ໃນຕອນບ່າຍຂອງວັນທີ 5 ພຶດສະພາ 2023, ຫ້ອງການກະຊວງການຕ່າງປະເທດ ໄດ້ຈັດພິທີມອບຮັບໃບຢັ້ງຢຶນຝຶກງານໃຫ້ແກ່ບັນດານັກສຶກສາຈາກພາກວິຊາພົວພັນສາກົນ, ຄະນະນິຕິສາດ ແລະ ລັດຖະສາດ, ມະຫາວິທະຍາ ໄລແຫ່ງຊາດ ຈໍານວນ 53 ທ່ານ ທີ່ໄດ້ສຳເລັດການມາຝຶກງານຢູ່ກະຊວງການຕ່າງປະເທດ ປະຈໍາປີ 2023, ເຊິ່ງໄດ້ເລີ່ມມາຝຶກງານຢູ່ບັນດາກົມຕ່າງໆຂອງກະຊວງການຕ່າງປະເທດ ເປັນເວລາ 2 ເດືອນ ແຕ່ ວັນທີ 20 ກຸມພາ ເຖິງວັນທີ 28 ເມສາ 2023.
ໂດຍການໃຫ້ກຽດເຂົ້າຮ່ວມເປັນປະທານ ໂດຍ ທ່ານ ພົງສະຫວັນ ສີສຸລາດ, ຫົວໜ້າຫ້ອງການກະຊວງການຕ່າງປະເທດ. ນອກນັ້ນ, ຍັງມີຄະນະຫ້ອງການ, ຕາງໜ້າຈາກກົມຈັດຕັ້ງ ແລະ ພະນັກງານ, ຄະນະອາຈານຈາກພາກວິຊາພົວພັນສາກົນ, ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ ພ້ອມດ້ວຍນັກສຶກສາ ເຂົ້າຮ່ວມ. ການມາຝຶກງານຂອງນັກສຶກສາໃນຄັ້ງນີ້ ແມ່ນບົນພື້ນຖານຂອງບົດບັນທຶກການຮ່ວມມື ລະຫວ່າງ ກະຊວງການຕ່າງປະເທດ ກັບ ມະຫາວິທະຍາໄລແຫ່ງຊາດ ໃນປີ 2004 ເປັນຕົ້ນມາ, ເຊິ່ງແຕ່ລະປີ ຈະມີການນຳສົ່ງນັກສຶກສາຈາກພາກວິຊາດັ່ງກ່າວມາຝຶກງານຢູ່ກະຊວງການຕ່າງປະເທດ.
ໃນພິທີອັນມີຄວາມໝາຍນີ້ ທ່ານ ພົງສະຫວັນ ສີສຸລາດ, ຫົວໜ້າຫ້ອງການກະຊວງການຕ່າງປະເທດ, ປະທານພິທີກໍໄດ້ສະແດງຄວາມຊົມເຊີຍຕໍ່ບັນດານັກສຶກສາ, ທີ່ໄດ້ເອົາໃຈໃສ່, ຫ້າວຫັນ, ປະຕິບັດລະບຽບການມາຝຶກງານໄດ້ເປັນຢ່າງດີ, ເອົາໃຈໃສ່ຊອກຮູ້ຮໍ່າຮຽນ, ສຳເລັດໜ້າທີ່ວຽກງານທີ່ໄດ້ຖືກມອບໝາຍດ້ວຍຄວາມຮັບຜິດ ຊອບສູງ, ມີຄວາມສາມັກຄີຮັກແພງກັບພະນັກງານກະຊວງ ແລະ ສາມາດປະກອບສ່ວນເຂົ້າໃນວຽກງານຕ່າງໆໄດ້ຢ່າງດີ. ພ້ອມດຽວກັນນັ້ນ, ທ່ານປະທານຍັງໄດ້ໃຫ້ກຽດໂອ້ລົມຕໍ່ບັນດານັກສຶກສາ ໂດຍໄດ້ຍົກໃຫ້ເຫັນເຖິງບົດບາດຄວາມສຳຄັນ ແລະ ຄວາມຮຽກຮ້ອງຕ້ອງການໃນການາເກັບກ່ຽວເອົາປະສົບ ແລະ ຮຽນຮູ້ວຽກງານຕ່າງໆຂອງຂະແໜງການຕ່າງປະເທດ ເພື່ອໃຫ້ສຳເລັດຫຼັກສູດການຮຽນຂອງນັກສຶກສາ ແລະ ການເປັນພະນັກງານທີ່ມີຄວາມຮູ້ຄວາມສາມາດຂອງປະເທດຊາດໃນຕໍ່ໜ້າ.