ໃນວັນທີ 13 ຕຸລາ 2016, ທີ່ ກະຊວງການຕ່າງປະເທດ, ຝ່າຍປະຕິບັດການໄຟຟ້ານະຄອນຫລວງ ໄດ້ຈັດກອງປະຊຸມເຜີຍແຜ່ ກ່ຽວກັບ ການຊົມໃຊ້ໄຟຟ້າຢ່າງປະຢັດ ແລະ ຖືກຕ້ອງຕາມເຕັກນິກ ໃຫ້ແກ່ພະນັກງານກະຊວງການຕ່າງປະເທດ. ເປັນກຽດໃຫ້ການບັນຍາຍໂດຍ ທ່ານ ແກ້ວຕາດຳ ມະໂນລົມ, ຫົວໜ້າຫ້ອງການຄຸ້ມຄອງລູກຄ້າ ແລະ ປະຊາສຳພັນ, ຝ່າຍປະຕິບັດການໄຟຟ້ານະຄອນຫລວງ. ຊຶ່ງມີບັນດາຄະນະກົມ, ຄະນະພະແນກ ແລະ ພະນັກງານວິຊາການ ຂອງກະຊວງການຕ່າງປະເທດ ເຂົ້າຮ່ວມຢ່າງພ້ອມພຽງ.

ກອງປະຊຸມດັ່ງກ່າວ, ໄດ້ນຳສະເໜີ ກ່ຽວກັບ ສະພາບລວມຂອງຝ່າຍປະຕິບັດການໄຟຟ້ານະຄອນຫລວງ, ລາຄາໄຟຟ້າ, ສາເຫດຂອງການມອດໄຟຟ້າ ແລະ ອຸປະຕິເຫດທີ່ເກີດຈາກການຊົມໃຊ້ໄຟຟ້າ, ຄວາມຮູ້ພື້ນຖານໃນການປະຢັດໄຟຟ້າ, ໃບແຈ້ງການ ແລະ ກົດລະບຽບຂອງໄຟຟ້າລວມ. ຊຶ່ງເຮັດໃຫ້ພະນັກງານຂອງກະຊວງການຕ່າງປະເທດ ໄດ້ຮັບຮູ້ ແລະ ເຂົ້າໃຈ ເພື່ອຈະນຳໃຊ້ໄຟຟ້າຢ່າງປອດໄພ, ຖືກຕ້ອງຕາມເຕັກນິກ ແລະ ມີປະສິດທິພາບ.

ໃນຕອນທ້າຍຂອງກອງປະຊຸມ ກໍໄດ້ມີການແລກປ່ຽນຄວາມຄິດເຫັນ ແລະ ຖາມ-ຕອບ ຄຳຖາມ ກ່ຽວກັບບັນຫາຕ່າງໆ ໃນການຊົມໃຊ້ໄຟຟ້າໃນປັດຈຸບັນ ເພື່ອໃຫ້ຄວາມກະຈ່າງແຈ້ງຂຶ້ນຕື່ມອີກດ້ວຍ.