ໃນວັນທີ 19 ກຸມພາທີ່ຜ່ານມານີ້, ສະຖານເອກອັກຄະລັດຖະທູດແຫ່ງ ສາທາລະນະລັດ ປະຊາ ທິປະໄຕ ປະຊາຊົນລາວ ປະຈໍາຣາຊະອານາຈັກໄທ ທີ່ ບາງກອກ ໄດ້​ຈັດ​ຕັ້ງ​ການ​ເຜີຍ​ແຜ່​ຜົນສຳ​ເລັດ​ຂອງ​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ X ຂອງ​ພັກປະຊາຊົນ​ ປະຕິວັດ​ລາວໂດຍ​ໃຫ້ກຽດ​ເປັນ​ປະທານ​ຂອງ​ ທ່ານ ຫລີ ບຸນຄຳ້, ເອກອັກຄະລັດຖະທູດ, ມີ​ຄະນະພັກ, ຄະນະນຳສະຖານທູດ ​ແລະ ພະນັກງານ-ລັດຖະກອນ​ເຂົ້າ​ຮ່ວມຫລາຍກວ່າ 30 ທ່ານ.

   ທ່ານຫລີ ບຸນຄ້ຳ ​ໄດ້​ຍົກ​ໃຫ້​ເຫັນ​ເນື້ອ​ໃນ​ຈິດ​ໃຈ ​ແລະ ຜົນສຳ​ເລັດ​ຂອງກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະ​ເທດ ຄັ້ງ​ທີ X ຂອງ​ພັກ ​ເຊິ່ງ​ໄດ້​ມີ​ການ​ຮັບຮອງ​ຢ່າງ​ເປັນ​ເອກະສັນ​ບົດ​ລາຍ​ງານ​ການ​ເມືອງ, ວິ​ໄສ​ທັດ​ຮອດ​ປີ 2030, ຍຸດ​ທະ​ສາດ​ການ​ພັດທະນາ​ ຮອດ​ປີ 2025, ​ແຜນ​ພັດທະນາ​ເສດຖະກິດ-ສັງຄົມ 5 ປີ ຄັ້ງ​ທີ VIII.  ກອງ​ປະຊຸມ​ໄດ້​ຍົກ​ສູງ​ຄວາມ​ສາມາດນຳພາ  ແລະ  ລັກສະນະ​ນຳໜ້າຮອບດ້ານ ​ເພີ່ມ​ທະວີ​ຄວາມ​ສາມັກຄີ​ທົ່ວ​ປວງ​ຊົນ​ທັງ​ຊາດ, ຢຶດໝັ້ນການ​ປ່ຽນ​ແປງ​ໃໝ່ຢ່າງຮອບດ້ານ ​ແລະ ມີ​ຫລັກການ ​ເພື່ອ​ປົກ​ປັກ​ຮັກສາ ​ແລະ ສ້າງສາ​ພັດທະນາ​ປະ​ເທດ​ຊາດຕາມ​ທິດ​ຍືນ​ຍົງ ​ແລະ ກ້າວ​ສູ່​ສັງຄົມ​ນິຍົມ​ຢ່າງໜັກ​ແໜ້ນ.

ຕອນຄໍ່າຂອງວັນທີ 20 ກຸມພາ, ສະຖານທູດລາວ ຍັງໄດ້ຈັດໃຫ້ມີກອງປະຊຸມປະຈຳປີ ຂອງສະມາຄົມນັກສຶກສາລາວ ກຸ່ມ ຈຸລາລົງກອນ ມະຫາວິທະຍາໄລ ຂຶ້ນທີ່ຫ້ອງ ປະຊຸມຂອງສະຖານທູດ ເຊັ່ນດຽວກັນ ໂດຍການເປັນປະທານ ຂອງ ທ່ານ ຫລີ ບຸນຄຳ້, ເອກອັກຄະລັດຖະທູດ. ກອງປະຊູມເຊິງມີນັກສຶກຈຳນວນທັງໝົດ 95 ຄົນຈາກກຸ່ມຈຸລາລົງກອນ ມະຫາວິທະຍາໄລເຂົ້າຮ່ວມ ໄດ້ຜ່ານບົດສະຫລຸບການເຄື່ອນໄຫວ ຂອງສະມາຄົມໃນ 1 ປີຜ່ານມາ ແລະ ແຜນການດຳເນີນງານໃນປີ 2016 ໂດຍມີການປະກອບຄຳເຫັນຂອງຜູ້ແທນກອງປະຊຸມ ແລະ ປ່ອນບັດຄັດ ເລືອກເອົາຄະນະສະມາຄົມຊຸດໃໝ່.

ໃນຕອນທ້າຍຜູ້ແທນກອງປະຊຸມໄດ້ຮັບຟັງການໂອ້ລົມ ຂອງ ທ່ານ ຫລີ ບຸນຄ້ຳ ໂດຍທ່ານໄດ້ຍົກໃຫ້ເຫັນບັນຫາສຳຄັນຫຼາຍປະເດັນເຊັ່ນ: ຜົນສຳເລັດກອງປະຊຸມໃຫ່ຍຜູ້ແທນ ທົ່ວປະເທດ ຄັ້ງທີ 10 ຂອງພັກ, ໝາກຜົນແຫ່ງການພັດທະນາ ເສດຖະກິດ-ສັງຄົມ ຂອງລາວເຮົາໃນໄລຍະຜ່ານມາ, ທິດທາງການພັດທະນາປະເທດໃນຕໍ່ໜ້າ, ຍົກໃຫ້ເຫັນສະພາບ ພົ້ນເດັ່ນຂອງພາກພື້ນ ແລະ ສາກົນ ເພື່ອໃຫ້ພວກເຮົາມີສະຕິ. ນອກນັ້ນທ່ານຍັງເນັ້ນເຖິງຄວາມສຳຄັນໃນການໄປສຶກສາຮ່ຳຮຽນ ທີ່ຕ່າງປະເທດ, ການແຂ່ງຂັນ ແລະ ການເຊື່ອມໂຍງໃນອາຊຽນ ແລະ ການຝຶກຝົນຫຼໍ່ຫຼອມຕົນເອງ ໃຫ້ມີຄວາມຮູ້ຄວາມສາມາດຮອບດ້ານເພື່ອຫຼ້ອນໜ້າທີ່ດັ່ງກ່າວໃນຕໍ່ໜ້າ ແລະ ຍາວນານ.