ໃນວັນທີ 15 ພະຈິກ 2016, ທີ່ ຫໍປະຊຸມແຫ່ງຊາດ, ກອງປະຊຸມເຈົ້າຄອງນະຄອນຫຼວງອາຊຽນ ຄັ້ງທີ IV ໄດ້ໄຂຂຶ້ນຢ່າງເປັນທາງການພາຍໃຕ້ການເປັນປະທານຂອງ ທ່ານສິນລະວົງຄຸດໄພທູນ, ເຈົ້າຄອງນະຄອນຫຼວງວຽງຈັນ, ມີບັນດາເຈົ້າຄອງນະຄອນຫຼວງ ຈາກບັນດາປະເທດສະມາຊິກອາຊຽນ ເຂົ້າຮ່ວມ.

ທ່ານ ສິນລະວົງ ຄຸດໄພທູນ ກ່າວວ່າ: ກອງປະຊຸມຄັ້ງນີ້ ໄດ້ເລືອກເອົາຫົວຂໍ້ກວມລວມທີ່ວ່າ: “ພັນທະ ແລະ ໜ້າທີ່ຂອງນະຄອນຫຼວງອາຊຽນ ໃນພາລະກິດການເຊື່ອມໂຍງປະຊາຄົມອາຊຽນ” ກໍຄືວິໄສທັດປະຊາຄົມອາຊຽນ ປີ 2025 ເຊິ່ງປະກອບມີ 4 ຫົວຂໍ້ເຊັ່ນ:  1. ສ້າງນະຄອນທີ່ໜ້າຢູ່, 2. ຮັບປະກັນຄວາມປອດໄພສາທາລະນະ, 3. ຮັກສາ ແລະ ສົ່ງເສີມ ມໍລະດົກທາງດ້ານວັດທະນະທຳ ແລະ 4. ການຮ່ວມມືດ້ານແຮງງານ.

ສຳລັບຫົວຂໍ້ທີ 1. ສ້າງນະຄອນທີ່ໜ້າຢູ່ນັ້ນ, ນະຄອນຫຼວງວຽງຈັນ ໄດ້ສະເໜີ 6 ວິໄສທັດ 6 ຍຸດທະສາດ, ໃນນັ້ນ, ບັນຫາພື້ນຖານແມ່ນການພັດທະນານະຄອນແບບຍືນຍົງ, ໜ້າຢູ່ ແລະ ກ້າວໄປສູ່ເປັນນະຄອນນິເວດໃນອະນາຄົດ. ນອກຈາກນີ້, ນະຄອນຫຼວງ ຍັງສະເໜີວິໄສທັດ ແລະ ນະໂຍບາຍສ້າງນະຄອນໃຫ້ເປັນນະຄອນໜ້າຢູ່ ດ້ວຍ 6 ຕົວຊີ້ວັດ ກໍຄື 6 ສ ຂອງນະຄອນຫຼວງ ປະກອບມີ ສະຫງົບ, ສະອາດ, ສີຂຽວ, ສະຫວ່າງ, ສະເໜ່ ແລະ ສີວິໄລ.

ນອກຈາກນີ້, ກອງປະຊຸມໄດ້ປຶກສາຫາລືຫຼາຍບັນຫາ ເພື່ອຮ່ວມມືກັນໃນອະນາຄົດ ໂດຍສະເພາະແມ່ນໃນ 4 ຫົວຂໍ້ ຕາມເນື້ອໃນຂອງກອງປະຊຸມ. ຫຼັງຈາກນັ້ນ ທ່ານ ແກ້ວພິລາວັນ ອາໄພລາດ, ຮອງເຈົ້າ ຄອງນະຄອນຫຼວງວຽງຈັນ, ໄດ້ຖະແຫຼງຂ່າວຕໍ່ສື່ມວນຊົນວ່າ: ກອງປະຊຸມຄັ້ງນີ້ ບັນດາເຈົ້າຄອງນະຄອນຫຼວງ ໄດ້ຮັບຮູ້ພາລະບົດບາດຂອງນະຄອນຫຼວງອາຊຽນ ໃນການຮ່ວມມືດ້ານຕ່າງໆຕາມກົດບັດອາຊຽນ ແລະ ຈັດຕັ້ງປະຕິບັດວິໄສທັດອາຊຽນ 2025 ໃຫ້ປະກົດຜົນເປັນຈິງ ເພື່ອຄວາມເຂັ້ມແຂງຂອງປະຊາຄົມອາຊຽນ.