ໃນວັນທີ 27 ກໍລະກົດ 2020 ສະຫະພັນແມ່ຍິງກະຊວງການຕ່າງປະເທດ ໄດ້ຈັດພິທີສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 65 ປີ (20 ກໍລະກົດ 1955 -20 ກໍລະກົດ 2020) ທັງເປັນການສະເຫຼີມສະຫຼອງຍ້ອນຫຼັງວັນທີ 8 ມີນາ ວັນແມ່ຍິງສາກົນ ຄົບຮອບ 110 ປີ ແລະ ເປັນໜຶ່ງໃນກິດຈະກໍາ ເພື່ອສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ IV ຂອງອົງຄະນະພັກກະຊວງການຕ່າງປະເທດ, ໂດຍໄດ້ຈັດປາຖະກະຖາ ຂຶ້ນ ທີ່ ກະຊວງການຕ່າງປະເທດ ເພື່ອເຜີຍແຜ່ເນື້ອໃນເອກະສານສໍາຄັນ 2 ສະບັບ ຄື: ປະຫວັດຄວາມເປັນມາຂອງຂະບວນການກໍາເນີດເກີດຂຶ້ນວັນທີ 20 ກໍລະກົດ ແລະ ການກໍ່ສ້າງພະນັກງານນຳພາ-ຄຸ້ມຄອງເພດຍິງ. ໃຫ້ກຽດເຂົ້າຮ່ວມໃນພິທີປາຖະກະຖາຄັ້ງນີ້ ມີ ທ່ານ ນາງ ບັນດິດ ປະທຸມວັນ, ຮອງປະທານສູນກາງສະຫະພັນແມ່ຍິງລາວ,ທ່ານ ທອງສະຫວັນ ພົມວິຫານ, ຄະນະປະຈໍາພັກ,ຮອງລັດຖະມົນຕີກະຊວງການຕ່າງປະເທດ ແລະ ທ່ານ ນາງ ອາລຸນນີ ກົມມະສິດ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ມີຄະນະບໍລິຫານງານສະຫະພັນ ກໍາມະບານ ແລະ ຊາວໜຸ່ມປະຊາຊົນປະຕິວັດລາວກະຊວງການຕ່າງປະເທດ, ບັນດາຄະນະໜ່ວຍພັກ-ຄະນະກົມ, ພັນລະຍາການນໍາປັດຈຸບັນ ແລະ ພັນລະຍາອະດີດການນໍາກະຊວງການຕ່າງປະເທດ ພ້ອມທັງພະນັກງານບໍານານອາວຸໂສເພດຍິງ ແລະ ບັນດາພະນັກງານແມ່ຍິງກະຊວງການຕ່າງປະເທດ ໄດ້ເຂົ້າຮ່ວມຢ່າງເປັນຂະບວນຟົດຟື້ນ.
ໃນພິທີດັ່ງກ່າວ, ທ່ານ ນາງ ຟອງສະໝຸດ ອັ່ນລາວັນ, ກໍາມະການຄະນະພັກກະຊວງ, ປະທານຄະນະບໍລິຫານງານ ສະຫະພັນແມ່ຍິງກະຊວງການຕ່າງປະເທດ ໄດ້ໃຫ້ກຽດກ່າວຕ້ອນຮັບ ຄະນະຜູ້ແທນທັງໝົດ ຢ່າງອົບອຸ່ນ ແລະ ໄດ້ເປີດກອງປະຊຸມຢ່າງເປັນທາງການ. ທ່ານ ນາງ ບັນດິດ ປະທຸມວັນ, ຮອງປະທານຄະນະບໍລິຫານງານ ສູນກາງສະຫະພັນແມ່ຍິງລາວ ໄດ້ໃຫ້ກຽດເລົ່າເຖິງມູນເຊື້ອການກໍາເນີດ, ເຕີບໃຫຍ່ຂະຫຍາຍຕົວ ແລະ ຜົນງານການເຄື່ອນໄຫວຂອງ ອົງການຈັດຕັ້ງສະຫະພັນແມ່ຍິງລາວ ແລະ ແມ່ຍິງລາວບັນດາເຜົ່າ ທີ່ໄດ້ອຸທິດຕົນ ເພື່ອພາລະກິດຕໍ່ສູ້ປົດປ່ອຍຊາດ ແລະ ປົກປັກຮັກສາສ້າງສາພັດທະນາປະເທດຊາດ ຕະຫຼອດໄລຍະ 65 ປີ. ພ້ອມດຽວກັນນັ້ນ, ກໍໄດ້ຍົກໃຫ້ເຫັນບົດບາດຄວາມສໍາຄັນ ຂອງພາລະກິດການພັດທະນາແມ່ຍິງລາວ ໃນຂອບເຂດທົ່ວປະເທດ, ໂດຍສະເພາະ ການສະຫຼຸບຕີລາຄາ ກ່ຽວກັບ ວຽກງານການກໍ່ສ້າງພະນັກງານນໍາພາ-ຄຸ້ມຄອງເພດຍິງ ແລະ ການກໍານົດທິດທາງວຽກງານຈຸດສຸມ ໃນໄລຍະປີ 2018-2020 ເພື່ອສືບຕໍ່ປົກປ້ອງສິດຜົນປະໂຫຍດອັນຊອບທໍາຂອງແມ່ຍິງ, ສົ່ງເສີມຄວາມກ້າວໜ້າຂອງແມ່ຍິງ ແລະ ຮັບປະກັນການປະຕິບັດ ຄວາມສະເໝີພາບຍິງ-ຊາຍ ທາງດ້ານການເມືອງ, ເສດຖະກິດ ແລະ ຊີວິດການເປັນຢູ່ໃນສັງຄົມ.
