ເພຶື່ອເປັນການຂໍ່ານັບຮັບຕ້ອນໃຫ້ແກ່ ກອງປະຊຸມໃຫຍ່ຂອງອົງຄະນະພັກ ກະຊວງການຕ່າງປະເທດ ທີ່ຈະໄຂຂຶ້ນໃນມໍ່ໆນີ້, ຄະນະບໍລິຫານງານຊາວໜຸ່ມກະຊວງການຕ່າງປະເທດ ຈຶ່ງໄດ້ຈັດຕັ້ງກອງປະຊຸມສໍາມະນາວິທະຍາສາດ ກ່ຽວກັບ ບັນຫາພົ້ນເດັ່ນຂອງພາກພື້ນ ແລະ ສາກົນ ຂຶ້ນ ໂດຍພາຍໃຕ້ການເປັນປະທານຂອງ ສະຫາຍ ທອງສະຫວັນ ພົມວິຫານ, ຮອງລັດຖະມົນຕີກະຊວງການຕ່າງປະເທດ, ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນຂອງກະຊວງການຕ່າງປະເທດ, ມີຕາງໜ້າຈາກຫ້ອງວ່າການສູນກາງພັກ, ຫ້ອງວ່າການສຳນັກງານນາຍົກລັດຖະມົນຕີ, ສູນກາງຊາວໜຸ່ມປະຊາຊົນປະຕິວັດລາວ, ກະຊວງປ້ອງກັນຄວາມສະຫງົບ, ກະຊວງການເງິນ, ກະຊວງອຸດສາຫະກໍາ ແລະ ການຄ້າ, ກະຊວງແຜນການ ແລະ ການລົງທຶນ, ຄະນະພົວພັນຕ່າງປະເທດສູນກາງພັກ ແລະ ສະມາຊິກຊາວໜຸ່ມກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງກັນ ຫຼາຍກວ່າ 300 ສະຫາຍ.
ຈຸດປະສົງຂອງກອງປະຊຸມສໍາມະນາດັ່ງກ່າວ ກໍເພື່ອເປັນການສ້າງໂອກາດໃຫ້ແກ່ຊາວໜຸ່ມຂອງກະຊວງການຕ່າງປະເທດ ກໍຄື ນັກການທູດໜຸ່ມນ້ອຍ ໄດ້ແລກປ່ຽນທັດສະນະ ແລະ ຂໍ້ມູນຂ່າວສານຮ່ວມກັນ ຊຶ່ງໄດ້ຈັດໃນຮູບແບບຂອງເວທີໃນການປຶກສາຫາລື ໂດຍມີວິທະຍາກອນຈາກບັນດາໜ່ວຍຊາວໜຸ່ມກົມທີ່ກ່ຽວຂ້ອງຂອງກະຊວງການຕ່າງປະເທດ ຂຶ້ນນໍາສະເໜີບົດໃນຫົວຂໍ້ຕ່າງໆ ທີ່ເປັນບັນຫາພົ້ນເດັ່ນຂອງພາກພື້ນ ແລະ ສາກົນ. ທັງນີ້, ກໍເພື່ອແນ່ໃສ່ໃນການເສີມສ້າງຄວາມຮູ້ຄວາມສາມາດ ແລະ ພັດທະນາທັກສະ ໃນການວິເຄາະວິໄຈບັນຫາໃຫ້ມີິຄວາມເລິກເຊິ່ງ,ຮອບດ້ານ ແລະ ເປັນການເສີມສ້າງຄວາມກ້າຫານ ໃນການສະແດງຄວາມຄິດເຫັນ. ຄຽງຄູ່ກັນນັ້ນ, ກໍເປັນການປະກອບສ່ວນໃນການຍົກລະດັບຄວາມຮູ້ຄວາມສາມາດຂອງບຸກຄະລາກອນ ກໍຄືຊາວໜຸ່ມ ທີ່ຈະກາຍມາເປັນພະນັກງານສືບທອດຂອງກະຊວງການຕ່າງປະເທດ ໃນຕໍ່ໜ້າ. ນອກນັ້ນ, ທ່ານປະທານ ກໍຍັງໄດ້ຍົກໃຫ້ເຫັນຜົນສໍາເລັດ ແລະ ຄວາມສໍາຄັນຂອງການເຄື່ອນໄຫວວຽກງານການຕ່າງປະເທດ ຕາມແນວທາງ ແລະ ນະໂຍບາຍຂອງພັກ ແລະ ລັດຖະບານໃນໄລຍະໃໝ່ ເພື່ອແນ່ໃສ່ໃນການສ້າງເງື່ອນໄຂ ແລະ ສະພາບແວດລ້ອມທີ່ເອື້ອອໍານວຍ ໃຫ້ແກ່ການປົກປັກຮັກສາ ແລະ ສ້າງສາປະເທດຊາດ.
ກອງປະຊຸມສໍາມະນາໃນຄັ້ງນີ້ ໄດ້ດໍາເນີນໄປພາຍໃຕ້ບັນຍາກາດອັນຟົດຟື້ນ ແລະ ໄດ້ຮັບໝາກຜົນເປັນຢ່າງດີ, ຜູ້ເຂົ້າຮ່ວມມີຄວາມສົນໃຈຮັບຟັງການບັນລະຍາຍ ແລະ ແລກປ່ຽນຄໍາຄິດຄໍາເຫັນກັນຢ່າງຕັ້ງໜ້າ.