ໃນວັນທີ 02 ເມສາ 2019, ກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ (ກຍອວ) ນໍາໂດຍ ທ່ານ ນາງ ອາລຸນີ ກົມມະສິດ, ພັນລະຍາລັດຖະມົນຕີ, ປະທານກິດຕິມະສັກສະຫະພັນແມ່ຍິງກະຊວງການຕ່າງປະເທດ, ປະທານກິດຕິມະສັກກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ, ມີເອກອັກຄະລັດຖະທູດເພດຍິງ, ບັນດາພັນລະຍາທູດ, ນັກການທູດຍິງ ແລະ ພັນລະຍານັກການທູດ ຈາກ ບັນດາສະຖານເອກອັກຄະລັດຖະທູດປະເທດອາຊຽນ ປະຈໍາ ສປປ ລາວ ພ້ອມດ້ວຍຄະນະສະຫະພັນແມ່ຍິງກະຊວງການຕ່າງປະເທດ ແຫ່ງ ສປປ ລາວ ໄດ້ໄປຢ້ຽມຊົມ ພິພິຕະພັນທຳມະຊາດລາວ (Lao wonder arts museum).
ພິພິທະພັນດັ່ງກ່າວ ເປັນພິພິທະພັນທີ່ຈັດສະແດງສິນລະປະການແກະສະລັກ, ການແຕ້ມ ໃສ່ຊາກໄມ້ນານາພັນໃຫ້ມີຮູບຊົງ, ມີລວດລາຍ ແລະ ສີສັນ ທີ່ງົດງາມ ຕາມແນວຄິດ-ຈິນຕະນາການຂອງຊ່າງແກະສະລັກ ແລະຜູ້ຄວັດລາຍ ແຕ່ກໍຄົງໄວ້ມູນເຄົ້າເດີມຂອງຮາກໄມ້ແຕ່ລະຊະນິດທີ່ນຳມາປະດິດ. ນອກຈາກນີ້, ຍັງມີຮູບພາບປະຫວັດສາດ, ວິຖີການດຳລົງຊີວິດ ແລະ ລວດລາຍອື່ນໆ ຈາກສິນລະປະການແຕ້ມອັນປານີດ ລົງໃສ່ແຜນໄມ້ຂະໜາດໃຫຍ່ເພື່ອໃຫ້ກາຍເປັນຊັບສົມບັດ ແລະ ມູນມໍລະດົກອັນລໍ້າຄ່າຂອງຊາດ, ໂດຍນັກວິຈິດສິນທີ່ມີຊື່ສຽງໂດ່ງດັງຂອງລາວ ແລະ ຕ່າງປະເທດ.
ການຢ້ຽມຊົມ ພິພິທະພັນທຳມະຊາດລາວ ໃນຄັ້ງນີ້ ແມ່ນໜຶ່ງໃນກິດຈະກໍາປະຈໍາປີ ຂອງ ກຸ່ມແມ່ຍິງອາຊຽນ ທີ່ ນະຄອນຫຼວງວຽງຈັນ ເພື່ອເຜີຍແຜ່ສິນລະປະ, ວັດທະນະທຳຂອງລາວເຮົາ ໃຫ້ບັນດາປະເທດສະມາຊິກອາຊຽນ ກໍຄືເອື້ອຍນ້ອງແມ່ຍິງອາຊຽນໄດ້ເຫັນປະຈັກຕາ, ທັງເປັນໂອກາດພົບປະສ້າງຄວາມລຶ້ງເຄີຍ ກັບແມ່ຍິງບັນດາປະເທດອາຊຽນອີກດ້ວຍ.