ສະຫະພັນ ກຳມະບານ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໄດ້ດຳເນີນກອງປະຊຸມໃຫຍ່ ຄັ້ງທີ X ຂອງຕົນຂຶ້ນ ໃນຕອນເຊົ້າຂອງວັນທີ 19 ກຸມພາ 2015, ທີ່ສູນການຮ່ວມມື ແລະ ຝຶກອົບຮົມສາກົນ (ICTC), ພາຍໃຕ້ການເປັນປະທານຂອງ ສະຫາຍ ດຣ. ລັດຕະນະ ຖາວອນສຸກ, ປະທານສະຫະພັນກຳມະບານ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ໂດຍການໃຫ້ກຽດເຂົ້າຮ່ວມຂອງ ສະຫາຍ ນາງ ສູນທອນ ໄຊຍະຈັກ, ກຳມະການສູນກາງພັກ, ຮອງເລຂາຄະນະພັກ, ລັດຖະມົນຕີຊ່ວຍວ່າການກະຊວງການຕ່າງປະເທດ ແລະ ຮອງຫົວໜ້າຄະນະພົວພັນຕ່າງປະເທດສູນກາງພັກ; ສະຫາຍ ຄຳຫຼ້າ ລໍລອນສີ, ກຳມະການສູນກາງພັກ, ປະທານສູນກາງກຳມະບານລາວ; ມີບັນດາອົງການຈັດຕັ້ງມະຫາຊົນຂອງກະຊວງ, ຄະນະບໍລິຫານງານສະຫະພັນກຳມະບານ, ຜູ້ແທນສົມບູນ, ສະມາຊິກກຳມະບານ ແລະ ແຂກຖືກເຊີນ ເຂົ້າຮ່ວມຢ່າງພ້ອມພຽງ.
ກອງປະຊຸມໄດ້ຮັບຟັງບົດລາຍງານການເມືອງຂອງການຈັດຕັ້ງ ປະຕິບັດວຽກງານກຳມະບານໃນໄລຍະຜ່ານມາ ແລະ ວາງແຜນການທິດທາງໃນຕໍ່ໜ້າ ຈາກ ສະຫາຍ ດຣ. ລັດຕະນະ ຖາວອນສຸກ, ໂດຍສະຫາຍໄດ້ຍົກໃຫ້ເຫັນຈຸດດີ, ຂໍ້ຄົງຄ້າງ, ບາງບົດຮຽນທີ່ຖອດຖອນມາໄດ້ ແລະ ຜົນງານດ້ານຕ່າງໆທີ່ສະຫະພັນກຳມະບານກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ຍາດມາໄດ້. ປັດຈຸບັນ, ສະຫະພັນກຳມະບານ ກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ມີທັງໝົດ 52 ໝ່ວຍ, ໃນນັ້ນ, ຢູ່ສະຖານທູດ ແລະ ສຳນັກງານຜູ້ຕາງໜ້າ ສປປ ລາວ ທີ່ຕ່າງປະເທດ 32 ໝ່ວຍ. ສະຫະພັນກຳມະບານໄດ້ຖືເອົາວຽກງານໂຄສະນາສຶກສາອົບຮົມວຽກງານການ ເມືອງ-ແນວຄິດໃຫ້ແກ່ສະມາຊິກກຳມະບານຂອງຕົນ ເຊື່ອມຊຶມແນວທາງນະໂຍບາຍຂອງພັກ, ກົດໝາຍຂອງລັດ, ກຳໄດ້ແນວທາງນະໂຍບາຍການຕ່າງປະເທດ ຂອງ ສປປ ລາວ. ໄດ້ມີການເຄື່ອນໄຫວວຽກງານກຳມະບານ ໂດຍຖືເອົາຂໍແຂ່ງຂັນ 2 ດີ, 5 ເປັນເຈົ້າ ທີ່ສູນກາງກຳມະບານລາວວາງອອກໃນການຈັດຕັ້ງປະຕິບັດໂດຍຕິດພັນກັບ ວຽກງານວິຊາສະເພາະຂອງຕົນ.
ກອງ ປະຊຸມຍັງໄດ້ປ່ອນບັດຄັດເລືອກເອົາຄະນະປະທານສະຫະພັນກຳມະບານຊຸດໃໝ່, ຊຶ່ງມີຜູ້ສະມັກທັງໝົດ 15 ສະຫາຍ, ຍິງ 3 ສະຫາຍ, ເລືອກເອົາ 11 ສະຫາຍ. ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາ ສະຫາຍ ຄຳອິນ ຄິດຈະເດດ ເປັນປະທານ, ສະຫາຍ ດຣ. ສີວຽງເພັດ ເພັດວໍລະຈັກ ເປັນຮອງປະທານຜູ້ທີ 1, ສະຫາຍ ນາງ ບົວທອງ ໄຊຍະສຸກ, ເປັນຮອງປະທານຜູ້ທີ 2 ແລະ ສະຫາຍ ບົວພັດ ພຸດທະວົງ ເປັນປະທານກວດກາ ເພື່ອສືບຕໍ່ຊີ້ນຳ-ນຳພາວຽກງານການຈັດຕັ້ງປະຕິບັດຕາມມະຕິກອງປະຊຸມ ໃຫຍ່ ຄັ້ງທີ X ຂອງສະຫະພັນກຳມະບານກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກໃຫ້ປະກົດຜົນເປັນຈິງ.
ໃນກອງປະຊຸມຜູ້ແທນຍັງໄດ້ຮັບຟັງການໂອ້ລົມຂອງ ສະຫາຍ ຄຳຫຼ້າ ລໍລອນສີ, ປະທານສູນກາງກຳມະບານລາວ ຊຶ່ງສະຫາຍໄດ້ຍ້ອງຍໍຊົມເຊີຍຜົນງານທີ່ສະຫະພັນກຳມະບານກະຊວງການຕ່າງປະ ເທດ ແລະ ຄະນະພົວພັນຕ່າງປະເທດສູນກາງພັກ ຍາດມາໄດ້ໃນໄລຍະຜ່ານມາ ແລະ ໄດ້ເນັ້ນໃຫ້ກຳມະບານທຸກຂັ້ນຈົ່ງຊ່ວຍກັນແກ້ໄຂບັນດາຂໍ້ຄົງຄ້າງ, ປະຕິບັດສິດພາລະບົດບາດກຳມະບານຕິດພັນກັບວຽກງານຂອງຕົນໃຫ້ແທດເໝາະ ແນໃສ່ເຮັດໃຫ້ສະມາຊິກກຳມະບານ, ກຳມະກອນ, ຜູ້ອອກແຮງງານມີຄວາມເຂົ້າໃຈແຈ້ງຕໍ່ແນວທາງຂອງພັກ ແລະ ກົດລະບຽບຂອງລັດ ກໍຄືແນວທາງນະໂຍບາຍການຕ່າງປະເທດຂອງພັກເຮົາ ເພື່ອປົກປ້ອງສິດຜົນປະໂຫຍດຂອງເຂົາເຈົ້າຢ່າງແທ້ຈິງ.