ້າຍປີ 2015.

ກອງປະຊຸມເຜີຍແຜ່ຄັ້ງນີ້ ໄດ້ດຳ​ເນີນ​ໄປ​ພາຍ​ໃຕ້ບັນຍາກາດອັນດີ ​ແລະ ​ໄດ້​ຮັບໝາກ​ຜົນເປັນ​ຢ່າງ​ດີ, ຜູ້ເຂົ້າຮ່ວມມີຄວາມສົນໃຈຮັບ​ຟັງ​ການ​ບັນ​ລະ​ຍາຍ ແລະ ແລກ​ປ່ຽນ​​ຄຳ​​ຄິດ​ຄຳ​ເຫັນ​ຢ່​າງ​ຕັ້ງ​ໜ້າ.