ຫຼັງຈາກໄດ້ມີການຈັດຕັ້ງປະຕິບັດມາດຕະການຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ຢ່າງເຂັ້ມງວດ ມາເປັນເວລາ 3 ປີ, ເພື່ອເປັນສ່ວນໜຶ່ງທີ່ສໍາຄັນໃນຄວາມພະຍາຍາມສະກັດກັ້ນການແຜ່ລະບາດຂອງເຊື້ອພະຍາດດັ່ງກ່າວໃນຂອບເຂດທົ່ວໂລກ ຈົນໄດ້ຮັບຜົນສຳເລັດຢ່າງເປັນຮູບປະທຳ ແລະ ໃນທີ່ສຸດ ສປ ຈີນ ກໍສາມາດກັບມາເປີດປະເທດຢ່າງເຕັມຮູບແບບ ນັບແຕ່ ວັນທີ 8 ມັງກອນ 2023 ເປັນຕົ້ນມາ, ດ້ວຍການຍົກເລີກນະໂຍບາຍ “ໂຄວິດເປັນ 0” ກໍຄື ຜ່ອນຜັນບັນດາມາດຕະການໃນການເດີນທາງເຂົ້າ-ອອກປະເທດ ໂດຍບໍ່ມີການແຍກປ່ຽວ ແລະ ບໍ່ຈຳເປັນຕ້ອງໄດ້ກວດຫາເຊື້ອພະຍາດໂຄວິດ-19 ກ່ອນຈະເຂົ້າໄປໃນສະຖານທີ່ສາທາລະນະ ເຊັ່ນ: ສະຖານີລົດໄຟ, ຮ້ານອາຫານ ແລະ ສະຖານທີ່ອອກກຳລັງກາຍ ເປັນຕົ້ນ.

ການເປີດປະເທດຢ່າງເຕັມຮູບແບບຂອງ ສປ ຈີນ ໃນຖານະທີ່ເປັນປະເທດໃຫຍ່ ແລະ ມີປະຊາກອນ 1,4 ຕື້ກວ່າຄົນ ປຽບເໝືອນການເປີດປະຕູແຫ່ງຄວາມຫວັງ ແລະ ກາລະໂອກາດໃນການຟື້ນຟູເສດຖະກິດຂອງພາກພື້ນ ກໍຄື ສາກົນ ທີ່ໄດ້ຮັບຜົນກະທົບຢ່າງຮຸນແຮງຈາກການແຜ່ລະບາດຂອງເຊື້ອພະຍາດໂຄວິດ-19,ໂດຍສະເພາະແມ່ນຂະແໜງ ອຸດສາຫະກຳການທ່ອງທ່ຽວ ແລະ ການບໍລິການທີ່ກາຍເປັນອຳມະພາດ ຫຼື ຢຸດສະຫງັກໃນທົ່ວໂລກຕະຫຼອດໄລຍະເວລາ 3 ປີທີ່ຜ່ານມາ, ຍ້ອນການຈັດຕັ້ງປະຕິບັດບັນດາມາດຕະການຕ້ານ ແລະ ສະກັດກັັ້ນການແຜ່ລະບາດຂອງເຊື້ອພະຍາດດັ່ງກ່າວ ເປັນຕົ້ນແມ່ນມາດຕະການປິດເມືອງ-ປິດປະເທດ, ເຊິ່ງເຮັດໃຫ້ສູນເສຍລາຍໄດ້ເປັນຈໍານວນມະຫາສານ, ອັດຕາໄພຫວ່າງງານເພີ່ມຂຶ້ນຢ່າງໄວວາ, ຄວາມແຕກໂຕນທາງດ້ານເສດຖະກິດຂະຫຍາຍກວ້າງອອກ ແລະ ການດຳລົງຊີວິດຂອງປະຊາຊົນມີຄວາມຝືດເຄືອງໃນທຸກທະວີບທົ່ວໂລກ. ອີງຕາມຂໍ້ມູນຈາກອົງການທ່ອງທ່ຽວໂລກ (UNWTO) ໄດ້ໃຫ້ຮູ້ວ່າ ສະເພາະໃນປີ 2020 ຂະແໜງການທ່ອງທ່ຽວໂລກສູນເສຍລາຍໄດ້ຫຼາຍກວ່າ 2 ພັນຕື້ໂດລາສະຫະລັດ ( 2 trillion USD). ເຊັ່ນດ່ຽວກັນ, ອົງການແຮງງານສາກົນ (ILO)  ໄດ້ເປີດເຜີຍວ່າ ໃນປີ 2020 ການຢຸດສະຫງັກຂອງອຸດສາຫະກຳການທ່ອງທ່ຽວ ໄດ້ສົ່ງຜົນກະທົບໂດຍກົງຕໍ່ຫົວໜ່ວຍທຸລະກິດ ກໍຄື ຜູ້ປະກອບການທີ່ຕິດພັນກັບການທ່ອງທ່ຽວ ແລະ ການບໍລິການ ເປັນຕົ້ນແມ່ນ ໂຮງແຮມ, ຮ້ານອາຫານ, ສະຖານບັນເທີງ, ກາຊີໂນ, ເຮືອສຳລານ, ສາຍການບິນ ແລະ ການບໍລິການອື່ນໆທີ່ກ່ຽວຂ້ອງ, ເຊິ່ງເຮັດໃຫ້ມີຈໍານວນຜູ້ວ່າງງານໃນຂະແໜງດັ່ງກ່າວຫຼາຍກວ່າ 60 ລ້ານຄົນ.

