ສປປ ລາວ ແລະ ສສເ ຢຍລະມັນ ໄດ້ສ້າງຕັ້ງສາຍພົວພັນການທູດນຳກັນໃນວັນທີ 31 ມັງກອນ 1958 ຊຶ່ງໄດ້ວຽນມາບັນຈົບຄົບຮອບ 60 ປີ ພໍດີ ໃນປີນີ້. ໃນຕະຫຼອດໄລຍະ 60 ປີທີ່ຜ່ານມາ ທັງສອງປະເທດໄດ້ດຳເນີນການພົວພັນຮ່ວມມືຢ່າງຕັ້ງໜ້າ ແລະ ເພີ້ມທະວີຂຶ້ນຢ່າງໜັກແໜ້ນ ດ້ວຍການໃຫ້ການສະໜັບສະໜູນຊຶ່ງກັນ ແລະ ກັນທັງໃນຂອບການຮ່ວມມືສອງຝ່າຍ ແລະ ຂອບຫຼາຍຝ່າຍໃນເວທີສາກົນ. ລັດຖະບານເຢຍລະມັນໄດ້ໃຫ້ການຮ່ວມມືຊ່ວຍເຫຼືອແກ່ ສປປ ລາວ ຢູ່ໃນສອງຂະແໜງການບຸລິມະສິດ ຄື: ການຮ່ວມມືທາງດ້ານເຕັກນິກ ໂດຍຜ່ານອົງການຮ່ວມມືສາກົນເພື່ອການພັດທະນາເຢຍລະມັນ (GIZ) ແລະ ການຮ່ວມມືທາງດ້ານການເງິນຜ່ານທະນາຄານສິນເຊື່ອເພື່ອການພັດທະນາເຢຍລະມັນ (KfW)ໂດຍອີງໃສ່ເປົ້າໝາຍລວມຂອງແຜນພັດທະນາເສດຖະກິດ-ສັງຄົມ ຂອງລັດຖະບານລາວ ເປັນຕົ້ນແມ່ນເນັ້ນໜັກໃສ່ການພັດທະນາຊົນນະບົດ ,ວຽກງານອາຊີວະສຶກສາ, ການພັດທະນາເສດຖະກິດແບບຍືນຍົງ, ການພັດທະນາຊັບພະຍາກອນມະນຸດ, ການອະນຸລັກສິ່ງແວດລ້ອມ, ກໍ່ສ້າງໂຄງລ່າງພື້ນຖານ ແລະ ການສົ່ງເສີມພາກທຸລະກິດ-ເອກະຊົນ. ນອກຈາກນີ້, ເຢຍລະມັນຍັງໄດ້ໃຫ້ການຊ່ວຍເຫຼືອລາວ ໂດຍຜ່ານອົງການຈັດຕັ້ງສາກົນອື່ນໆອີກເຊັ່ນ: ສະຫະພາບເອີຣົບ ແລະ ອົງການແມ່ນ້ຳຂອງ. ມາເຖິງປັດຈຸບັນເຢຍລະມັນໄດ້ໃຫ້ການຊ່ວຍເຫຼືອລາວມີມູນຄ່າປະມານ 380 ລ້ານເອີໂຣ.
ໂດຍລວມແລ້ວ, ການຮ່ວມມືສອງຝ່າຍ ລາວ-ເຢຍລະມັນ ແມ່ນຢູ່ໃນລະດັບດີພໍສົມຄວນ, ສະເໜີຕົ້ນສະເໝີປາຍ ແລະ ມີການປຶກສາຫາລືກັນຢ່າງເປັນປະຈຳ ໂດຍຕ່າງຝ່າຍຕ່າງເຂົ້າໃຈເຊິ່ງກັນ ແລະ ກັນໃນຖານະຄູ່ຮ່ວມມືເພືຶ່ອການພັດທະນາ. ພ້ອມກັນນີ້, ການຊ່ວຍເຫຼືອກໍ່ມີລັກສະນະເພີ້ມຂຶ້ນ ໂດຍທີ່ທັງສອງຝ່າຍໄດ້ຕີລາຄາສູງ ແລະ ເພິງພໍໃຈຕໍ່ຜົນສໍາເລັດຂອງການຮ່ວມມືໃນໄລຍະຜ່ານມາ, ຊຶ່ງເປັນການປະກອບສ່ວນໂດຍກົງເຂົ້າໃນການປະຕິບັດແຜນພັດທະນາເສດຖະກິດ-ສັງຄົມຂອງລັດຖະບານແຫ່ງ ສປປ ລາວ ໂດຍສະເພາະແມ່ນໃນການລຶບລ້າງຄວາມທຸກຍາກ ແລະ ການປັບປຸງຊີວິດການເປັນຢູ່ຂອງປະຊາຊົນໃຫ້ດີຂຶ້ນເທື່ອລະກ້າວ, ກໍຄືໃນການນຳພາປະເທດ ສປປ ລາວ ໃຫ້ຫຼຸດພົ້ນອອກຈາກສະພາບດ້ອຍພັດທະນາໃນອະນາຄົດອັນໃກ້ນີ້.