ໃນວັນທີ 3 ພະຈິກ 2016, ທີ່ກະຊວງການຕ່າງປະເທດ, ສະຫະພັນກຳມະບານກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ຜົນສຳເລັດກອງປະຊຸມເປີດກວ້າງ ຄົບຄະນະບໍລິຫານງານສູນກາງ ສະຫະພັນກຳມະບານລາວທົ່ວປະເທດ ຄັ້ງທີ 2 ສະໄຫມທີ VII, ເຊິ່ງໄດ້ຈັດຂຶ້ນໃນວັນທີ 29-30 ກັນຍາ 2016 ທີ່ນະຄອນຫລວງວຽງຈັນ; ເຜີຍແຜ່ໂດຍ ສະຫາຍ ຄໍາອິນ ຄິດຈະເດດ, ຄະນະບໍລິຫານງານສູນກາງ ສະຫະພັນກຳມະບານລາວ, ທັງເປັນປະທານກຳມະບານກະຊວງການຕ່າງປະເທດ ໂດຍມີບັນດາສະມາຊິກກຳມະບານກະຊວງການຕ່າງປະເທດ ຈຳນວນ 305 ສະຫາຍ, ຍິງ 80 ສະຫາຍ ເຂົ້າຮ່ວມຟັງ.

ຈຸດປະສົງການຈັດກອງປະຊຸມເຜີຍແຜ່ຄັ້ງນີ້ ແມ່ນເພື່ອເຮັດໃຫ້ສະມາຊິກກຳມະບານກະຊວງການຕ່າງປະເທດ ໄດ້ຮັບຮູ້, ເຂົ້າໃຈ ແລະ ເຊື່ອມຊືມເນື້ອໃນຈິດໃຈຂອງກອງປະຊຸມດັ່ງກ່າວ ໃຫ້ຊາບທົ່ວເຖິງກັນ ເພື່ອພ້ອມກັນຜັນຂະຫຍາຍມະຕິຂອງກອງປະຊຸມ ໃຫ້ປະກົດຜົນເປັນຈິງ, ໂດຍສະເພາະແມ່ນການຜັນຂະຫຍາຍເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານລາວວາງອອກ.

ກອງປະຊຸມໄດ້ຮັບຟັງບາງເອກະສານທີ່ສຳຄັນຄື: ບົດສະຫລຸບການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນສະຫະພັນກຳມະບານລາວທົ່ວປະເທດ ສະໄຫມທີ VII ແລະ ທິດທາງແຜນການເຄື່ອນໄຫວວຽກງານຂອງສະຫະພັນກຳມະບານ ປີ 2017, ແຜນຍຸດທະສາດພັດທະນາວຽກງານກຳມະບານລາວ 5 ປີ ຄັ້ງທີ 3 ແຕ່ປີ 2016-2020, ແຜນຍຸດທະສາດພັດທະນາວຽກງານກຳມະບານລາວ 10 ປີ ແຕ່ປີ 2016-2025 ແລະ ວິໄສທັດຮອດປີ 2030, ການຈັດຕັ້ງປະຕິບັດເນື້ອໃນຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານລາວວາງອອກ, ບາງບົດໂອ້ລົມທີ່ສຳຄັນຂອງທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະ ເອກະສານອື່ນໆ ທີ່ກອງປະຊຸມຄົບຄະນະ ໄດ້ນຳມາປຶກສາຫາລື ແລະ ພິຈາລະນາຮັບຮອງເອົາ.

ຕອນທ້າຍ, ສະຫາຍ ຄຳອິນ ຄິດຈະເດດ ຍັງໄດ້ເນັ້ນເຖິງບົດບາດສຳຄັນຂອງກຳມະບານລາວ ພາຍໃຕ້ການນຳພາຂອງພັກ ໄດ້ປະກອບສ່ວນພາລະກິດຂອງຕົນ ເຂົ້າໃນການຕໍ່ສູ້ກູ້ຊາດ, ເຕົ້າໂຮມກຳລັງປະຕິວັດ, ນຳພາຊົນຊັ້ນກຳມະກອນຕໍ່ສູ້ຍາດເອົາ ເອກະລາດ, ເສລິພາບ ແລະ ສັນຕິສຸກ ມາສູ່ປວງຊົນລາວທັງຊາດ.

ໃນປະຈຸບັນ, ກຳມະບານລາວ ກໍຄືຊາວຜູ້ອອກແຮງງານລາວ ກໍໄດ້ເປັນເຈົ້າການໃນການປົກປັກຮັກສາ ແລະ ພັດທະນາເສດຖະກິດ-ສັງຄົມ ຢ່າງຕັ້ງຫນ້າ; ຮຽກຮ້ອງໃຫ້ສະມາຊິກກຳມະບານ ນຳເອົາເນື້ອໃນຈິດໃຈຂອງກອງປະຊຸມ ໂດຍສະເພາະແມ່ນ ຂໍ້ແຂ່ງຂັນ 5 ເປັນເຈົ້າ ໄປຜັນຂະຫຍາຍໃຫ້ປະກົດຜົນເປັນຈິງ, ເຊີດຊູຄວາມເປັນເຈົ້າການ ໃນການປະຕິບັດຫນ້າທີ່ວຽກງານວິຊາສະເພາະ ແນວທາງການຕ່າງປະເທດຂອງພັກ ແລະ ລັດຖະບານ, ປົກປັກຮັກສາ ແລະ ສ້າງສາປະເທດຊາດ ໃຫ້ມີຄວາມຈະເລີນກ້າວຫນ້າ ແລະ ວັດທະນາຖາວອນ ເພື່ອນຳເອົາຄວາມສົມບູນພູນສຸກ ມາໃຫ້ປະຊາຊົນລາວບັນດາເຜົ່າ ໃນຕໍ່ຫນ້າ ຢ່າງແທ້ຈິງ.