ໃນວັນທີ 06 ທັນວາ 2016 ທີ່ ກະຊວງການຕ່າງປະເທດ, ສະຫະພັນກຳມະບານກະຊວງການຕ່າງປະເທດ ຮ່ວມກັບ ໜ່ວຍກຳມະບານກົມເສດຖະກິດກະຊວງການຕ່າງປະເທດ ໄດ້ຈັດກອງປະຊຸມເຜີຍແຜ່ ໃນຫົວຂໍ້: “ການທູດ ແລະ ເສດຖະກິດ” ໃຫ້ກຽດຂຶ້ນບັນລະຍາຍໂດຍ ທ່ານ ບຸນເກີດ ສັງສົມສັກ, ລັດຖະມົນຕີປະຈຳສຳນັກງານນາຍົກລັດຖະມົນຕີ, ໂດຍມີຄະນະນຳກະຊວງການຕ່າງປະເທດ ແລະ ສະມາຊິກກຳມະບານອ້ອມຂ້າງກະຊວງການຕ່າງປະເທດ ເຂົ້າຮ່ວມທັງໝົດ 270 ທ່ານ.
ຈຸດປະສົງຂອງກອງປະຊຸມເຜີແຜ່ຄັ້ງນີ້ ແມ່ນເພື່ອເຜີຍແຜ່ຂໍ້ມູນ ກ່ຽວກັບ ຄວາມສໍາຄັນຂອງການທູຸດເສດຖະ ກິດໃນປະຈຸບັນ ເພື່ີອໃຫ້ບັນດາສະມາຊິກກຳມະບານ ແລະ ພະນັກງານອ້ອມຂ້າງກະຊວງການຕ່າງປະເທດໄດ້ຮັບຮູ້, ເຂົ້າໃຈ ແລະ ກຳໄດ້ເຖິງບັນຫາການທູດເສດຖະກິດ.
ໃນກອງປະຊຸມຄັ້ງນີ້ ທ່ານ ບຸນເກີດ ສັງສົມສັກ ໄດ້ອະທິບາຍເຖິງປະເພດຂອງການທູດຕ່າງໆ ເປັນຕົ້ນແມ່ນ ການທູດການເມືອງ, ການທູດເສດຖະກິດ, ການທູດວັດຖະນະທຳ-ສັງຄົມ, ການທູດປະຊາຊົນ. ນອກຈາກນີ້, ຍັງໄດ້ເນັ້ນໜັກໃຫ້ຜູ້ເຂົ້າຮ່ວມໄດ້ຮັບຮູ້ ແລະ ເຂົ້າໃຈເຖິງຄວາມໝາຍຂອງການທູດເສດຖະກິດ ໂດຍສະເພາະແມ່ນການປະຕິຮູບໂຄງສ້າງ ຂອງການທູດໃນປະຈຸບັນໃຫ້ກາຍເປັນການທູດຍຸກໃໝ່ ກໍ່ຄືເນັ້ນໃສ່ການປະສານງານກັບພາກສ່ວນຕ່າງໆ ໃຫ້ເປັນເອກະພາບ ແລະ ມີທິດທາງລວມ, ເປີດກ້ວາງໃຫ້ຂະແໜງການຕ່າງໆ ທັງພາກລັດ ແລະ ເອກະຊົນມີບົດບາດຫຼາຍຂຶ້ນ, ການຫັນເປັນສາກົນ, ການເຊື່ອມໂຍງເສດຖະກິດກັບພາກພື້ນ ແລະ ສາກົນ, ການຂະຫຍາຍຂົງເຂດເສດຖະກິດກໍ່ຄືເປີດກ້ວາງການຕະຫຼາດ, ການພັດທະນາແບບຍືນຍົງຕາມການແຜນການພັດທະນາເສດຖະກິດ-ສັງຄົມ ແຫ່ງຊາດ ຂອງ ສປປ ລາວ.