ກ່ອນໜ້າທີ່ຈະມີການລະບາດຂອງເຊື້ອພະຍາດໂຄວິດ-19, ອຸດສາຫະກໍາການທ່ອງທ່ຽວ ແລະ ການບໍລິການ ແມ່ນຂະແໜງໜຶ່ງທີ່ມີບົດບາດສຳຄັນຕໍ່ເສດຖະກິດໂລກ, ເຊິ່ງກວມເອົາ 10,4 % ຂອງລວມຍອດຜະລິດຕະພັນພາຍໃນຂອງໂລກ ( Global GDP) ແລະ ໄດ້ສ້າງວຽກເຮັດງານທໍາໄດ້ຫຼາຍກວ່າ 319 ລ້ານຕໍາແໜ່ງງານ. ສະເພາະໃນປີ 2019, ຈຳນວນນັກທ່ອງທ່ຽວສາກົນມີເຖິງ 1.500 ລ້ານຄົນ. ໃນນັ້ນ, ສປ ຈີນ ບໍ່ພຽງແຕ່ເປັນຕົ້ນທາງນັກທ່ອງທ່ຽວສາກົນທີ່ໃຫຍ່ຕິດອັນດັບໜຶ່ງຂອງໂລກ ແຕ່ຍັງມີກຳລັງແຮງໃນການໃຊ້ຈ່າຍທີ່ສູງທີ່ສຸດໃນຕະຫຼາດການທ່ອງທ່ຽວສາກົນ.      ອີງຕາມສະຖິຕິຈາກສະຖາບັນຄົ້ນຄວ້າອຸດສາຫະກຳການທ່ອງທ່ຽວຂອງຈີນ ໄດ້ໃຫ້ຮູ້ວ່າ ນັກທ່ອງທ່ຽວຈີນໄດ້ເດີນທາງໄປທ່ຽວຕ່າງປະເທດຈຳນວນ 155 ລ້ານຄົນ ແລະ ໄດ້ນໍາເອົາເງິນໄປໃຊ້ຈ່າຍຫຼາຍກວ່າ 250 ຕື້ໂດລາສະຫະລັດ ໃນທົ່ວໂລກ, ເຊິ່ງໄດ້ປະກອບສ່ວນອັນສໍາຄັນເຂົ້າໃນການພັດທະນາເສດຖະກິດ-ສັງຄົມຂອງຫຼາຍປະເທດທົ່ວໂລກ.   ຫຼ້າສຸດ, ໃນວັນທີ 6 ກຸມພາ 2023,​ ກະຊວງວັດທະນະທຳ ແລະ ທ່ອງທ່ຽວ ແຫ່ງ ສປປ ຈີນ ໄດ້ປະກາດແຈ້ງການອະນຸຍາດໃຫ້ປະຊາຊົນຈີນເດີນທາງໄປທ່ອງທ່ຽວຕ່າງປະເທດເປັນກຸ່ມ ໄດ້ ໂດຍເລີ່ມຈາກ 20 ປະເທດ,​ໃນນັ້ນ ລວມມີ ສປປ ລາວ.​

