ໃນລະຫວ່າງວັນທີ 26-29 ມີນາ 2018, ສະຫະພັນແມ່ຍິງກະຊວງການຕ່າງປະເທດ ນໍາໂດຍ ທ່ານ ນາງ ອາລູນີ ກົມມະສິດ, ພັນລະຍາທ່ານລັດຖະມົນຕີ, ປະທານກິດຕິມະສັກ ສະຫະພັນແມ່ຍິງກະຊວງການຕ່າງປະເທດ ພ້ອມດ້ວຍຄະນະ ໄດ້ເດີນທາງຢ້ຽມຢາມແລກປ່ຽນບົດຮຽນກັບແມ່ຍິງຫວຽດນາມ ແລະ ທັດສະນະສຶກສາສະຖານທີ່ຕ່າງໆ ຢູ່ ນະຄອນດານັງ.

ການຢ້ຽມຢາມຄັ້ງນີ້, ແມ່ນການປະຕິບັດຕາມແຜນການຮ່ວມມືຂອງສອງຝ່າຍ, ຊຶ່ງໄດ້ຮັບການຕ້ອນຮັບຢ່າງອົບອຸ່ນຈາກ ແມ່ຍິງນະຄອນດານັງ, ພະແນກການຕ່າງປະເທດ, ສະມາຄົມມິດຕະພາບຫວຽດນາມ-ລາວ, ແນວໂຮມແຫ່ງຊາດຫວຽດນາມທີ່ດານັງ ພ້ອມດ້ວຍສະຖານກົງສູນໃຫຍ່ແຫ່ງ ສປປ ລາວ ທີ່ນະຄອນດານັງ.

ໃນການພົບປະສອງຝ່າຍ, ທ່ານ ນາງ ພິມພາ ແກ້ວມີໄຊ, ຄະນະບໍລິຫານງານສູນກາງສະຫະພັນແມ່ຍິງລາວ, ປະທານສະຫະພັນແມ່ຍິງກະຊວງການຕ່າງປະເທດ ໄດ້ສະແດງຄວາມຊົມເຊີຍຕໍ່ຜົນສໍາເລັດ ແລະ ການຮ່ວມມືຂອງສອງຝ່າຍ, ລາຍງານສະພາບໂດຍຫຍໍ້ ແລະ ການແລກປ່ຽນບົດຮຽນກັບຝ່າຍຫວຽດນາມ; ແຈ້ງສະພາບຂອງສະຫະພັນແມ່ຍິງລາວ, ໂດຍສະເພາະການເຄື່ອນໄຫວການປະກອບສ່ວນຂອງ ສະຫະພັນແມ່ຍິງກະຊວງການຕ່າງປະເທດ. ພ້ອມນັ້ນ, ຍັງໄດ້ສະເໜີແນວທາງນະໂຍບາຍຂອງພັກ-ລັດຖະບານ ຕໍ່ການປະຕິບັດສິດສະເໝີພາບ ລະຫວ່າງ ຍິງ-ຊາຍ, ກົນໄກການສົ່ງເສີມຄວາມກ້າວໜ້າຂອງແມ່ຍິງ ແລະ ແມ່-ເດັກ ໃນ ສປປ ລາວ ແລະ ການຜັນຂະຫຍາຍຕົວຈິງ.

ຕາງໜ້າຝ່າຍຫວຽດນາມ, ທ່ານ ນາງ ຫງຽນ ທິ ທູ ຮ່າ, ຄະນະບໍລິຫານງານແມ່ຍິງຫວຽດນາມ, ປະທານແມ່ຍິງນະຄອນດານັງ ໄດ້ແຈ້ງສະພາບການພັດທະນາເສດຖະກິດ-ສັງຄົມ ແລະ ການປະກອບສ່ວນຂອງແມ່ຍິງດານັງ. ການພົວພັນຮ່ວມມືແລກປ່ຽນກັບ 5 ແຂວງພາກໃຕ້ ຂອງ ສປປ ລາວ ທີ່ເປັນການສົ່ງເສີມ-ຮັດແໜ້ນຄວາມສາມັກຄີ ລະຫວ່າງສອງຊາດ, ຊຶ່ງໃນນັ້ນ ແມ່ຍິງໄດ້ປະກອບສ່ວນຢ່າງຕັ້ງໜ້າ.

ສອງຝ່າຍ ໄດ້ຕີລາຄາສູງຕໍ່ການແລກປ່ຽນບົດຮຽນນໍາກັນ ໂດຍສະເພາະແນໃສ່ເພື່ອເປັນການຍົກສູງພາລະບົດບາດ, ສິດສະເໝີພາບ ແລະ ການສົ່ງເສີມຄວາມກ້າວໜ້າຂອງແມ່ຍິງ ເຂົ້າໃນພາລະກິດປົກປັກຮັກສາ ແລະ ພັດທະນາປະເທດຊາດ, ທັງເປັນການປະກອບສ່ວນອັນສໍາຄັນ ເຂົ້າໃນການເສີມສ້າງສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສາມັກຄີພິເສດ ລາວ-ຫວຽດນາມ ໃຫ້ໄດ້ຮັບການພັດທະນາຍິ່ງໆຂຶ້ນ.

ຄະນະຝ່າຍລາວ ໄດ້ເຊີນຊວນແມ່ຍິງນະຄອນດານັງ ຢ້ຽມຢາມທັດສະນະສຶກສາ ຢູ່ ສປປ ລາວ ໂດຍສະເພາະແມ່ນລາວໄດ້ເປີດປີທ່ອງທ່ຽວ ໃນປີ 2018. ນອກນັ້ນ, ຄະນະສະຫະພັນແມ່ຍິງກະຊວງການຕ່າງປະເທດ ໄດ້ທ່ຽວຊົມສະຖານທີ່ສໍາຄັນດ້ານປະຫວັດສາດ ແລະ ແຫຼ່ງທ່ອງທ່ຽວທີ່ມີຊື່ສຽງ, ສວຍງາມ ໃນນະຄອນດານັງ ເຊັ່ນ: ເມືອງໂຫ້ຍອານ, ພູບ່ານ່າ ແລະ ສະຖານທີ່ແຫ່ງອື່ນໆ.