ເພື່ອເປັນການເສີມຂະຫຍາຍ ສາຍພົວພັນການທູດ ພ້ອມທັງ ສົ່ງເສີມການພົວພັນມິດຕະພາບ ແລະ ການຮ່ວມມື ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ເຄືອຈັກກະພົບໂດມີນິກ (Commonwealth of Dominica),ໃນຕອນເຊົ້າຂອງວັນທີ 29 ກໍລະກົດ 2021 ຢູ່ທີ່ສຳນັກງານຜູ້ຕາງໜ້າຖາວອນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ປະຈຳອົງການສະຫະປະຊາຊາດ ທີ່ນະຄອນ ນິວຢອກ, ສະຫະລັດ ອາເມລິກາ, ໄດ້ມີພິທີລົງນາມ ໃນຖະແຫຼງການຮ່ວມ ວ່າດ້ວຍ ການສ້າງຕັ້ງສາຍພົວພັນການທູດ ລະຫວ່າງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ເຄືອຈັກກະພົບ ໂດມີນິກ, ໂດຍຕາງໜ້າໃຫ້ລັດຖະບານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແມ່ນ ທ່ານ ອານຸພາບ ວົງໜໍ່ແກ້ວ, ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນແຫ່ງ ສປປ ລາວ ປະຈໍາອົງການ ສປຊ, ແລະ ຕາງໜ້າໃຫ້ລັດຖະບານ ແຫ່ງ ເຄືອຈັກກະພົບ ໂດມີນິກ ແມ່ນ ທ່ານ ນາງ ລໍຣີນ ບານເນສ-ໂຣເບີດສ໌(H.E. Mrs. Loreen Bannis-Roberts), ເອກອັກຄະລັດຖະທູດວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ໂດມີນິກ ປະຈໍາອົງການ ສປຊ ໄດ້ຮ່ວມລົງນາມໃນຖະແຫຼງການຮ່ວມຄັ້ງນີ້ ໂດຍການເຂົ້າຮ່ວມເປັນສັກຂີພິຍານ ໃນພິທີດັ່ງກ່າວຂອງບັນດານັກການທູດຂອງທັງສອງຝ່າຍ.
ໃນຕອນເຊົ້າຂອງວັນທີ 29 ກໍລະກົດ 2021, ທ່ານ ແສງ ສຸຂະທິວົງເອກອັກຄະລັດຖະທູດ ສປປ. ລາວ ປະຈຳຣາຊະອານາຈັກໄທ ທີ່ບາງກອກ ໄດ້ຕ້ອນຮັບການເຂົ້າຢ້ຽມອຳລາຂອງທ່ານ ກີ ປິເຕີ ເຣັດ (Kees Pieter Rade) ເອກອັກຄະລັດຖະທູດວິສາມັນ ຜູ້ມີອຳນາດເຕັມ ແຫ່ງ ຣາຊະອານາຈັກໂຮນລັງ ປະຈຳ ສາທາລະນະລັດ ປະຊາທິປະໄຕ ປະຊາຊົນລາວ ໂດຍມີສຳນັກງານຕັ້ງຢູ່ບາງກອກ, ຣາຊະອານາຈັກໄທ ໃນໂອກາດທີ່ສຳເລັດໜ້າທີ່ການທູດຂອງທ່ານ.
ໃນວັນທີ 26 ກໍລະກົດ 2021, ຢູ່ທີ່ສໍານັກງານໃຫຍ່ ອົງການການຄ້າໂລກ (WTO) ທີ່ ເຊີແນວ, ປະເທດສະວິດເຊີແລນ, ທ່ານ ລັດສະໝີ ແກ້ວມະນີ ໄດ້ເຂົ້າຍື່ນສານຕາຕັ້ງຕໍ່ ທ່ານ ນາງ ເອັນໂງຊີ ໂອກົນໂຈ ອີວຽນລາ (Ngozi Okonjo-Iweala), ຜູ້ອຳນວຍການໃຫຍ່ ອົງການການຄ້າໂລກ ເພື່ອດຳລົງຕໍາແໜ່ງເປັນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາ ອົງການການຄ້າໂລກ.