ສະນັ້ນ, ການເປີດປະເທດຂອງຈີນ ຈຶ່ງໄດ້ກາຍເປັນຄວາມຫວັງ ແລະ ກາລະໂອກາດອັນດີສຳລັບຫຼາຍປະເທດທົ່ວໂລກ ລວມທັງ ສປປ ລາວ ໃນການຟື້ນຟູອຸດສາຫະກຳການທ່ອງທ່ຽວ ແລະ ການບໍລິການໃຫ້ກັບມາຄຶກຄື້ນອີກຄັ້ງ ຫຼັງຈາກໄດ້ຢຸດສະຫງັກໄປເປັນເວລາ 3 ປີ, ເຊິ່ງຈະຊ່ວຍໃຫ້ອຸດສາຫະກໍາການບິນ ແລະ ການບໍລິການອື່ນໆທີ່ຕິດພັນກັບອຸດສາຫະກຳການທ່ອງທ່ຽວສາມາດກັບມາໃຫ້ບໍລິການໄດ້ເປັນປົກກະຕິອີກ ແລະ ຈະເປັນການສ້າງໂອກາດສຳລັບການຈ້າງງານໃຫ້ແກ່ປະຊາຊົນໃນທ້ອງຖິ່ນຄືນໃໝ່ໃນຂະແໜງການດັ່ງກ່າວ, ເຖິງວ່າຍັງຈະໃຊ້ເວລາອີກໄລຍະໜຶ່ງໃນການຟື້ນຟູໃຫ້ກັບຄືນສູ່ໃນລະດັບກ່ອນການແຜ່ລະບາດຂອງເຊື້ອພະຍາດໂຄວິດ-19.

ດ້ວຍເຫດຜົນດັ່ງກ່າວ, ບັນດາປະເທດທີ່ເຄີຍເປັນຈຸດໝາຍປາຍທາງຂອງນັກທ່ອງທ່ຽວຈີນໃນພາກພື້ນຕ່າງໆທົ່ວໂລກ ຕ່າງກໍໄດ້ມີການກະກຽມຕ້ອນຮັບນັກທ່ອງທ່ຽວຈີນ ໂດຍການຟື້ນຟູແຫຼ່ງທ່ອງທ່ຽວທາງທຳມະຊາດ, ປະຫວັດສາດ ແລະ ວັດທະນະທຳຂອງຕົນ ໄປຄຽງຄູ່ກັບການຈັດຕັ້ງປະຕິບັດນະໂຍບາຍກະຕຸ້ນການທ່ອງທ່ຽວ ເປັນຕົ້ນແມ່ນການຫຼຸດຄ່າທຳນຽມວິຊາ ແລະ ເຮັດໃຫ້ຂັ້ນຕອນການອະນຸມັດວິຊາມີຄວາມວ່ອງໄວຫຼາຍຂຶ້ນ, ຈັດພິທີຕ້ອນຮັບນັກທ່ອງທ່ຽວຈາກຈີນ ແລະ ອື່ນໆ ເພື່ອດຶງດູດນັກທ່ອງທ່ຽວຈາກ ສປ ຈີນ ກໍຄື ນັກທ່ອງທ່ຽວຈາກປະເທດອື່ນໆ ແນໃສ່ຟື້ນຟູເສດຖະກິດ-ສັງຄົມທີ່ໄດ້ຮັບຜົນກະທົບຈະການແຜ່ລະບາດຂອງເຊື້ອພະຍາດໂຄວິດ-19.