ໃນໂອກາດອັນມີຄວາມໝາຍສໍາຄັນນີ້, ທ່ານ ທອງສະຫວັນ ພົມວິຫານ, ຄະນະປະຈຳພັກ, ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ກຽດໂອ້ລົມ, ໂດຍໄດ້ສະແດງຄວາມຊົມເຊີຍ ຕໍ່ ເອື້ອຍນ້ອງແມ່ຍິງລາວ ແລະ ໄດ້ເນັ້ນໜັກເຖິງຄວາມເອົາໃຈໃສ່ ແລະ ໃຫ້ຄວາມສໍາຄັນຂອງພັກ-ລັດຖະບານ ຕໍ່ວຽກງານສົ່ງເສີມຄວາມກ້າວໜ້າຂອງແມ່ຍິງ, ໂດຍສະເພາະ ຄະນະພັກ-ຄະນະນໍາ ກະຊວງການຕ່າງປະເທດ ຍາມໃດກໍໄດ້ຖືສໍາຄັນການຍົກສູງບົດບາດ ຂອງພະນັກງານເພດຍິງ ໃຫ້ສູງເດັ່ນຂຶ້ນ ໃນການປະກອບສ່ວນເປັນກໍາລັງແຮງທີ່ສໍາຄັນ ເຂົ້າໃນການເຄື່ອນໄຫວວຽກງານການເມືອງ- ການທູດ ໃນໄລຍະໃໝ່, ຊຶ່ງໄດ້ຊີ້ນໍາໃຫ້ທຸກພາກສ່ວນທີ່ກ່ຽວຂ້ອງ ເອົາໃຈໃສ່ສືບຕໍ່ກໍ່ສ້າງພະນັກງານເພດຍິງ ທາງດ້ານຄຸນທາດການເມືອງ, ຄຸນສົມບັດສິນທໍາປະຕິວັດ, ມີຄວາມຮູ້-ຄວາມສາມາດ ໃນລະດັບທີ່ແນ່ນອນ ແລະ ມີແບບແຜນວິທີນໍາພາທີ່ໜັກແໜ້ນ ແລະ ຮອບດ້ານ.
ພິທີປາຖະກະຖາຄັ້ງນີ້ ໄດ້ດໍາເນີນໄປດ້ວຍຜົນສໍາເລັດອັນຈົບງາມ, ຊຶ່ງໃນຕອນທ້າຍ ທ່ານ ນາງ ຟອງສະໝຸດ ອັ່ນລາວັນ, ກໍາມະການຄະນະພັກກະຊວງ, ປະທານຄະນະບໍລິຫານງານ ສະຫະພັນແມ່ຍິງ ກະຊວງການຕ່າງປະເທດ ໄດ້ສະແດງຄວາມຂອບໃຈ ຕໍ່ ຄະນະປະທານ ແລະ ຄະນະຜູ້ແທນທັງໝົດ ພ້ອມທັງຮັບເອົາບັນດາທິດຊີ້ນໍາ ແລະ ຄໍາຄິດເຫັນຕ່າງໆ ເພື່ອຈະນໍາໄປຈັດຕັ້ງຜັນຂະຫຍາຍ ໃຫ້ສອດຄ່ອງກັບສະພາບເງື່ອນໄຂຕົວຈິງ ໃນຂະແໜງການຕ່າງປະເທດ.
ນອກຈາກນັ້ນ, ສະຫະພັນແມ່ຍິງກະຊວງການຕ່າງປະເທດ ຍັງໄດ້ຈັດກິດຈະກຳໄປຢ້ຽມຊົມຫ້ອງມູນເຊື້ອແມ່ຍິງລາວ ແລະ ຫ້ອງວາງສະແດງສິ້ນສາຍໄໝ ລວມທັງໄດ້ປະກອບສ່ວນເຂົ້າຮ່ວມບັນດາກິດຈະກິດຂອງສູນກາງສະຫະພັນແມ່ຍິງລາວ ທີ່ໄດ້ຈັດຕັ້ງຂຶ້ນ ເພື່ອຊົມເຊີມວັນສໍາຄັນດັ່ງກ່າວອີກດ້ວຍ.