ຄະ​ນະ​ຜູ້​ແທນ​ແຫ່ງສ​ປ​ປ​ ລາວນຳ​ໂດຍທ່ານບຸນ​ເກີດສັງ​ສົມ​ສັກ, ລັດ​ຖະ​ມົນ​ຕີ​ປະ​ຈຳ​ສຳ​ນັກນາ​ຍົກ​ລັດຖະ​ມົນ​ຕີ, ຜູ້​ຮັບ​ຜິດ​ຊອບ​ວຽກ​ງານ​ຟ​ຣັງ​ໂກ​ໂຟ​ນີ, ໄ​ດ້​ເດີນ​ທາງ​ເຂົ້າ​ຮ່ວມກອງ​ປະ​ຊຸມ​ລະ​ດັບ ລັດ​ຖະ​ມົນ​ຕີແລະກອງ​ປະ​ຊຸມ​ສຸດຍອດຂອງອົງ​ການ​ຟ​ຣັງ​ໂກ​ໂຟ​ນີ​ສາ​ກົນໃນ​ນາມ​ຜູ້​ຕາງ​ໜ້າ​ພິ​ເສດຂອງປະ​ທານ​ປະ​ເທດແຫ່ງ ສາ​ທາ​ລະ​ນະ​ລັດ ​ປະ​ຊາ​ທິ​ປະ​ໄຕ​ ປະ​ຊາ​ຊົນ​ລາວ, ຊຶ່ງກອງ​ປະ​ຊຸມ​ດັ່ງ​ກ່າວ​ໄດ້​ດຳ​ເນີນໄປ​ແຕ່​ວັນ​ທີ 23 ເຖິງ 27 ພະ​ຈິກ 2016 ຢູ່​ທີ່ນະ​ຄອນຫຼວງ ອັນ​ຕາ​ນາ​ນາ​ຣີ​ໂວ ແຫ່ງ ມາ​ດາ​ກັ​ດສະ​ກາ.

          ກອ​ງ​ປະ​ຊຸມ​ສຸດຍອດ​ຂອງ ​ອົງ​ການ​ຟ​ຣັງ​ໂກ​ໂຟ​ນີ​ ຄັ້ງ​ນີ້ໄດ້​ດຳ​ເນີນ​ເປັນ​ຄັ້ງ​ທີ 16 ພາຍ​ໃຕ້​ຫົວ​ຂໍ້ “ການ​ຂະ​ຫຍາຍ​ຕົວ​ດ້ານ​ເສດ​ຖະ​ກິດ ແລະ ການ​ພັດ​ທະ​ນາເພື່ອ​ຜົນ​ປະ​ໂຫຍດ​ຂອງ​ທຸກ​ຄົນ” ໂດຍ​ໄດ້​ມີ​ການພິ​ຈາ​ລະ​ນາຫຼາຍ​ບັນ​ຫາ, ເປັນ​ຕົ້ນ​ແມ່ນ​ກ່ຽວ​ກັບ​ສະ​ພາບ​ການ​ຢູ່​​​ພາຍໃນ​ຂົງ​ເຂດຟ​ຣັງ​ໂກ​ໂຟ​ນີ ແລະ ກາ​ນ​ຮ່ວມ​ມືລະ​ຫວ່າງ​ບັນ​ດາ​ປະ​ເທດ​ສະ​ມາ​ຊິກ ແລະ ອົງ​ການໃນ​ການ​ຈັດ​ຕັ້ງ​ປະ​ຕິ​ບັດ​​ຜັນ​ຂະ​ຫຍາຍບັນ​ດາແຜນ​ງານ ແລະ ໂຄງ​ການ​ຕ່າງໆທີ່​ໄດ້​ວາງ​ໄວ້ນັບ​ທັງສິ່ງ​ທີ່​ຈະ​ໄດ້​​ຕົກ​ລົງອະ​ນຸ​ມັດ​ຈາກກອງ​ປະ​ຊຸມ​ໃນ​ຄັ້ງ​ນີ້.

          ສ​ປ​ປ​ ລາວ ເຮົາ​ໄດ້​ເຂົ້າ​ເປັນ​ສະ​ມາ​ຊິກ​ສົມ​ບູນ​ຂອງ​ອົງ​ການ​ຟ​ຣັງ​ໂກ​ໂຟ​ນີມາ​ແຕ່​ປີ 1991 ຊຶ່ງ​ມາ​ເຖິງປັດ​ຈຸ​ບັນການ​ພົວ​ພັນ​ຮ່ວມ​ມື​ກັບອົງ​ການໄດ້​ດຳ​ເນີນ​ໄປ​ຢ່າງ​ຕັ້ງ​ໜ້າໂດຍກວມ​ເອົາ​ບັນ​ດາ​ຂົງ​ເຂດ ແລະ ຂະ​ແໜງ​ການທີ່​​ສຳຄັນຄື: ການ​ສຶກ​ສາ ແລະ ຝຶກ​ອົບ​ຮົມ​ວິ​ຊາ​ຊີບ, ວັດ​ທະ​ນະ​ທຳ-ສັງ​ຄົມ, ຍຸ​ຕິ​ທຳ ແລະ ກົດ​ໝາຍ, ສາ​ທາ​ລະ​ນະ​ສຸກແລະອື່ນໆ. ໃນ​ກາງ​ເດືອນຕຸ​ລາ 2016 ທີ່​ຜ່ານ​ມາ, ທ່ານ ມີ​ກາ​ແອນຊັງ, ເລ​ຂາ​ທິ​ການ​ໃຫຍ່ອົງ​ການ​ຟ​ຣັງ​ໂກ​ໂຟ​ນີໄດ້​ເຄື່ອນ​ໄຫວ​ຢ້ຽມ​ຢາມ ສ​ປ​ປ​ ລາວ ຢ່າງ​ເປັນ​ທາງ​ການພາຍຫຼັງການ​ເຂົ້າ​ດຳ​ລົງ​ຕຳ​ແໜ່ງຊຶ່ງ​ໄດ້​ເປັນ​ນິ​ມິດ​ໝາຍ​ອັນ​ດີ​ໃຫ້​ແກ່​ການ​ທົບ​ທວນ​ຕີ​ລາ​ຄາການ​ພົວ​ພັນ​ຮ່ວມ​ມື ລະ​ຫວ່າງສອງ​ຝ່າຍແນ​ໃສ່​ເພື່ອ​ການ​ເພີ້ມ​ທະ​ວີ​ຂຶ້ນ​ຢ່າງ​ມິີຄວາມ​ກ້າວ​ໜ້າໃນ​ອະ​ນາ​ຄົດ​ຕໍ່​ໄປ.