ເຊັ່ນດຽວກັນ, ອຸດສາຫະກຳການທ່ອງທ່ຽວ ແລະ ການເດີນທາງຂອງຈີນ ກໍຈະໄດ້ຮັບຜົນປະໂຫຍດຈາກນັກທ່ອງທ່ຽວສາກົນທີ່ຕ້ອງການເດີນເຂົ້າໄປທ່ຽວ ກໍຄື ເພື່ອດຳເນີນທຸລະກິດໃນ ສປ ຈີນ ລວມທັງຄົນຈີນທີ່ອາໃສຢູ່ຕ່າງປະເທດທີ່ຕ້ອງການເດີນທາງກັບໄປຢ້ຽມຢາມບ້ານເກີດເມືອງນອນ ເພື່ອພົບປະກັບຄອບຄົວ ແລະ ຍາດພີ່ນ້ອງ ພາຍຫຼັງການຄອງຄອຍມາເປັນເວລາ 3 ປີ.

ສຳລັບ ສປປ ລາວ, ການເປີດປະເທດຂອງ ສປ ຈີນ ຈະເຮັດໃຫ້ການໄປມາຫາສູ່, ຄ້າຂາຍ, ແລກປ່ຽນວັດທະນະທຳນຳກັນ ລະຫວ່າງ ປະຊາຊົນສອງຊາດ ລາວ-ຈີນ ຈີນ-ລາວ ມີຄວາມສະດວກສະບາຍຂຶ້ນກວ່າເກົ່າ ໂດຍສະເພາະແມ່ນຜ່ານການນຳໃຊ້ເສັ້ນທາງລົດໄຟ ລາວ-ຈີນ, ເຊິ່ງຈະຊ່ວຍເຮັດໃຫ້ອຸດສາຫະກຳການທ່ອງທ່ຽວຂອງລາວກັບມາມີຊີວິດຊີວາອີກຄັ້ງ, ທັງຈະຊ່ວຍໃຫ້ລາວມີເງິນຕາຕ່າງປະເທດເຂົ້າມາໃນປະເທດຫຼາຍຂຶ້ນ. ສະນັ້ນ, ນອກຈາກການກະກຽມຕ້ອນຮັບກາລະໂອກາດອັນດີແລ້ວ, ສປປ ລາວ ກໍຕ້ອງໄດ້ມີການກະກຽມຄວາມພ້ອມໃນການສະກັດກັ້ນ ແລະ ຮັບມືກັບບາງສິ່ງທ້າທາຍທີ່ອາດຈະມາຄຽງຄູ່ກັບການຫຼັງໄຫຼຂອງນັກທ່ອງທ່ຽວຕ່າງປະເທດເຂົ້າມາໃນປະເທດລາວ ເປັນຕົ້ນແມ່ນບັນດາປະກົດການຫຍໍ້ທໍ້ທາງສັງຄົມ ເຊັ່ນ: ການຄ້າມະນຸດ, ການຄ້າຂາຍຢາເສບຕິດ, ການຄ້າສິ່ງຜິດກົດ ໝາຍ, ການລັກລອບເຂົ້າເມືອງຜິດກົດໝາຍ ແລະ ບັນຫາຄວາມປອດໄພອື່ນໆ.

ໂດຍ: ສະຖາບັນການຕ່າງປະເທດ, ກະຊວງການຕ່າງປະເທດ

                                                                                                      (ໂຄງການຄົ້ນຄວ້າຮ່ວມ ລາວ-ຈີນ)