ຫວ່າງບໍ່ດົນມານີ້ ສະຖານເອກອັກຄະລັດຖະທູດລາວ ປະຈຳສະຫະພັນຣັດເຊຍ ໄດ້ຈັດການອອກແຮງງານລວມຫມູ່ ເພື່ອຂໍ່ານັບຮັບຕ້ອນ ແລະ ຊົມເຊີຍ ວັນກໍາມະກອນສາກົນຄົບຮອບ 133ປີ ໂດຍການເຂົ້າຮ່ວມ ຂອງ ສະມາຊິກສາມອົງການຈັດຕັ້ງມະຫາຊົນ ( ແມ່ຍິງ, ກໍາມະບານ ແລະ ຊາວຫນຸ່ມ ) ພາຍໃນສະຖານທູດ ຢ່າງພ້ອມພຽງ.

ຫວ່າງບໍ່ດົນມານີ້ ທີ່ກະຊວງການຕ່າງປະເທດ, ລັດຖະມົນຕີການຕ່າງປະເທດຣັດເຊຍ ໄດ້ຈັດ Working Lunch ເປັນກຽດແກ່ທູດອາຊຽນ ປະຈໍາ ສ ຣັດເຊຍ.

ໃນວັນທີ 29-30 ເມສາ 2019, ທີ່ ໂຮງແຮມຄຣາວພາລ໌ຊາ, ກະຊວງການຕ່າງປະເທດ ແຫ່ງ ສປປ ລາວ ໂດຍຮ່ວມມືກັບ ຄະນະກໍາມະການກາແດງສາກົນ (ICRC) ປະຈໍາ ສປປ ລາວ ໄດ້ຈັດກອງປະຊຸມສໍາມະນາກ່ຽວກັບລະເບີດຝັງດິນ, ລະເບີດລູກຫວ່ານ ແລະ ສິ່ງເສດເຫຼືອຕົກຄ້າງຈາກສົງຄາມ. ກອງປະຊຸມສໍາມະນາຄັ້ງນີ້ ແມ່ນເປັນກອງປະຊຸມລະດັບພາກພື້ນ ເຊິ່ງໄດ້ຈັດຂຶ້ນເປັນຄັ້ງທໍາອິດ ຢູ່ ສປປ ລາວ ໂດຍການສະໜັບສະໜູນທຶນຮອນ ແລະ ຊ່ຽວຊານ ຈາກຄະນະກໍາມະການກາແດງສາກົນ (ICRC) ແລະ ໄດ້ຮັບກຽດກ່າວເປີດໂດຍ ທ່ານ ອານຸພາບ ວົງໜໍ່ແກ້ວ, ຫົວໜ້າກົມອົງການຈັດຕັ້ງສາກົນ, ກະຊວງການຕ່າງປະເທດ ແລະ ທ່ານ Christoph Sutter, ຫົວໜ້າຫ້ອງການພາກພື້ນຂອງຄະນະກໍາມະການກາແດງສາກົນ ແລະ ມີບັນດາເອກອັກຄະລັດຖະທູດ ແລະ ທູຕານຸທູດ ຈາກບັນດາປະເທດຜູ້ໃຫ້ທຶນ ແລະ ຄູ່ຮ່ວມພັດທະນາ ໃນການແກ້ໄຂບັນຫາລະເບີດບໍ່ທັນແຕກ ຢູ່ ສປປ ລາວ, ເຈົ້າໜ້າທີ່ທີ່ກ່ຽວຂ້ອງຈາກຫຼາຍພາກສ່ວນຂອງ ສປປ ລາວ, ກໍາປູເຈຍ, ຫວຽດນາມ, ໄທ, ມຽນມາ, ຟີລິບປີນ, ອິນໂດເນເຊຍ, ບັນດາຊ່ຽວຊານ ແລະ ທີ່ປຶກສາຈາກຄະນະກໍາມະການກາແດງສາກົນ, ຜູ້ຕາງໜ້າຈາກໜ່ວຍງານສະໜັບສະໜູນ ການຈັດຕັ້ງປະຕິບັດສົນທິສັນຍາວ່າດ້ວຍລະເບີດຝັງດິນຕ້ານບຸກຄົນ ແລະ ສົນທິສັນຍາ ວ່າດ້ວຍ ການເກືອດຫ້າມລະເບີດລູກຫວ່ານ ເຂົ້າຮ່ວມກອງປະຊຸມສຳມະນາຄັ້ງນີ້.